Manfaatlar toʻqnashuvi toʻgʻrisida (O‘RQ-931-son)

05.06.2024

Oʻzbekiston Respublikasining Qonuni

Qonunchilik palatasi tomonidan 2022-yil 25-oktabrda qabul qilingan Senat tomonidan 2023-yil 1-iyunda maʼqullangan

1-bob. Umumiy qoidalar

1-modda. Ushbu Qonunning maqsadi va amal qilish sohasi

Ushbu Qonunning maqsadi manfaatlar toʻqnashuvi bilan bogʻliq munosabatlarni tartibga solishdan iborat.

Ushbu Qonunning amal qilishi davlat organlariga va mahalliy davlat hokimiyati organlariga, davlat muassasalariga, davlat unitar korxonalariga, davlat maqsadli jamgʻarmalariga, shuningdek ustav fondida (ustav kapitalida) davlat ulushi 50 foiz miqdorda va undan ortiq boʻlgan aksiyadorlik jamiyatlariga (bundan buyon matnda davlat organlari yoki boshqa tashkilotlar deb yuritiladi) nisbatan tatbiq etiladi.

Ushbu Qonunning amal qilishi:

oʻz ustav fondida (ustav kapitalida) davlat organlarining yoki boshqa tashkilotlarning ulushi jami 50 foiz miqdorda va undan ortiq boʻlgan yuridik shaxslarga nisbatan;

oʻz ustav fondida (ustav kapitalida) ushbu modda uchinchi qismining ikkinchi xatboshisida koʻrsatilgan tashkilotlarning ulushi jami 50 foiz miqdorda va undan ortiq boʻlgan yuridik shaxslarga nisbatan faqat ularning davlat xaridlari sohasidagi munosabatlariga tatbiq etiladi.

2-modda. Manfaatlar toʻqnashuvi toʻgʻrisidagi qonunchilik

Manfaatlar toʻqnashuvi toʻgʻrisidagi qonunchilik ushbu Qonun va boshqa qonunchilik hujjatlaridan iboratdir.

Jinoyat ishlari boʻyicha sudga qadar ish yuritishni, shuningdek sud ishini yuritish chogʻida yuzaga keladigan munosabatlarni tartibga soluvchi qonunlarda manfaatlar toʻqnashuvi bilan bogʻliq munosabatlarni tartibga solishga oid boshqa qoidalar belgilanishi mumkin.

Agar Oʻzbekiston Respublikasining xalqaro shartnomasida Oʻzbekiston Respublikasining manfaatlar toʻqnashuvi toʻgʻrisidagi qonunchiligida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.

3-modda. Asosiy tushunchalar

Ushbu Qonunda quyidagi asosiy tushunchalar qoʻllaniladi:

davlat organining yoki boshqa tashkilotning xodimi — davlat organlarida yoki boshqa tashkilotlarda mehnat shartnomasi (kontrakt) asosida yoxud saylab qoʻyiladigan yoki tayinlanadigan lavozimlarda mehnat (xizmat) faoliyatini amalga oshirayotgan boshqaruv xodimi;

manfaatlar toʻqnashuvi — shaxsning shaxsiy (bevosita yoki bilvosita) manfaatdorligi uning oʻz lavozim yoki xizmat majburiyatlarini lozim darajada bajarishiga taʼsir koʻrsatayotgan yoxud taʼsir koʻrsatishi mumkin boʻlgan hamda shaxsiy manfaatdorlik bilan fuqarolarning, tashkilotlarning, jamiyatning yoki davlatning huquqlari, qonuniy manfaatlari oʻrtasida qarama-qarshilik yuzaga kelayotgan (mavjud manfaatlar toʻqnashuvi) yoki yuzaga kelishi mumkin boʻlgan (ehtimoliy manfaatlar toʻqnashuvi) vaziyat;

manfaatlar toʻqnashuvini tartibga solish boʻyicha maxsus boʻlinma (bundan buyon matnda maxsus boʻlinma deb yuritiladi) — davlat organlarining yoki boshqa tashkilotlarning korrupsiyaga qarshi ichki nazorat boʻlinmalari (va) yoki kadrlar boʻlinmalari;

shaxsiy manfaatdorlik — davlat organining yoki boshqa tashkilotning xodimi yoxud u bilan aloqador shaxslar ushbu xodim tomonidan bevosita yoki bilvosita qaror qabul qilinishi yoki xodimning ushbu jarayonda boshqacha tarzda ishtirok etishi natijasida olishi mumkin boʻlgan har qanday naf yoki afzallik;

yaqin qarindoshlar — ota-onalar, aka-ukalar, opa-singillar, oʻgʻillar, qizlar, er-xotinlar, shuningdek er-xotinlarning ota-onalari, aka-ukalari, opa-singillari va farzandlari.

4-modda. Manfaatlar toʻqnashuvi bilan bogʻliq munosabatlarni tartibga solishning asosiy prinsiplari

Manfaatlar toʻqnashuvi bilan bogʻliq munosabatlarni tartibga solishning asosiy prinsiplari quyidagilardan iborat:

qonuniylik;

fuqarolarning, tashkilotlarning, jamiyatning va davlatning qonuniy manfaatlari ustuvorligi;

ochiqlik va shaffoflik;

xolislik;

korrupsiyaga nisbatan murosasizlik.

5-modda. Davlat organining yoki boshqa tashkilotning xodimiga aloqador shaxslar

Quyidagi shaxslar davlat organining yoki boshqa tashkilotning xodimiga aloqador shaxslar deb eʼtirof etiladi:

davlat organi yoki boshqa tashkilot xodimining yaqin qarindoshlari;

davlat organining yoki boshqa tashkilotning xodimi va (yoki) uning yaqin qarindoshlari qaysi yuridik shaxsning ustav fondi (ustav kapitali) aksiyalariga yoki ulushlariga egalik qilsa, oʻsha yuridik shaxs;

davlat organining yoki boshqa tashkilotning xodimi yoxud uning yaqin qarindoshlari qaysi yuridik shaxsda boshqaruv organining rahbari yoki aʼzosi boʻlsa, oʻsha yuridik shaxs.

6-modda. Davlat organi yoki boshqa tashkilot xodimining manfaatlar toʻqnashuvi bilan bogʻliq munosabatlarni tartibga solish chogʻidagi huquq va majburiyatlari

Davlat organi yoki boshqa tashkilot xodimi manfaatlar toʻqnashuvi bilan bogʻliq munosabatlarni tartibga solish chogʻida:

maxsus boʻlinmaga maslahat soʻrab murojaat etish;

ehtimoliy manfaatlar toʻqnashuvi toʻgʻrisidagi deklaratsiyada koʻrsatilishi kerak boʻlgan maʼlumotlardan tashqari qoʻshimcha maʼlumotlarni elektron yoki yozma shaklda taqdim etish huquqiga ega.

Davlat organining yoki boshqa tashkilotning xodimi:

oʻz lavozim majburiyatlarini yoki xizmat vakolatlarini vijdonan bajarishi va ularning bajarilishiga taʼsir koʻrsatadigan yoki taʼsir koʻrsatishi mumkin boʻlgan oʻz shaxsiy manfaatlari bilan bogʻliq har qanday harakatlardan oʻzini tiyishi;

lavozim majburiyatlarini yoki xizmat vakolatlarini bajarish chogʻida manfaatlar toʻqnashuviga olib keladigan yoki olib kelishi mumkin boʻlgan shaxsiy manfaatdorlikka yoʻl qoʻymasligi;

mavjud manfaatlar toʻqnashuvi yuzaga kelgan taqdirda, oʻz ish yurituvidagi hujjatlar boʻyicha qaror qabul qilinguniga qadar oʻzining bevosita rahbarini (tashkilot rahbari — yuqori turuvchi rahbarni) yoki maxsus boʻlinmani xabardor qilishi;

oʻzining bevosita boʻysunuvidagi xodimlarni yoki boshqa xodimlarni bevosita yoki bilvosita oʻzining shaxsiy manfaatlarini koʻzlovchi harakatlarga (harakatsizlikka) majburlamasligi;

oʻzi mehnat (xizmat) faoliyatini amalga oshirayotgan davlat organi yoki boshqa tashkilot nazorati ostidagi tashkilotdan yoki uning tarkibiy boʻlinmasidan ishga qabul qilish toʻgʻrisida takliflar kelib tushganligi holati haqida bir ish kuni ichida xabar berishi;

boshqa xodimlarga nisbatan oʻziga maʼlum boʻlgan manfaatlar toʻqnashuvi hollari toʻgʻrisida xabar berishi;

ehtimoliy manfaatlar toʻqnashuvini tartibga solish maqsadida maxsus boʻlinmaning soʻroviga koʻra maʼlumotlar taqdim etishi shart.

Davlat organining yoki boshqa tashkilotning xodimi qonunchilikka muvofiq boshqa huquqlarga ega boʻlishi va uning zimmasida boshqa majburiyatlar ham boʻlishi mumkin.

7-modda. Davlat organining yoki boshqa tashkilotning xodimiga aloqador shaxslarning manfaatlar toʻqnashuvi bilan bogʻliq munosabatlarni tartibga solish chogʻidagi huquq va majburiyatlari

Davlat organining yoki boshqa tashkilotning xodimiga aloqador shaxslar mazkur xodim mehnat (xizmat) faoliyatini amalga oshirayotgan davlat organi yoki boshqa tashkilot bilan munosabatlarga kirishganda:

manfaatlar toʻqnashuvining oldini olish uchun maxsus boʻlinmadan bepul maslahat olish;

davlat organining yoki boshqa tashkilotning manfaatlar toʻqnashuvini tartibga solish boʻyicha harakatlari (harakatsizligi) yoki qarorlari ustidan shikoyat qilish huquqiga ega.

Davlat organining yoki boshqa tashkilotning xodimiga aloqador shaxslar mazkur xodim mehnat (xizmat) faoliyatini amalga oshirayotgan davlat organi yoki boshqa tashkilot bilan munosabatlarga kirishganda:

shaxsiy manfaatlarini koʻzlab manfaatlar toʻqnashuviga yoʻl qoʻymasligi;

ehtimoliy manfaatlar toʻqnashuvi toʻgʻrisidagi deklaratsiyani elektron yoki yozma shaklda toʻldirishi, unga bila turib yolgʻon va notoʻgʻri maʼlumotlarni kiritmasligi shart.

Davlat organining yoki boshqa tashkilotning xodimi bilan aloqador shaxslar tomonidan ehtimoliy manfaatlar toʻqnashuvi toʻgʻrisidagi deklaratsiyada bila turib yolgʻon yoki notoʻgʻri maʼlumotlar taqdim etilganligi ushbu Qonunda belgilangan huquqiy oqibatlarni keltirib chiqarishi mumkin.

8-modda. Davlat organi yoki boshqa tashkilot xodimining faoliyatida manfaatlar toʻqnashuvining oldini olish boʻyicha cheklovlar

Manfaatlar toʻqnashuvining oldini olish maqsadida davlat organining yoki boshqa tashkilotning xodimi:

xizmat mavqeyini suiisteʼmol qilish orqali shaxsiy naf olishga;

manfaatlar toʻqnashuvi haqidagi axborotni oshkor etish chogʻida maʼlumotlarni yashirishga yoxud bila turib yolgʻon yoki notoʻgʻri axborot taqdim etishga;

biri boshqasiga boʻysunuvchi yoki biri boshqasining nazoratidagi tashkilotlarda oʻrindoshlik boʻyicha ishlashga, bundan qonunchilikda nazarda tutilgan hollar mustasno;

tijorat tashkilotlarining taʼsischisi (aksiyadori, ishtirokchisi) boʻlishga, bundan aksiyadorlik jamiyatlarining erkin muomalada boʻlgan aksiyalarining oʻn foizigacha egalik qilish hollari mustasno;

oʻzi mehnat (xizmat) faoliyatini amalga oshirayotgan davlat organi yoki boshqa tashkilotning nazoratida boʻlgan tadbirkorlik faoliyati subyektining aksiyalariga yoki ustav fondidagi (ustav kapitalidagi) ulushlariga egalik qilishga, shuningdek ushbu tadbirkorlik faoliyati subyektlarining boshqaruv organi aʼzosi boʻlishga, bundan Oʻzbekiston Respublikasi qonunlarida hamda Oʻzbekiston Respublikasi Prezidenti qarorlarida nazarda tutilgan yoki bu faoliyat qonunchilikka muvofiq lavozim majburiyatlari hisoblanadigan hollar mustasno. Bunda davlat organi yoki boshqa tashkilot nazoratida boʻlgan tadbirkorlik faoliyati subyektlarining aksiyalariga yoki ustav fondidagi (ustav kapitalidagi) ulushlariga egalik qilgan yoxud mazkur tadbirkorlik faoliyati subyektlarining boshqaruv organlari aʼzosi boʻlgan shaxs mazkur davlat organida yoki boshqa tashkilotda xodim lavozimini egallagan hollarda, u qonunchilikda belgilangan tartibda ushbu aksiyalarni yoki ulushlarni bir oy ichida realizatsiya qilishi, boshqaruv organlarining aʼzoligidan chiqishi kerak;

oʻzi mehnat (xizmat) faoliyatini amalga oshirayotgan davlat organlarida yoki boshqa tashkilotlarda oʻziga taalluqli boʻlgan ishlarni koʻrib chiqishda yoki oʻziga aloqador shaxslarga taalluqli boʻlgan ishlarni koʻrib chiqishda vakil sifatida ishtirok etishga, agar u qonunchilikka muvofiq qonuniy vakil boʻlmasa;

oʻzi mehnat (xizmat) faoliyatini amalga oshirayotgan tashkilotning mol-mulkini sotib olishda yoki ijaraga olishda oʻzi ishtirok etishga haqli emas.

Davlat organining yoki boshqa tashkilotning oʻzi bilan mehnat shartnomasi tugatilgan yoki xizmatdan boʻshatilgan xodimi ikki yil ichida oxirgi ish joyida oʻzi bevosita yoki bilvosita nazoratni amalga oshirgan tashkilotlar yoki ularning tarkibiy boʻlinmalari tomonidan ishga ushbu xodim mehnat (xizmat) faoliyatini amalga oshirgan tashkilotlarning korrupsiyaga qarshi nazorat boʻlinmasi vazifasini amalga oshiruvchi mansabdor shaxslarning xulosasiga asosan qabul qilinadi.

Ushbu modda birinchi qismining beshinchi xatboshisida koʻrsatilgan cheklov faqat davlat organlari, mahalliy davlat hokimiyati organlari, davlat maqsadli jamgʻarmalarining xodimlariga, davlat muassasalarining va davlat unitar korxonalarining, oʻz ustav fondida (ustav kapitalida) davlat ulushi 50 foiz miqdorda va undan ortiq boʻlgan aksiyadorlik jamiyatlarining rahbarlariga nisbatan tatbiq etiladi.

Ushbu modda birinchi qismining sakkizinchi xatboshisida koʻrsatilgan cheklov davlat organi yoki boshqa tashkilotning xodimiga aloqador shaxslarga nisbatan ham qoʻllaniladi.

Ushbu Qonunning maqsadlarini nazarda tutgan holda mazkur moddada “nazorat” deganda davlat organi yoki boshqa tashkilot xodimining tegishli tashkilot faoliyatini shaxsan yoki oʻzining boʻysunuvidagi shaxs orqali tekshirish yoxud unga nisbatan qonunchilikda belgilangan har qanday imtiyozlarni (preferensiyalarni) qoʻllash yoki uni har qanday javobgarlikka tortish (javobgarlikka tortish boʻyicha tashabbus koʻrsatish) yoxud unga litsenziya va ruxsat etish xususiyatiga ega boshqa hujjatlarni berish (xabarnomani qabul qilish) huquqi tushuniladi.

Davlat organlari yoki boshqa tashkilotlar xodimi lavozim majburiyatlarining yoki xizmat vakolatlarining oʻziga xos xususiyati hisobga olingan holda, unga nisbatan qonunchilikda belgilangan boshqa cheklovlar qoʻllanilishi mumkin.

2-bob. Manfaatlar toʻqnashuvi bilan bogʻliq munosabatlarni davlat tomonidan tartibga solish

9-modda. Oʻzbekiston Respublikasi Korrupsiyaga qarshi kurashish agentligining manfaatlar toʻqnashuvi bilan bogʻliq munosabatlarni tartibga solish sohasidagi vakolatlari

Oʻzbekiston Respublikasining Korrupsiyaga qarshi kurashish agentligi manfaatlar toʻqnashuvi bilan bogʻliq munosabatlarni tartibga solish sohasidagi maxsus vakolatli davlat organidir (bundan buyon matnda maxsus vakolatli davlat organi deb yuritiladi).

Maxsus vakolatli davlat organi:

manfaatlar toʻqnashuvi bilan bogʻliq axborotni va materiallarni davlat organlaridan yoki boshqa tashkilotlardan soʻrab oladi va oʻrganadi;

davlat organlarining yoki boshqa tashkilotlarning manfaatlar toʻqnashuvi bilan bogʻliq munosabatlarni tartibga solish sohasidagi faoliyatini muvofiqlashtiradi;

davlat organlarining yoki boshqa tashkilotlarning manfaatlar toʻqnashuvi bilan bogʻliq munosabatlarni tartibga solish sohasidagi faoliyatini, shu jumladan jismoniy va yuridik shaxslarning murojaatlari asosida oʻrganadi;

manfaatlar toʻqnashuvi bilan bogʻliq holatlar aniqlanganda, bitimni bekor qilish, qarorni hamda boshqa hujjatni oʻzgartirish yoki bekor qilish toʻgʻrisida davlat organlariga yoki boshqa tashkilotlarga taqdimnoma kiritadi yoxud ularni haqiqiy emas deb topish haqida sudga daʼvo kiritadi;

Manfaatlar toʻqnashuvini hisobga olish reyestrining, mavjud manfaatlar toʻqnashuvi toʻgʻrisidagi xabarnomaning hamda ehtimoliy manfaatlar toʻqnashuvi toʻgʻrisidagi deklaratsiyaning namunaviy shakllarini tasdiqlaydi;

davlat organlari yoki boshqa tashkilotlar uchun manfaatlar toʻqnashuvini tartibga solish boʻyicha uslubiy tavsiyalarni eʼlon qiladi;

manfaatlar toʻqnashuvi natijasida fuqarolarning, tashkilotlarning, jamiyatning yoki davlatning manfaatlariga yetkazilgan zararning oʻrni toʻliq qoplanishiga erishilishi ustidan nazoratni amalga oshiradi;

maxsus boʻlinmalar xodimlarining tizimli ravishda malakasini oshirishni, ularda tegishli koʻnikmalarni shakllantirishga qaratilgan oʻqitishni tashkil etadi;

maʼmuriy javobgarlik toʻgʻrisidagi qonunchilikka muvofiq manfaatlar toʻqnashuvi toʻgʻrisidagi qonunchilik talablariga rioya etmaganlik bilan bogʻliq maʼmuriy huquqbuzarlik haqida bayonnomani tuzadi va uni koʻrib chiqish uchun sudga yuboradi.

Maxsus vakolatli davlat organi qonunchilikka muvofiq boshqa vakolatlarni ham amalga oshirishi mumkin.

10-modda. Davlat organlarining yoki boshqa tashkilotlarning manfaatlar toʻqnashuvi bilan bogʻliq munosabatlarni tartibga solish sohasidagi vakolatlari

Davlat organlari yoki boshqa tashkilotlar manfaatlar toʻqnashuvi bilan bogʻliq munosabatlarni tartibga solish sohasida:

xodimlar tomonidan mavjud manfaatlar toʻqnashuvi toʻgʻrisida xabardor qilish tizimini tashkil etadi;

ehtimoliy manfaatlar toʻqnashuvi toʻgʻrisidagi deklaratsiyaning va mavjud manfaatlar toʻqnashuvi toʻgʻrisidagi xabarnomaning belgilangan shaklini oʻzining rasmiy veb-saytlariga joylashtiradi;

manfaatlar toʻqnashuviga yoʻl qoʻyilgan holda qabul qilingan qarorlarni belgilangan tartibda oʻzgartiradi yoki bekor qiladi;

manfaatlar toʻqnashuviga yoʻl qoʻyilgan holda tuzilgan bitimlarni oʻzgartiradi yoki bekor qiladi yoxud bunday bitimlarni haqiqiy emas deb topish toʻgʻrisida belgilangan tartibda sudga daʼvolar bilan murojaat etadi;

odob-axloq komissiyalarining va maxsus boʻlinmalarning manfaatlar toʻqnashuvi bilan bogʻliq munosabatlarni tartibga solish boʻyicha faoliyatini tashkil etadi;

davlat organlarida yoki boshqa tashkilotlarda manfaatlar toʻqnashuvining oldini olish boʻyicha ichki idoraviy tartibni belgilaydi;

aniqlangan manfaatlar toʻqnashuvi boʻyicha xizmat tekshiruvining xolisona tashkil etilishini va uning natijalari odob-axloq komissiyalari tomonidan koʻrib chiqilishini taʼminlaydi;

manfaatlar toʻqnashuvining oldini olishda oʻrnak boʻlayotgan xodimlarni ragʻbatlantirish choralarini koʻradi;

manfaatlar toʻqnashuvi natijasida fuqarolarga, tashkilotlarga, jamiyatga yoki davlatga yetkazilgan zararning oʻrni qoplanishini taʼminlash, shuningdek aholining tegishli davlat organiga yoki boshqa tashkilotga boʻlgan ishonchini tiklash choralarini koʻradi.

Davlat organlari yoki boshqa tashkilotlar qonunchilikka muvofiq boshqa vakolatlarni ham amalga oshirishi mumkin.

11-modda. Davlat organlari yoki boshqa tashkilotlar odob-axloq komissiyasining manfaatlar toʻqnashuvi bilan bogʻliq munosabatlarni tartibga solish sohasidagi vakolatlari

Davlat organi yoki boshqa tashkilot xodimi tomonidan ushbu Qonun talablariga rioya etilishi ustidan nazorat ushbu davlat organida yoki boshqa tashkilotda tuzilgan odob-axloq komissiyasi tomonidan amalga oshiriladi.

Odob-axloq komissiyasi:

davlat organi yoki boshqa tashkilot xodimi tomonidan ushbu Qonunda belgilangan talablarga rioya etilishini taʼminlash choralarini koʻradi;

manfaatlar toʻqnashuvini tartibga solish yuzasidan koʻrilayotgan choralarning yetarliligi (toʻgʻriligi) haqidagi masalalarni koʻrib chiqadi;

mavjud manfaatlar toʻqnashuvi bilan bogʻliq hollar ustidan kollegial nazoratni amalga oshiradi;

ushbu Qonunda belgilangan talablarning davlat organi yoki boshqa tashkilot xodimlari tomonidan buzilishlari mavjudligi (mavjud emasligi) toʻgʻrisida xizmat tekshiruvi natijalariga koʻra xulosa chiqaradi;

manfaatlar toʻqnashuvi toʻgʻrisida xabar qilmagan, bila turib yolgʻon yoki notoʻgʻri axborot taqdim etgan yoxud bunday axborotni yashirgan xodimni javobgarlikka tortish haqida davlat organining yoki boshqa tashkilotning rahbariga taklif kiritadi.

Odob-axloq komissiyasi qonunchilikka muvofiq boshqa vakolatlarni ham amalga oshirishi mumkin.

12-modda. Maxsus boʻlinmaning manfaatlar toʻqnashuvi bilan bogʻliq munosabatlarni tartibga solish sohasidagi vakolatlari

Maxsus boʻlinma:

davlat organining yoki boshqa tashkilotning xodimi tomonidan aniqlangan manfaatlar toʻqnashuvi hollari toʻgʻrisidagi axborotni umumlashtiradi;

davlat organining yoki boshqa tashkilotning ushbu Qonun talablarini buzgan xodimiga nisbatan xizmat tekshiruvini oʻtkazadi;

davlat organining yoki boshqa tashkilotning xodimlari oʻrtasida manfaatlar toʻqnashuvining oldini olish yuzasidan qonunchilikka muvofiq tushuntirish ishlarini amalga oshiradi;

ehtimoliy manfaatlar toʻqnashuvi toʻgʻrisidagi deklaratsiyalarni, shuningdek mavjud manfaatlar toʻqnashuvi toʻgʻrisidagi xabarnomani koʻrib chiqadi, ularning natijalariga koʻra odob-axloq komissiyasiga takliflar kiritadi;

davlat organi yoki boshqa tashkilot xodimining manfaatlar toʻqnashuvi haqidagi xabarlari munosabati bilan manfaatlar toʻqnashuvi mavjudligi yoki mavjud emasligi toʻgʻrisida xulosa beradi;

davlat organlarida yoki boshqa tashkilotlarda aniqlangan manfaatlar toʻqnashuvi hollarini tahlil qiladi hamda ularni tartibga solish boʻyicha takliflarni ishlab chiqadi;

davlat organlarida yoki boshqa tashkilotlarda ushbu Qonun talablariga rioya etilishi holati toʻgʻrisidagi har yilgi hisobotlarni tayyorlaydi hamda hisobotlar uning rasmiy veb-saytiga joylashtirilishini taʼminlaydi.

Maxsus boʻlinma qonunchilikka muvofiq boshqa vakolatlarni ham amalga oshirishi mumkin.

3-bob. Manfaatlar toʻqnashuvi toʻgʻrisidagi axborotni oshkor etishga va manfaatlar toʻqnashuvini aniqlashga doir choralar

13-modda. Manfaatlar toʻqnashuvi toʻgʻrisidagi axborotni oshkor etish

Manfaatlar toʻqnashuvi toʻgʻrisidagi axborotni oshkor etish davlat organining yoki boshqa tashkilotning xodimi tomonidan mavjud manfaatlar toʻqnashuvi toʻgʻrisida xabarnoma hamda ehtimoliy manfaatlar toʻqnashuvi toʻgʻrisida deklaratsiya taqdim etish orqali amalga oshiriladi.

Davlat organining yoki boshqa tashkilotning xodimiga aloqador shaxslar tomonidan manfaatlar toʻqnashuvi toʻgʻrisidagi axborotni oshkor etish ularning ehtimoliy manfaatlar toʻqnashuvi toʻgʻrisidagi deklaratsiyani taqdim etishi orqali amalga oshiriladi.

14-modda. Mavjud manfaatlar toʻqnashuvi toʻgʻrisidagi xabarnoma

Mavjud manfaatlar toʻqnashuvi toʻgʻrisidagi xabarnomada quyidagi maʼlumotlar koʻrsatilishi kerak:

mavjud manfaatlar toʻqnashuvi toʻgʻrisida xabar berayotgan davlat organi yoki boshqa tashkilot xodimining familiyasi, ismi, otasining ismi va lavozimi, shuningdek jismoniy shaxsning shaxsiy identifikatsiya raqami;

davlat organi yoki boshqa tashkilot xodimining manfaatlar toʻqnashuvi yuzaga kelayotgan yaqin qarindoshining familiyasi, ismi, otasining ismi, jismoniy shaxsning shaxsiy identifikatsiya raqami (mavjud boʻlgan taqdirda) yoxud davlat organi yoki boshqa tashkilot xodimiga aloqador shaxsning nomi va soliq toʻlovchining identifikatsiya raqami;

mavjud manfaatlar toʻqnashuvi toʻgʻrisidagi axborot.

Mavjud manfaatlar toʻqnashuvi toʻgʻrisidagi xabarnoma manfaatlar toʻqnashuvini tartibga solish boʻyicha koʻrilgan choralarni oʻz ichiga olishi, davlat organi yoki boshqa tashkilot xodimining va (yoki) uning bevosita rahbarining (ayrim hollarda, uning oʻrinbosarining) oʻz qoʻli bilan qoʻyilgan imzosi yoki elektron raqamli imzosi bilan tasdiqlanishi kerak.

15-modda. Mavjud manfaatlar toʻqnashuvi toʻgʻrisidagi xabarnomani taqdim etish tartibi

Davlat organining yoki boshqa tashkilotning xodimi quyidagi hollarda mavjud manfaatlar toʻqnashuvi oʻziga maʼlum boʻlib qolgan paytdan eʼtiboran bir ish kuni ichida mavjud manfaatlar toʻqnashuvi haqidagi belgilangan shakldagi xabarnomani toʻldirishi va oʻzining bevosita rahbariga (tashkilot rahbariga — yuqori turuvchi rahbarga) yoki maxsus boʻlinmaga taqdim etishi shart, agar:

yaqin qarindoshlari bevosita xodimning boʻysunuvidagi ishga qabul qilingan boʻlsa (davlat fuqarolik xizmati lavozimlarining siyosiy guruhiga kiruvchi lavozimga ishga qabul qilingan hollar bundan mustasno) yoki xodimning ishiga fuqarolik-huquqiy shartnoma asosida oʻziga aloqador shaxslar jalb etilgan boʻlsa;

u oʻziga aloqador shaxslarga taalluqli masalalar boʻyicha qarorlar qabul qilishda ishtirok etayotgan boʻlsa;

yaqin qarindoshi tekshiruv oʻtkazilayotgan obyektda (yuridik shaxsda) tekshiruv yoʻnalishi boʻyicha masʼul mansabdor shaxs sifatida ishlayotgan boʻlsa yoki mazkur tekshiruv obyekti (yuridik shaxs) unga aloqador shaxs boʻlsa;

boshqa har qanday mavjud manfaatlar toʻqnashuvi oʻziga maʼlum boʻlib qolsa.

16-modda. Mavjud manfaatlar toʻqnashuvi toʻgʻrisidagi xabarnomani koʻrib chiqish tartibi

Davlat organining yoki boshqa tashkilotning rahbar xodimi hamda maxsus boʻlinmaning rahbari manfaatlar toʻqnashuvini tartibga solish uchun masʼul hisoblanadi.

Davlat organlari yoki boshqa tashkilotlar tarkibiy boʻlinmasining rahbari mavjud manfaatlar toʻqnashuvini tartibga solish boʻyicha oʻz vakolatlari doirasida koʻrilgan choralar toʻgʻrisida maxsus boʻlinmaga bir ish kuni ichida axborot taqdim etishi shart.

Maxsus boʻlinma koʻrilgan choralarning yetarliligi (toʻgʻriligi) toʻgʻrisidagi masalani koʻrib chiqish uchun axborotni uch ish kuni ichida odob-axloq komissiyasiga taqdim etadi.

17-modda. Ehtimoliy manfaatlar toʻqnashuvi toʻgʻrisidagi deklaratsiya

Ehtimoliy manfaatlar toʻqnashuvi toʻgʻrisidagi deklaratsiyada quyidagi maʼlumotlar koʻrsatilishi kerak:

davlat organi yoki boshqa tashkilot xodimining lavozimi hamda uning familiyasi, ismi, otasining ismi, shuningdek uning jismoniy shaxsning shaxsiy identifikatsiya raqami;

davlat organi yoki boshqa tashkilot xodimi yaqin qarindoshlarining familiyasi, ismi va otasining ismi, ularning jismoniy shaxsning shaxsiy identifikatsiya raqami (mavjud boʻlgan taqdirda), shuningdek ish joyi va lavozimi;

davlat organining yoki boshqa tashkilotning xodimi yoki uning yaqin qarindoshlari aksiyador boʻlgan aksiyadorlik jamiyatining rasmiy nomi va uning soliq toʻlovchining identifikatsiya raqami;

davlat organi yoki boshqa tashkilot xodimining yaqin qarindoshi muassis (ishtirokchi), boshqaruv organi aʼzosi boʻlgan yuridik shaxsning rasmiy nomi, shuningdek uning soliq toʻlovchining identifikatsiya raqami.

Ehtimoliy manfaatlar toʻqnashuvi toʻgʻrisidagi deklaratsiya uni toʻldirgan davlat organi yoki boshqa tashkilot xodimining oʻz qoʻli bilan qoʻyilgan imzosi yoki elektron raqamli imzosi bilan tasdiqlangan boʻlishi kerak.

18-modda. Ehtimoliy manfaatlar toʻqnashuvi toʻgʻrisidagi deklaratsiyani taqdim etish tartibi

Davlat organining yoki boshqa tashkilotning xodimi shaxsga doir maʼlumotlari oʻzgargan taqdirda, ehtimoliy manfaatlar toʻqnashuvi toʻgʻrisidagi deklaratsiyani toʻldirishi va har yili 15-yanvardan kechiktirmay maxsus boʻlinmaga taqdim etishi kerak.

Davlat organiga yoki boshqa tashkilotga ishga qabul qilinayotgan nomzod, shuningdek boshqa ishga oʻtkazilgan xodim ehtimoliy manfaatlar toʻqnashuvi toʻgʻrisidagi belgilangan shakldagi deklaratsiyani toʻldirishi va taqdim etishi kerak.

Maxsus boʻlinma:

ehtimoliy manfaatlar toʻqnashuvi toʻgʻrisidagi har yilgi deklaratsiyani har yili 15-fevralgacha umumlashtiradi va tahlil qiladi;

ehtimoliy manfaatlar toʻqnashuvini tartibga solish boʻyicha choralarning yetarliligini (toʻgʻriligini) taʼminlash uchun har yili 1-martga qadar odob-axloq komissiyasiga taklif kiritadi;

odob-axloq komissiyasi tomonidan qabul qilingan xulosaga asosan ehtimoliy manfaatlar toʻqnashuvini tartibga solish yuzasidan choralar koʻrish toʻgʻrisida davlat organi yoki boshqa tashkilot xodimining bevosita rahbariga yoxud davlat organining yoki boshqa tashkilotning yuqori turuvchi rahbariga taklif kiritadi.

Davlat organining yoki boshqa tashkilotning xodimligiga nomzod ishga qabul qilinayotganda yoxud davlat organi yoki boshqa tashkilot xodimi boshqa ishga oʻtkazilayotganda, ehtimoliy manfaatlar toʻqnashuvi toʻgʻrisidagi deklaratsiyani taqdim etganidan keyin maxsus boʻlinma ushbu moddaning uchinchi qismida nazarda tutilgan ishlarni besh kunlik muddatda amalga oshiradi.

19-modda. Davlat organining yoki boshqa tashkilotning xodimiga aloqador shaxslar tomonidan taqdim etiladigan ehtimoliy manfaatlar toʻqnashuvi toʻgʻrisidagi deklaratsiya

Davlat organining yoki boshqa tashkilotning xodimiga aloqador shaxslar tomonidan taqdim etiladigan ehtimoliy manfaatlar toʻqnashuvi toʻgʻrisidagi deklaratsiyada quyidagi maʼlumotlar koʻrsatilishi kerak:

davlat organi yoki boshqa tashkilot xodimiga aloqador shaxs hisoblangan jismoniy shaxsning familiyasi, ismi, otasining ismi, shaxsiy identifikatsiya raqami yoxud yuridik shaxsning nomi va soliq toʻlovchining identifikatsiya raqami;

davlat organi yoki boshqa tashkilot xodimining familiyasi, ismi va otasining ismi, lavozimi;

davlat organining yoki boshqa tashkilotning xodimi bilan qarindoshlik toʻgʻrisidagi maʼlumotlar;

yuridik shaxsning davlat organi yoki boshqa tashkilot xodimiga aloqadorligi toʻgʻrisidagi maʼlumotlar.

Ehtimoliy manfaatlar toʻqnashuvi toʻgʻrisidagi deklaratsiya uni toʻldirgan jismoniy shaxsning yoki yuridik shaxs vakilining (ishonchli shaxsining) oʻz qoʻli bilan qoʻyilgan imzosi yoki elektron raqamli imzosi bilan tasdiqlangan boʻlishi kerak.

20-modda. Manfaatlar toʻqnashuvini aniqlash

Manfaatlar toʻqnashuvini aniqlash quyidagi manbalardan olingan maʼlumotlarni oʻrganish orqali amalga oshiriladi:

ushbu Qonunning 17-moddasida nazarda tutilgan ehtimoliy manfaatlar toʻqnashuvi toʻgʻrisidagi deklaratsiyadan;

davlat xaridlari jarayonida olingan takliflardan, xarid komissiyasi majlislarining bayonnomalaridan, tuzilgan shartnomalardan;

jismoniy va yuridik shaxslarning davlat organi yoki boshqa tashkilot xodimining faoliyatidagi mavjud manfaatlar toʻqnashuvi yoki ehtimoliy manfaatlar toʻqnashuvi toʻgʻrisidagi murojaatlaridan yoki xabarlaridan;

tijorat tashkilotlarining affillangan shaxslari va yakuniy naf oluvchilari (benefitsiarlari) roʻyxatlaridan;

Oʻzbekiston Respublikasi Yagona interaktiv davlat xizmatlari portalining tadbirkorlik subyektlarini roʻyxatdan oʻtkazish modulidan;

“FHDY Yagona elektron arxivi” axborot tizimidan;

“Yagona milliy mehnat tizimi” idoralararo apparat-dasturiy majmuidan;

Qimmatli qogʻozlar markaziy depozitariysidan;

maxsus vakolatli davlat organi tomonidan oʻtkazilgan oʻrganish natijalari boʻyicha kiritilgan taqdimnomadan.

Ushbu modda birinchi qismining beshinchi — toʻqqizinchi xatboshilarida koʻrsatilgan manbalardan maʼlumotlar olish maxsus boʻlinma rahbarining soʻrovi boʻyicha amalga oshiriladi.

Davlat organi yoki boshqa tashkilot xodimining ommaviy axborot vositalariga, shu jumladan Internet jahon axborot tarmogʻiga joylashtirilgan mavjud manfaatlar toʻqnashuvi yoki ehtimoliy manfaatlar toʻqnashuvi holatlari ular toʻgʻrisidagi maʼlumotlarni toʻplash va oʻrganish orqali aniqlanadi.

Ushbu moddaning birinchi qismida nazarda tutilgan maʼlumotlarni oʻrganish maxsus boʻlinma tomonidan amalga oshiriladi.

4-bob. Manfaatlar toʻqnashuvini tartibga solish boʻyicha koʻrilgan choralarni koʻrib chiqish va tekshirish

21-modda. Manfaatlar toʻqnashuviga oid hollarga nisbatan koʻriladigan choralar

Manfaatlar toʻqnashuvi hollarini tartibga solish uchun ularning oʻziga xos xususiyatlarini hisobga olgan holda quyidagi choralardan biri koʻrilishi kerak:

oʻziga nisbatan manfaatlar toʻqnashuvi yuzaga kelgan rahbarning bevosita boʻysunuvidagi davlat organi yoki boshqa tashkilot xodimini manfaatlar toʻqnashuvi yuzaga kelmaydigan boshqa rahbarning boʻysunuviga oʻtkazish;

davlat organi yoki boshqa tashkilot xodimini manfaatlar toʻqnashuvi yuzaga kelishi mumkin boʻlgan kollegial organ tarkibidan ixtiyoriy ravishda oʻzini oʻzi rad etishi orqali yoki majburan chetlashtirish;

davlat organi yoki boshqa tashkilot xodimining lavozim majburiyatlari yoki xizmat vakolatlari doirasini qayta koʻrib chiqish;

davlat organi yoki boshqa tashkilot xodimining davlat organining yoki boshqa tashkilotning manfaatlar toʻqnashuviga olib kelishi mumkin boʻlgan axborotidan va hujjatlaridan foydalanishiga cheklovlar belgilash;

davlat organi yoki boshqa tashkilot xodimining yakka tartibda qarorlar qabul qilishga doir vakolatlarini qonunchilikka muvofiq amalga oshirishi ustidan kollegial nazoratni taʼminlash;

davlat organining yoki boshqa tashkilotning xodimiga oʻzidagi shaxsiy manfaatdorlikni qonunchilikka muvofiq bartaraf etishi toʻgʻrisida takliflar taqdim etish;

xodim tomonidan oʻzi mehnat (xizmat) faoliyatini amalga oshirayotgan davlat organining yoki boshqa tashkilotning manfaatlariga zid boʻlgan shaxsiy manfaatdorligidan voz kechishi;

davlat organi yoki boshqa tashkilot xodimining shaxsiy manfaatdorligini bartaraf etish choralarini koʻrish mumkin boʻlmagan taqdirda, xodimning roziligi asosida uni avvalgi lavozimiga teng boshqa lavozimga oʻtkazish yoki mehnat shartnomasini (kontraktni) umumiy asoslarda bekor qilish.

Manfaatlar toʻqnashuvini tartibga solish boʻyicha choralar davlat organi yoki boshqa tashkilot xodimining roziligi bilan koʻrilishi kerak.

Davlat organlari yoki boshqa tashkilotlar tomonidan manfaatlar toʻqnashuvini tartibga solishga doir choralarni koʻrish chogʻida biror-bir shaxslarga, guruhlarga yoki tashkilotlarga afzallik, ustunlik berishga yoxud davlat organlarining yoki boshqa tashkilotlarning xodimlarini, shuningdek fuqarolarni kamsitishga yoʻl qoʻyilmaydi.

Davlat organlari yoki boshqa tashkilotlar oʻz xodimi bilan oʻzaro kelishuvga koʻra, manfaatlar toʻqnashuvini tartibga solish yuzasidan qonunchilikda taqiqlanmagan boshqa choralarni ham koʻrishi mumkin.

22-modda. Manfaatlar toʻqnashuvi bilan bogʻliq hujjatlarning maxfiyligini taʼminlash

Manfaatlar toʻqnashuvini tartibga solish va aniqlashda ishtirok etadigan xodimlarga ishonib topshirilgan yoxud ularga kasbiy, xizmat yoki mehnat majburiyatlarini bajarishi munosabati bilan maʼlum boʻlib qolgan shaxslarning shaxsga doir maʼlumotlarini oshkor etishga yoʻl qoʻyilmaydi.

Davlat organi yoki boshqa tashkilot xodimining faoliyatidagi manfaatlar toʻqnashuvini tartibga solish chogʻida shaxsga doir maʼlumotlarni muhofaza qilish shaxsga doir maʼlumotlar toʻgʻrisidagi qonunchilikka muvofiq amalga oshiriladi.

23-modda. Jismoniy va yuridik shaxslarning manfaatlar toʻqnashuvi hollari toʻgʻrisidagi murojaatlari va xabarlarini koʻrib chiqish

Jismoniy va yuridik shaxslarning xodimdagi mavjud yoki ehtimoliy manfaatlar toʻqnashuvi toʻgʻrisida davlat organlariga va boshqa tashkilotlarga kelib tushgan har bir murojaati yoki xabari qonunchilikda belgilangan tartibda va muddatlarda koʻrib chiqiladi hamda tekshiriladi.

Tekshirish davomida aniqlangan manfaatlar toʻqnashuviga yoʻl qoʻyilganligi bilan bogʻliq hollar toʻgʻrisidagi maʼlumotlar odob-axloq komissiyasi tomonidan maxsus boʻlinma taqdim etganidan keyin oʻn ish kuni ichida koʻrib chiqiladi.

Odob-axloq komissiyasi davlat organining yoki boshqa tashkilotning rahbariga manfaatlar toʻqnashuvini bartaraf etish boʻyicha choralarni koʻrish yoxud xodimni tegishli javobgarlikka tortish toʻgʻrisida taklif kiritadi.

24-modda. Manfaatlar toʻqnashuvi toʻgʻrisidagi axborotning hisobini yuritish

Davlat organlari yoki boshqa tashkilotlar Manfaatlar toʻqnashuvini hisobga olish reyestrini yuritadi.

Mavjud yoki ehtimoliy manfaatlar toʻqnashuvlari Manfaatlar toʻqnashuvini hisobga olish reyestriga quyidagi asoslarga koʻra kiritiladi:

davlat organlariga yoki boshqa tashkilotlarga ishga qabul qilishda nomzod tomonidan taqdim etilgan deklaratsiya asosida mavjud manfaatlar toʻqnashuvi aniqlanganda;

davlat organining yoki boshqa tashkilotning xodimi boshqa ishga oʻtkazilgan taqdirda, oʻzidagi mavjud manfaatlar toʻqnashuvi toʻgʻrisidagi axborotni xabar qilganda;

davlat organining yoki boshqa tashkilotning xodimi tomonidan taqdim etiladigan ehtimoliy manfaatlar toʻqnashuvi toʻgʻrisidagi har yilgi deklaratsiya asosida mavjud manfaatlar toʻqnashuvi aniqlanganda;

mavjud manfaatlar toʻqnashuvi toʻgʻrisida xabarnoma taqdim etilganda;

ehtimoliy manfaatlar toʻqnashuvi toʻgʻrisida deklaratsiya taqdim etilganda;

rasmiy elektron maʼlumotlar bazalari orqali davlat organining yoki boshqa tashkilotning xodimida manfaatlar toʻqnashuvi aniqlanganda;

kelib tushgan murojaatga yoki xabarga asosan davlat organining yoki boshqa tashkilotning xodimida manfaatlar toʻqnashuvi mavjudligi tasdiqlanganda;

qonunchilikda belgilangan tartibda oʻtkaziladigan xizmat hamda boshqa turdagi tekshiruvlar natijasida davlat organining yoki boshqa tashkilotning xodimida manfaatlar toʻqnashuvi aniqlanganda.

Manfaatlar toʻqnashuvini hisobga olish reyestriga ushbu moddaning ikkinchi qismida koʻrsatilgan asoslardan tashqari quyidagi maʼlumotlar kiritiladi:

mavjud yoki ehtimoliy manfaatlar toʻqnashuvlarini tartibga solish yuzasidan koʻrilgan choralar toʻgʻrisidagi maʼlumotlar;

manfaatlar toʻqnashuvini oshkor etish chogʻida bila turib yolgʻon yoki notoʻgʻri axborotni taqdim etgan yoxud bunday axborotni yashirgan davlat organining yoki boshqa tashkilotning xodimiga nisbatan koʻrilgan taʼsir choralari toʻgʻrisidagi maʼlumotlar.

Maxsus boʻlinma aniqlangan manfaatlar toʻqnashuvi hollarining hisobi oʻz vaqtida va toʻliq yuritilishi uchun javobgardir.

25-modda. Manfaatlar toʻqnashuvi hollarini tartibga solish uchun koʻrilgan choralarni koʻrib chiqish

Davlat organlarining yoki boshqa tashkilotlarning odob-axloq komissiyasi mavjud yoki ehtimoliy manfaatlar toʻqnashuvlari toʻgʻrisida har yarim yilda xulosa qabul qiladi hamda ularni tartibga solish boʻyicha koʻrilgan choralarning yetarliligini (toʻgʻriligini) koʻrib chiqadi.

Davlat organlarining yoki boshqa tashkilotlarning odob-axloq komissiyasi aniqlangan manfaatlar toʻqnashuvi hollarini maxsus boʻlinma bilan birgalikda tahlil qiladi va davlat organining yoki boshqa tashkilotning xodimlari oʻrtasida tushuntirish ishlarini olib boradi.

5-bob. Yakunlovchi qoidalar

26-modda. Manfaatlar toʻqnashuviga yoʻl qoʻyilgan holda qarorlar qabul qilish yoki bitimlar tuzish

Manfaatlar toʻqnashuviga yoʻl qoʻyilgan holda qabul qilingan qarorlar yoki tuzilgan bitimlar sud tartibida haqiqiy emas deb topiladi.

Manfaatlar toʻqnashuviga yoʻl qoʻyilgan holda qabul qilingan qaror yoki tuzilgan bitim haqiqiy emas deb topilgan taqdirda, ushbu qaror qabul qilinganligi yoki bitim tuzilganligi natijasida olingan foyda bitim boʻyicha olingan hamma narsani qaytarib berish toʻgʻrisida talab qoʻyilmagan holda, sud tartibida davlat daromadiga oʻtkaziladi. Bunda haqiqiy emas deb topilgan bunday bitimning ijrosi bilan bogʻliq xarajatlarning oʻrni manfaatlar toʻqnashuviga yoʻl qoʻygan shaxsning hisobidan qoplanadi.

Manfaatlar toʻqnashuviga yoʻl qoʻyilgan holda qabul qilingan qaror yoki tuzilgan bitim haqiqiy emas deb topilganligi natijasida jismoniy yoki yuridik shaxslarga, shu jumladan davlat organlariga yoki boshqa tashkilotlarga yetkazilgan zarar davlat organining yoki boshqa tashkilotning aybdor xodimlaridan regress tartibida undirib olinishi mumkin.

27-modda. Davlat organlarining yoki boshqa tashkilotlarning manfaatlar toʻqnashuvini tartibga solish boʻyicha qabul qilingan qarorlari ustidan shikoyat qilish

Davlat organining yoki boshqa tashkilotning xodimi manfaatlar toʻqnashuvini tartibga solish yuzasidan davlat organlari yoki boshqa tashkilotlar tomonidan qabul qilingan qarorlar ustidan boʻysunuv tartibida yuqori turuvchi tashkilotga, maxsus vakolatli davlat organiga yoki sudga shikoyat qilishga haqli.

28-modda. Nizolarni hal etish

Davlat organlarining yoki boshqa tashkilotlarning faoliyatidagi manfaatlar toʻqnashuvi bilan bogʻliq munosabatlarni tartibga solish sohasida yuzaga keladigan nizolar qonunchilikda belgilangan tartibda hal etiladi.

29-modda. Manfaatlar toʻqnashuvi toʻgʻrisidagi qonunchilikni buzganlik uchun javobgarlik

Manfaatlar toʻqnashuvi toʻgʻrisidagi qonunchilikni buzganlikda aybdor shaxslar belgilangan tartibda javobgar boʻladi.

30-modda. Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish

1. Oʻzbekiston Respublikasining 1994-yil 22-sentabrda qabul qilingan 2015-XII-sonli Qonuni bilan tasdiqlangan Oʻzbekiston Respublikasining Maʼmuriy javobgarlik toʻgʻrisidagi kodeksiga (Oʻzbekiston Respublikasi Oliy Kengashining Axborotnomasi, 1995-yil, № 3, 6-modda; Oʻzbekiston Respublikasi Oliy Majlisining Axborotnomasi, 1995-yil, № 9, 193-modda, № 12, 269-modda; 1996-yil, № 5-6, 69-modda, № 9, 144-modda; 1997-yil, № 2, 56-modda, № 4-5, 126-modda, № 9, 241-modda; 1998-yil, № 3, 38-modda, № 5-6, 102-modda, № 9, 181-modda; 1999-yil, № 1, 20-modda, № 5, 124-modda, № 9, 229-modda; 2000-yil, № 5-6, 153-modda, № 7-8, 217-modda; 2001-yil, № 1-2, 23-modda, № 9-10, 165, 182-moddalar; 2002-yil, № 1, 20-modda, № 9, 165-modda; 2003-yil, № 1, 8-modda, № 5, 67-modda, № 9-10, 149-modda; 2004-yil, № 1-2, 18-modda, № 5, 90-modda, № 9, 171-modda; 2005-yil, № 1, 18-modda; Oʻzbekiston Respublikasi Oliy Majlisi palatalarining Axborotnomasi, 2005-yil, № 9, 312-modda, № 12, 413, 417, 418-moddalar; 2006-yil, № 6, 261-modda, № 9, 498-modda, № 10, 536-modda, № 12, 656, 659-moddalar; 2007-yil, № 4, 158, 159, 164, 165-moddalar, № 9, 416, 421-moddalar, № 12, 596, 604, 607-moddalar; 2008-yil, № 4, 181, 189, 192-moddalar, № 9, 486, 488-moddalar, № 12, 640, 641-moddalar; 2009-yil, № 1, 1-modda, № 9, 334, 335, 337-moddalar, № 10, 380-modda, № 12, 462, 468, 470, 472, 474-moddalar; 2010-yil, № 5, 175, 179-moddalar, № 6, 231-modda, № 9, 335, 339, 341-moddalar, № 10, 380-modda, № 12, 468, 473, 474-moddalar; 2011-yil, № 1, 1-modda, № 4, 104, 105-moddalar, № 9, 247, 252-moddalar, № 12/2, 365-modda; 2012-yil, № 4, 108-modda, № 9/1, 242-modda, № 12, 336-modda; 2013-yil, № 4, 98-modda, № 10, 263-modda; 2014-yil, № 1, 2-modda, № 5, 130-modda, № 9, 244-modda, № 12, 341, 343-moddalar; 2015-yil, № 6, 228-modda, № 8, 310, 312-moddalar, № 12, 452-modda; 2016-yil, № 1, 2-modda, № 4, 125-modda, № 9, 276-modda, № 12, 383, 385-moddalar; 2017-yil, № 4, 137-modda, № 6, 300-modda, № 9, 510-modda, № 10, 605-modda; 2018-yil, № 1, 1, 4, 5-moddalar, № 4, 224-modda, № 7, 430, 431, 432-moddalar, № 10, 671, 673, 679-moddalar; 2019-yil, № 1, 1, 3, 5-moddalar, № 2, 47-modda, № 3, 161, 165, 166-moddalar, № 5, 259, 261, 267, 268-moddalar, № 7, 386-modda, № 8, 469, 471-moddalar, № 9, 591, 592-moddalar, № 10, 674, 676-moddalar, № 11, 787, 791-moddalar, № 12, 880, 891-moddalar; 2020-yil, № 1, 4-modda, № 3, 203, 204-moddalar, № 7, 449-modda, № 9, 539, 540-moddalar, № 10, 593, 596-moddalar, № 11, 651-modda, № 12, 691-modda; 2021-yil, № 1, 5, 7, 12, 13, 14-moddalar, № 2, 142-modda, № 3, 217-modda, № 4, 290, 293-moddalar, 4-songa ilova, № 8, 800, 802, 803-moddalar, № 9, 903-modda, № 10, 966, 967, 968, 973-moddalar, № 11, 1066-modda; 2022-yil, № 1, 1, 2-moddalar, № 2, 80, 81-moddalar, № 3, 215, 216-moddalar, № 4, 337-modda, № 5, 464, 465, 466, 467-moddalar, № 8, 787-modda) quyidagi oʻzgartish va qoʻshimchalar kiritilsin:

1) 1758-moddaning toʻrtinchi qismidagi “va manfaatlar toʻqnashuvi” degan soʻzlar chiqarib tashlansin;

2) quyidagi mazmundagi 1934-modda bilan toʻldirilsin:

“1934-modda. Manfaatlar toʻqnashuvi toʻgʻrisidagi qonunchilik talablarini bajarmaslik

Davlat organining yoki boshqa tashkilotning mansabdor shaxsi yoki xodimi tomonidan manfaatlar toʻqnashuvi toʻgʻrisidagi qonunchilikda nazarda tutilgan manfaatlar toʻqnashuvi mavjudligi haqida xabar bermaslik, —

bazaviy hisoblash miqdorining uch baravaridan besh baravarigacha miqdorda jarima solishga sabab boʻladi.

Xuddi shunday huquqbuzarlik maʼmuriy jazo chorasi qoʻllanilganidan keyin bir yil davomida takroran sodir etilgan boʻlsa, —

bazaviy hisoblash miqdorining besh baravaridan oʻn baravarigacha miqdorda jarima solishga sabab boʻladi.

Davlat organining yoki boshqa tashkilotning mansabdor shaxsiga maʼlum boʻlib qolgan, manfaatlar toʻqnashuvi toʻgʻrisidagi qonunchilikda nazarda tutilgan mavjud yoki ehtimoliy manfaatlar toʻqnashuvini tartibga solish yuzasidan choralar koʻrmaslik, —

bazaviy hisoblash miqdorining besh baravaridan oʻn baravarigacha miqdorda jarima solishga sabab boʻladi.

Ushbu moddaning uchinchi qismida nazarda tutilgan huquqbuzarlik maʼmuriy jazo chorasi qoʻllanilganidan keyin bir yil davomida takroran sodir etilgan boʻlsa, —

bazaviy hisoblash miqdorining oʻn baravaridan oʻn besh baravarigacha miqdorda jarima solishga sabab boʻladi.

Ushbu moddaning birinchi va uchinchi qismlarida nazarda tutilgan huquqbuzarliklar davlat xaridlari sohasida sodir etilgan boʻlsa, —

mansabdor shaxslarga bazaviy hisoblash miqdorining yigirma baravaridan oʻttiz baravarigacha miqdorda jarima solishga sabab boʻladi”;

3) 245-moddaning birinchi qismi “1933” raqamidan keyin “1934” raqami bilan toʻldirilsin;

4) 24510-moddaning birinchi qismidagi “2157-moddasida” degan soʻzlar “1934 va 2157-moddalarida” degan soʻzlar bilan almashtirilsin.

2. Oʻzbekiston Respublikasining 1995-yil 21-dekabrda qabul qilingan 163-I-sonli va 1996-yil 29-avgustda qabul qilingan 256-I-sonli qonunlari bilan tasdiqlangan Oʻzbekiston Respublikasining Fuqarolik kodeksiga (Oʻzbekiston Respublikasi Oliy Majlisining Axborotnomasi, 1996-yil, 2-songa ilova, № 11-12; 1997-yil, № 2, 56-modda, № 9, 241-modda; 1998-yil, № 5-6, 102-modda; 1999-yil, № 1, 20-modda, № 9, 229-modda; 2001-yil, № 1-2, 23-modda, № 9-10, 182-modda; 2002-yil, № 1, 20-modda, № 9, 165-modda; 2003-yil, № 1, 8-modda, № 5, 67-modda; 2004-yil, № 1-2, 18-modda, № 5, 90-modda, № 9, 171-modda; Oʻzbekiston Respublikasi Oliy Majlisi palatalarining Axborotnomasi, 2006-yil, № 4, 154-modda, № 9, 494, 498-moddalar; 2007-yil, № 1, 3, 5-moddalar, № 4, 156, 164-moddalar, № 8, 367-modda, № 9, 416-modda, № 12, 598, 608-moddalar; 2008-yil, № 4, 192-modda, № 12, 640-modda; 2009-yil, № 9, 337-modda; 2010-yil, № 9, 335, 337, 340-moddalar; 2011-yil, № 12/2, 363, 364, 365-moddalar; 2012-yil, № 4, 106, 109-moddalar, № 12, 336-modda; 2013-yil, № 10, 263-modda; 2014-yil, № 5, 130-modda, № 12, 343-modda; 2015-yil, № 8, 310, 312-moddalar; 2016-yil, № 4, 125-modda; 2017-yil, № 4, 137-modda, № 9, 510-modda, № 12, 773-modda; 2018-yil, № 1, 4-modda, № 4, 224-modda, № 7, 433-modda, № 10, 673-modda; 2019-yil, № 3, 161, 166-moddalar, № 5, 267-modda, № 10, 671-modda, № 12, 880, 886-moddalar; 2020-yil, № 1, 3, 4-moddalar, № 10, 593-modda; 2021-yil, 4-songa ilova, № 8, 801-modda, № 10, 968-modda; 2022-yil, № 2, 79-modda, № 3, 217, 218-moddalar, № 4, 3-modda, № 5, 46-modda, № 6, 570, 577-moddalar) quyidagi qoʻshimchalar kiritilsin:

1) 114-modda quyidagi mazmundagi uchinchi va toʻrtinchi qismlar bilan toʻldirilsin:

“Manfaatlar toʻqnashuviga yoʻl qoʻyilgan holda tuzilgan bitim haqiqiy emas deb topilgan taqdirda, ushbu bitimni tuzish natijasida olingan foyda bitim boʻyicha olingan hamma narsani qaytarib berish toʻgʻrisida talab qoʻyilmagan holda, sud tartibida davlat daromadiga oʻtkaziladi. Bunday bitimni ijro etish bilan bogʻliq xarajatlarning oʻrni manfaatlar toʻqnashuviga yoʻl qoʻygan shaxsning hisobidan qoplanadi.

Korrupsiyaga yoʻl qoʻyilgan holda tuzilgan bitim haqiqiy emas deb topilgan taqdirda, bunday bitimni tuzish natijasida jismoniy va yuridik shaxslarga yetkazilgan zararning oʻrni aybdor shaxslar tomonidan sud tartibida qoplanadi”;

2) 116-modda quyidagi mazmundagi ikkinchi qism bilan toʻldirilsin:

“Korrupsiyaga, shu jumladan manfaatlar toʻqnashuviga yoʻl qoʻyilgan holda tuzilgan bitim sud tartibida haqiqiy emas deb topiladi”.

3. Oʻzbekiston Respublikasining 2017-yil 3-yanvarda qabul qilingan “Korrupsiyaga qarshi kurashish toʻgʻrisida”gi OʻRQ-419-sonli Qonuni (Oʻzbekiston Respublikasi Oliy Majlisi palatalarining Axborotnomasi, 2017-yil, № 1, 1-modda; 2019-yil, № 1, 5-modda, № 5, 267-modda; 2021-yil, 4-songa ilova) 3-moddasining toʻrtinchi xatboshisi quyidagi tahrirda bayon etilsin:

“manfaatlar toʻqnashuvi — shaxsning shaxsiy (bevosita yoki bilvosita) manfaatdorligi uning oʻz lavozim yoki xizmat majburiyatlarini lozim darajada bajarishiga taʼsir koʻrsatayotgan yoxud taʼsir koʻrsatishi mumkin boʻlgan hamda shaxsiy manfaatdorlik bilan fuqarolarning, tashkilotlarning, jamiyatning yoki davlatning huquqlari, qonuniy manfaatlari oʻrtasida qarama-qarshilik yuzaga kelayotgan (mavjud manfaatlar toʻqnashuvi) yoki yuzaga kelishi mumkin boʻlgan (ehtimoliy manfaatlar toʻqnashuvi) vaziyat”.

31-modda. Ushbu Qonunning ijrosini, yetkazilishini, mohiyati va ahamiyati tushuntirilishini taʼminlash

Oʻzbekiston Respublikasi Korrupsiyaga qarshi kurashish agentligi, Adliya vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

32-modda. Qonunchilikni ushbu Qonunga muvofiqlashtirish

Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

respublika ijro etuvchi hokimiyat organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

33-modda. Ushbu Qonunning kuchga kirishi

Ushbu Qonun rasmiy eʼlon qilingan kundan eʼtiboran olti oy oʻtgach kuchga kiradi.

Oʻzbekiston Respublikasining Prezidenti Sh. MIRZIYOYEV

Toshkent sh.,

2024-yil 5-iyun,

OʻRQ-931-son