Organik mahsulotlar toʻgʻrisida (O‘RQ-766-son)

25.04.2022

Oʻzbekiston Respublikasining Qonuni

Qonunchilik palatasi tomonidan 2021-yil 3-dekabrda qabul qilingan Senat tomonidan 2022-yil 17-martda maʼqullangan

1-bob. Umumiy qoidalar

1-modda. Ushbu Qonunning maqsadi va qoʻllanilish sohasi

Ushbu Qonunning maqsadi organik mahsulotlar (organik mahsulotlarni ishlab chiqarish, qayta ishlash, saqlash, transportda tashish, tamgʻalash va realizatsiya qilish, shuningdek muvofiqlikni baholash va avtorizatsiyalashtirish) sohasidagi munosabatlarni tartibga solishdan iborat.

Ushbu Qonunning amal qilishi shaxsiy isteʼmol uchun ishlab chiqarilgan organik mahsulotlarga nisbatan tatbiq etilmaydi.

2-modda. Organik mahsulotlar toʻgʻrisidagi qonunchilik

Organik mahsulotlar toʻgʻrisidagi qonunchilik ushbu Qonun va boshqa qonunchilik hujjatlaridan iboratdir.

Agar Oʻzbekiston Respublikasining xalqaro shartnomasida Oʻzbekiston Respublikasining organik mahsulotlar toʻgʻrisidagi qonunchiligida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.

3-modda. Asosiy tushunchalar

Ushbu Qonunda quyidagi asosiy tushunchalar qoʻllaniladi:

avtorizatsiyalashtirish — muvofiqlikni baholash boʻyicha akkreditatsiya qilingan organ sifatida faoliyatni amalga oshirishga ushbu Qonunda va texnik jihatdan tartibga solish sohasidagi organik mahsulotlarga doir boshqa normativ hujjatlarda belgilangan talablarga rioya etilishi uchun masʼul boʻlgan vakolatli davlat organi tomonidan ruxsatnoma berish;

inspeksiya nazorati — organik mahsulotlarning organik mahsulotlar toʻgʻrisidagi qonunchilikda va texnik jihatdan tartibga solish sohasidagi normativ hujjatlarda belgilangan talablarga muvofiqligini baholash tartib-taomili;

organik mahsulotlar — ishlab chiqarish, qayta ishlash, saqlash, transportda tashish va realizatsiya qilishning barcha bosqichlarida organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablariga javob beradigan ishlab chiqarish texnologiyalarini qoʻllagan holda olingan sertifikatlashtirilgan mahsulotlar;

organik mahsulotlarni ishlab chiqarish — organik jihatdan muvofiqlik sertifikatini olish uchun rioya etilishi zarur boʻlgan organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablariga javob beradigan ishlab chiqarish texnologiyalarini qoʻllagan holda mahsulotlarni ishlab chiqarishga va qayta ishlashga doir faoliyat;

organik mahsulotlarni ishlab chiqaruvchi — organik mahsulotlarni ishlab chiqarishga doir faoliyatni amalga oshiruvchi jismoniy yoki yuridik shaxs.

4-modda. Organik mahsulotlarni ishlab chiqarish sohasidagi asosiy prinsiplar

Organik mahsulotlarni ishlab chiqarish sohasidagi asosiy prinsiplar quyidagilardan iborat:

fuqarolar hayoti va sogʻligʻini saqlashning, shuningdek atrof-muhitni muhofaza qilishning ustuvorligi;

organik mahsulotlarni ishlab chiqarish yoʻnalishini tanlashdagi ixtiyoriylik;

organik mahsulotlar toʻgʻrisidagi axborotning shaffofligi va ochiqligi;

qayta tiklanadigan tabiiy resurslardan foydalanish;

atrof-muhitni muhofaza qilish va ekologik xavfsizlikni taʼminlash.

2-bob. Organik mahsulotlar sohasini davlat tomonidan tartibga solish

5-modda. Oʻzbekiston Respublikasi Vazirlar Mahkamasining organik mahsulotlar sohasidagi vakolatlari

Oʻzbekiston Respublikasi Vazirlar Mahkamasi:

organik mahsulotlar sohasida yagona davlat siyosati amalga oshirilishini taʼminlaydi;

organik mahsulotlarni ishlab chiqarishni rivojlantirishga qaratilgan davlat dasturlarini tasdiqlaydi va ularning amalga oshirilishini taʼminlaydi;

organik mahsulotlarni ishlab chiqarish, qayta ishlash, saqlash, transportda tashish va realizatsiya qilishni rivojlantirish uchun qulay huquqiy hamda iqtisodiy shart-sharoitlar yaratadi;

organik mahsulotlarni ishlab chiqarish chogʻida yoʻl qoʻyiladigan ifloslanish normalarini va organik mahsulotlarning, shu jumladan organik ekinlarning (oʻsimliklarning) kasalliklari xavfsizligiga doir talablarni belgilaydi hamda zararkunandalardan himoya qilish uchun foydalaniladigan biologik va kimyoviy moddalarning organik mahsulotlar tarkibidagi qoldiqlarining yoʻl qoʻyiladigan miqdorini belgilaydi;

organik mahsulotlarni Oʻzbekiston Respublikasi hududiga olib kirishga va uning hududidan olib chiqishga, shuningdek organik mahsulotlarni ishlab chiqarish, qayta ishlash, saqlash, transportda tashish, realizatsiya qilishga hamda utilizatsiya qilishga doir talablarni belgilaydi;

organik mahsulotlar sohasida xalqaro hamkorlikni amalga oshiradi.

Oʻzbekiston Respublikasi Vazirlar Mahkamasi qonunchilikka muvofiq boshqa vakolatlarni ham amalga oshirishi mumkin.

6-modda. Organik mahsulotlar sohasidagi vakolatli davlat organi

Oʻzbekiston Respublikasi Qishloq xoʻjaligi vazirligi organik mahsulotlar sohasidagi vakolatli davlat organidir (bundan buyon matnda vakolatli davlat organi deb yuritiladi).

Vakolatli davlat organi:

organik mahsulotlar sohasida yagona davlat siyosatini amalga oshiradi;

organik mahsulotlar sohasidagi davlat dasturlarini va boshqa dasturlarni ishlab chiqadi hamda amalga oshiradi;

davlat siyosati va uning ijrosini taʼminlashga qaratilgan davlat dasturlarining maqsadlari va vazifalariga muvofiq barqaror rivojlanish konsepsiyasi prinsiplariga asoslangan organik mahsulotlarni ishlab chiqarish tizimi yaratilishini taʼminlaydi;

organik mahsulotlarni ishlab chiqarishga, shuningdek bu jarayon doirasidagi ishlarni tashkil etishga doir faoliyatni tarmoqlararo muvofiqlashtirishni amalga oshiradi;

organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablariga, shu jumladan sertifikatlashtirilgan urugʻlardan, ekish materiallaridan, organik oʻgʻitlardan va oʻsimliklarni himoya qilish vositalaridan, ozuqa xom ashyosidan, ozuqaviy qoʻshimchalardan, uy hayvonlarini, parrandalarni, asalarilarni parvarishlash chogʻida foydalaniladigan dori vositalaridan, dezinfeksiyalovchi va tozalovchi vositalardan, oziq-ovqat qoʻshimchalaridan va texnologik komponentlardan organik mahsulotlarni ishlab chiqarish chogʻida foydalanish bilan bogʻliq talablarga rioya etilishining monitoringini oʻtkazadi;

muvofiqlikni baholash organlari faoliyatini avtorizatsiyalashtirishni amalga oshiradi;

mulkchilik shaklidan qatʼi nazar, boshqa tashkilotlardan organik mahsulotlarni ishlab chiqarish toʻgʻrisidagi zarur axborotni soʻraydi va oladi;

inson hayotining va sogʻligʻining xavfsizligi, shuningdek atrof-muhitni muhofaza qilish talablariga javob beradigan innovatsion agrotexnologik usullar hamda texnologiyalardan, uslublar va jarayonlardan foydalangan holda tadbirkorlik faoliyati subyektlariga organik mahsulotlarni ishlab chiqarish uchun qulay shart-sharoitlar yaratadi;

organik mahsulotlarni ishlab chiqarish, qayta ishlash masalalari boʻyicha oʻqitish va maslahat xizmatlari koʻrsatadi;

organik mahsulotlarni ishlab chiqarish maqsadlari va istiqbollari toʻgʻrisidagi bilimlarni targʻib qilishga doir ishlarni amalga oshiradi;

organik mahsulotlarni ishlab chiqaruvchilar reyestrini shakllantirish va yuritish tartibini belgilaydi;

organik mahsulotlarni ishlab chiqarishni ragʻbatlantirish boʻyicha chora-tadbirlarni ishlab chiqadi va ularning bajarilishi monitoringini amalga oshiradi;

organik mahsulotlar sohasida kadrlarni tayyorlash, qayta tayyorlash va ularning malakasini oshirish tizimini takomillashtirish choralarini koʻradi;

organik mahsulotlar sohasida davlat-xususiy sheriklikni qoʻllab-quvvatlaydi va rivojlantiradi;

organik mahsulotlar sohasida innovatsion usullar va texnologiyalarni ishlab chiqish boʻyicha maqsadli tadqiqotlar oʻtkazilishini qoʻllab-quvvatlaydi;

tashqi va ichki bozorlarda organik mahsulotlarni ishlab chiqarish, qayta ishlash, saqlash, transportda tashish va realizatsiya qilishni rivojlantirishni qoʻllab-quvvatlaydi;

organik mahsulotlar sohasida xalqaro hamkorlikni amalga oshiradi.

Vakolatli davlat organi qonunchilikka muvofiq boshqa vakolatlarni ham amalga oshirishi mumkin.

7-modda. Oʻzbekiston Respublikasi Sanitariya-epidemiologik osoyishtalik va jamoat salomatligi xizmatining organik mahsulotlar sohasidagi vakolatlari

Oʻzbekiston Respublikasi Sanitariya-epidemiologik osoyishtalik va jamoat salomatligi xizmati:

organik mahsulotlarning xavfsizligi sohasidagi xalqaro standartlar va tavsiyalar bilan uygʻunlashgan sanitariya qoidalarini, normalarini va gigiyenik normativlarni ishlab chiqarishga joriy etilishini taʼminlaydi;

texnik jihatdan tartibga solish sohasidagi normativ hujjatlarning organik mahsulotlar xavfsizligiga muvofiqligi yuzasidan ekspertizasini oʻtkazadi.

Oʻzbekiston Respublikasi Sanitariya-epidemiologik osoyishtalik va jamoat salomatligi xizmati qonunchilikka muvofiq boshqa vakolatlarni ham amalga oshirishi mumkin.

8-modda. Oʻzbekiston Respublikasi Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasining organik mahsulotlar sohasidagi vakolatlari

Oʻzbekiston Respublikasi Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasi:

qishloq xoʻjaligida organik chorvachilikni rivojlantirish sohasidagi xalqaro standartlar va tavsiyalar bilan uygʻunlashgan veterinariya, veterinariya-sanitariya qoidalari va normalarini ishlab chiqarishga joriy etilishini taʼminlaydi;

ishlab chiqaruvchilar tomonidan organik mahsulotlarni, chorvachilikka oid organik mahsulotlarni hamda kelib chiqishi hayvonlar va oʻsimliklarga mansub boʻlgan xom ashyoni yetishtirish chogʻida veterinariya toʻgʻrisidagi qonunchilikda belgilangan veterinariya-sanitariya talablariga rioya etilishi ustidan nazoratni amalga oshiradi.

Oʻzbekiston Respublikasi Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasi qonunchilikka muvofiq boshqa vakolatlarni ham amalga oshirishi mumkin.

9-modda. Oʻzbekiston Respublikasi Investitsiyalar va tashqi savdo vazirligi huzuridagi Oʻzbekiston texnik jihatdan tartibga solish agentligining organik mahsulotlar sohasidagi vakolatlari

Oʻzbekiston Respublikasi Investitsiyalar va tashqi savdo vazirligi huzuridagi Oʻzbekiston texnik jihatdan tartibga solish agentligi oʻz vakolatlari doirasida:

muvofiqlikni baholash organlarini akkreditatsiya qilishni amalga oshiradi va ularga akkreditatsiya toʻgʻrisida guvohnoma beradi;

organik mahsulotlarning milliy muvofiqlik belgisi shakli va oʻlchamini tasdiqlaydi;

texnik jihatdan tartibga solish sohasidagi normativ-huquqiy hujjatlarni, normativ hujjatlarni ishlab chiqish va tizimli ravishda joriy etishda, shuningdek organik mahsulotlar sohasidagi xalqaro standartlarni respublikada joriy etishga tizimli ravishda koʻmaklashadi;

muvofiqlikni baholash organlarining mutaxassislari uchun inspeksiya nazoratini oʻtkazish doirasida yoki sertifikatlashtirish jarayonida malaka oshirish boʻyicha tadbirlarni tashkil etadi.

Oʻzbekiston Respublikasi Investitsiyalar va tashqi savdo vazirligi huzuridagi Oʻzbekiston texnik jihatdan tartibga solish agentligi qonunchilikka muvofiq boshqa vakolatlarni ham amalga oshirishi mumkin.

10-modda. Mahalliy ijro etuvchi hokimiyat organlarining organik mahsulotlar sohasidagi vakolatlari

Mahalliy ijro etuvchi hokimiyat organlari:

qishloq xoʻjaligi korxonalariga va qayta ishlash korxonalariga organik mahsulotlarni ishlab chiqarish, qayta ishlash, saqlash, transportda tashish va realizatsiya qilish uchun yer uchastkalari ajratilishida amaliy yordam koʻrsatadi;

organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablariga javob bermaydigan mahsulotlarning organik mahsulotlar sifatida realizatsiya qilinishiga yoʻl qoʻymaslik choralarini koʻradi;

aholini organik mahsulotlar yetishtirish toʻgʻrisidagi axborot bilan taʼminlaydi.

Mahalliy ijro etuvchi hokimiyat organlari qonunchilikka muvofiq boshqa vakolatlarni ham amalga oshirishi mumkin.

11-modda. Muvofiqlikni baholash organining vakolatlari

Muvofiqlikni baholash organi quyidagi vakolatlarga ega:

xalqaro standartlarga muvofiq organik mahsulotlarni ishlab chiqarishni sertifikatlashtirish chogʻida organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablariga rioya etilishini taʼminlaydi;

organik mahsulotlarni ishlab chiqarishni sertifikatlashtirish toʻgʻrisidagi yoki organik mahsulotlar haqidagi qonunchilik hamda texnik jihatdan tartibga solish sohasidagi normativ hujjatlar talablariga rioya etilmagan taqdirda sertifikatlashtirishni rad etish toʻgʻrisida qarorlar qabul qiladi;

organik mahsulotlarni ishlab chiqaruvchilarga organik mahsulotlarni ishlab chiqarish uchun berilgan yer uchastkalaridagi tuproq, suv, urugʻlar, koʻchatlardan va ekish materialidan, shuningdek oziq-ovqat mahsulotlaridan va ozuqalardan namunalar olishni amalga oshiradi;

qonunchilikda belgilangan tartibda organik jihatdan muvofiqlik sertifikatini beradi, uning amal qilishini toʻxtatib turadi va ushbu sertifikatni bekor qiladi.

Muvofiqlikni baholash organi qonunchilikka muvofiq boshqa vakolatlarni ham amalga oshirishi mumkin.

Muvofiqlikni baholash organi organik mahsulotlarni ishlab chiqarishni sertifikatlashtirish uchun zarur boʻlgan hujjatlarni organik mahsulotlarni ishlab chiqaruvchidan soʻrab olish huquqiga ega.

12-modda. Organik mahsulotlar sohasini davlat tomonidan qoʻllab-quvvatlash

Organik mahsulotlar sohasini davlat tomonidan qoʻllab-quvvatlash quyidagi yoʻllar bilan amalga oshiriladi:

organik mahsulotlarni ishlab chiqarish, qayta ishlash, saqlash, transportda tashish va realizatsiya qilishni qoʻllab-quvvatlash hamda rivojlantirishni taʼminlash boʻyicha aniq chora-tadbirlarni oʻz ichiga olgan qisqa muddatli, oʻrta muddatli va uzoq muddatli davlat dasturlarini qabul qilish hamda amalga oshirish uchun qulay shart-sharoitlar yaratish;

organik mahsulotlar ishlab chiqarishga oʻtkazilgan qishloq xoʻjaligi ekinlarini yetishtirishning oʻziga xos xususiyatlarini hisobga olgan holda sertifikatlashtirilgan organik mahsulotlarni ishlab chiqarish uchun subsidiyalar ajratish;

organik mahsulotlar sohasida innovatsion uslublar va texnologiyalarning, shuningdek ilgʻor tajribalarning joriy etilishini ragʻbatlantirish;

organik mahsulotlarni ishlab chiqaruvchilarga organik mahsulotlarni ishlab chiqarishni moliyalashtirishda, axborotga oid, maslahat va sertifikatlashtirish xizmatlari koʻrsatishda koʻmaklashish;

organik mahsulotlar ishlab chiqarishni rivojlantirish va sinov loyihalarini amalga oshirish boʻyicha davlat va xalqaro grant dasturlari doirasida koʻmaklashish;

organik mahsulotlar toifasiga kirmaydigan mahsulotlarni ishlab chiqaruvchilarga organik mahsulotlarni ishlab chiqarishga oʻtish chogʻida subsidiyalar berish.

3-bob. Organik mahsulotlarni ishlab chiqaruvchilarning huquq va majburiyatlari, ular faoliyatining kafolatlari

13-modda. Organik mahsulotlarni ishlab chiqaruvchilarning huquqlari

Organik mahsulotlarni ishlab chiqaruvchilar quyidagi huquqlarga ega:

organik mahsulotlarni ishlab chiqarish, qayta ishlash, saqlash, transportda tashish va realizatsiya qilish chogʻida oʻz firma nomidan, tovar belgisidan va xizmat koʻrsatish belgisidan foydalanish;

organik mahsulotlarni ishlab chiqarish, qayta ishlash, saqlash, transportda tashish va realizatsiya qilish uchun zarur boʻlgan xizmatlar (ishlar) turlarini, shu jumladan muvofiqlikni baholash organlarini va maslahat xizmatlari koʻrsatuvchi tashkilotlarni mustaqil ravishda tanlash.

Organik mahsulotlarni ishlab chiqaruvchilar qonunchilikka muvofiq boshqa huquqlarga ham ega boʻlishi mumkin.

14-modda. Organik mahsulotlarni ishlab chiqaruvchilarning majburiyatlari

Organik mahsulotlarni ishlab chiqaruvchilar organik mahsulotlarni ishlab chiqarish, qayta ishlash, saqlash, transportda tashish, tamgʻalash va realizatsiya qilish chogʻida organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablariga rioya etishi shart.

15-modda. Organik mahsulotlarni ishlab chiqaruvchilar faoliyatining kafolatlari

Organik mahsulotlarni ishlab chiqaruvchilarga faoliyatning quyidagi kafolatlari beriladi:

organik mahsulotlarni ishlab chiqarish uchun ajratilgan yer uchastkalarida qishloq xoʻjaligi ekinlarini joylashtirishni ilmiy asoslangan almashlab ekish sxemalariga muvofiq, texnik jihatdan tartibga solish sohasidagi normativ-huquqiy hujjatlarni, shuningdek normativ hujjatlar talablarini hisobga olgan holda amalga oshirish;

organik mahsulotlarni ishlab chiqarish uchun ajratilgan yer uchastkalarida qishloq xoʻjaligi ekinlarini erkin joylashtirish.

4-bob. Organik mahsulotlarga doir umumiy talablar

16-modda. Organik mahsulotlarni ishlab chiqarishga oʻtish shartlari

Organik mahsulotlarni ishlab chiqarishga oʻtish shartlari quyidagilardan iborat:

organik mahsulotlarni ishlab chiqaruvchi va muvofiqlikni baholash organi oʻrtasida organik mahsulotlarning muvofiqligini baholash toʻgʻrisida shartnoma tuzish;

mahsulotlarni ishlab chiqarish jarayonini organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablariga muvofiqlashtirish;

organik mahsulotlarni ishlab chiqarish organik mahsulotlar toifasiga kirmaydigan mahsulotlarni ishlab chiqarishdan alohida tarzda amalga oshiriladi;

oʻtish davrida ishlab chiqarilgan mahsulotlarni “oʻtish davridagi organik mahsulotlar” sifatida tamgʻalash va realizatsiya qilish.

Organik mahsulotlar toifasiga kirmaydigan mahsulotlarni ishlab chiqarishdan organik mahsulotlarni ishlab chiqarishga oʻtish chogʻida oʻtish davri belgilanib, mahsulotlarni ishlab chiqaruvchi tomonidan bu davr ichida organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablarining bajarilishi taʼminlanadi.

17-modda. Organik mahsulotlarni ishlab chiqarishga doir talablar

Organik mahsulotlarni ishlab chiqarishga nisbatan quyidagi talablar qoʻyiladi:

sogʻlom hayvonlar va oʻsimliklardan, xavfsiz mahsulotlardan hamda kelib chiqishi hayvonlar va oʻsimliklarga mansub boʻlgan xom ashyodan foydalanish;

organik mahsulotlarni ishlab chiqarish chogʻida organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablariga muvofiq boʻlgan texnologiyalardan foydalanish;

tuproq unumdorligini saqlash, tiklash va oshirish;

ishlab chiqarish uchun organik mahsulotlarning muayyan turini tanlash chogʻida ekologik tizimlarni saqlash;

qayta tiklanadigan tabiiy resurslardan, shu jumladan kelib chiqishi oʻsimliklar va hayvonlarga mansub boʻlgan mahsulotlardan hamda chiqindilardan organik mahsulotlar toʻgʻrisidagi qonunchilik talablariga muvofiq foydalanish;

qayta tiklanmaydigan tabiiy resurslardan foydalanishni qisqartirish;

inson sogʻligʻiga, oʻsimliklarga va hayvonlarga zarar yetkazmaydigan, atrof-muhit ifloslanishining oldini oladigan yoki uning oqibatlarini bartaraf etadigan texnologiyalardan foydalanish;

texnologik jarayonlarni sifatli bajarish uchun texnik jihatdan tartibga solish sohasidagi normativ hujjatlarda ruxsat etilgan normalarda oziq-ovqat qoʻshimchalaridan, mikroelementlardan foydalanish;

oʻsimliklarni himoya qilish boʻyicha tegishli choralarni koʻrish, shu jumladan almashlab ekishga, kasalliklarga, zararkunandalarga va begona oʻtlarga chidamli boʻlgan oʻsimliklar turlarini hamda navlarini tanlash chogʻida mexanik, biologik va fizik usullarni qoʻllash;

mahalliy sharoitlarga moslashgan, chidamli oʻsimlik turlarini, navlarini va hayvonlar zotlarini tanlash;

chorvachilikda organik mahsulotlarni ishlab chiqarish uchun kelib chiqishi tabiiy boʻlgan moddalardan olingan ingrediyentlardan iborat ozuqalarni va ozuqaviy qoʻshimchalarni qoʻllash;

ichimlik suvi uchun qonunchilikda belgilangan talablarga javob beradigan suvdan organik mahsulotlar ishlab chiqarish chogʻida ingrediyent sifatida foydalanish;

ayni bir turdagi organik va noorganik ingrediyentlarni bitta organik mahsulotga aralashtirmaslik.

Organik mahsulotlarni ishlab chiqarish chogʻida quyidagilar taqiqlanadi:

sintetik moddalar, pestitsidlar, gormonlar, antibiotiklardan va kimyoviy oziq-ovqat qoʻshimchalaridan foydalanish;

tuproqdan foydalanmasdan oʻsimlik mahsulotlarini yetishtirish usullarini qoʻllash;

ionlashtiruvchi nurlanishdan (manbalardan) foydalanish;

tabiiy holda oʻsadigan oʻsimliklarga ishlov berishning kimyoviy usullaridan foydalanish;

oqova suvlar choʻkmasidan, septik chiqindilardan hamda inson hayotiga va faoliyatiga doir boshqa chiqindilardan tarkib topgan moddalardan oʻgʻit sifatida foydalanish;

chiqindilardan, kimyoviy va radioaktiv moddalardan ifloslangan yer uchastkalaridan, suv obyektlaridan va (yoki) ularning qismlaridan foydalanish;

embrionlarni transplantatsiya qilishni, klonlashtirishni va genga oid muhandislik usullarini, gen-muhandislik-modifikatsiya qilingan hamda transgen organizmlarni qoʻllash, shuningdek gen-muhandislik-modifikatsiya qilingan va transgen organizmlardan foydalangan holda tayyorlangan mahsulotlarni qoʻllash.

Organik mahsulotlarning ayrim turlarini ishlab chiqarishga, shu jumladan ularni parallel ravishda va bir vaqtning oʻzida ishlab chiqarish shart-sharoitlariga doir alohida talablar texnik jihatdan tartibga solish sohasidagi normativ hujjatlarda belgilanadi.

18-modda. Organik mahsulotlarni Oʻzbekiston Respublikasi hududiga olib kirish

Oʻzbekiston Respublikasi hududiga organik mahsulotlarni olib kirish chogʻida chet davlatning muvofiqlikni baholash organi tomonidan berilgan organik jihatdan muvofiqlik sertifikatining va ushbu mamlakatda qabul qilingan namunadagi organik mahsulotlarning kelib chiqishini tasdiqlaydigan sertifikatning koʻchirma nusxalari taqdim etilishi kerak.

Oʻzbekiston Respublikasi hududiga olib kiriladigan organik mahsulotlarga nisbatan qonunchilikda belgilangan sanitariya, fitosanitariya, veterinariya hamda veterinariya-sanitariya qoidalari va normalari qoʻllaniladi.

19-modda. Organik mahsulotlarni Oʻzbekiston Respublikasi hududidan olib chiqish

Organik mahsulotlarni Oʻzbekiston Respublikasi hududidan olib chiqish Oʻzbekiston Respublikasi Vazirlar Mahkamasi tomonidan tasdiqlangan shakldagi organik jihatdan muvofiqlik sertifikati taqdim etilganda amalga oshiriladi.

5-bob. Muvofiqlikni baholash, muvofiqlikni baholash organini avtorizatsiyalashtirish, organik mahsulotlar sohasidagi ekvivalentlikni baholash, organik mahsulotlarni tamgʻalash

20-modda. Organik mahsulotlarning muvofiqligini baholash

Organik mahsulotlarni ishlab chiqarish, qayta ishlash, saqlashning muvofiqligini baholashni tashkil etish organik mahsulotlarni ishlab chiqaruvchilar uchun ixtiyoriydir.

Organik mahsulotlarni ishlab chiqarish, qayta ishlash, saqlash, transportda tashish, tamgʻalash va realizatsiya qilishning muvofiqligini baholash chogʻida inspeksiya nazorati organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablariga rioya etilishi nuqtai nazaridan amalga oshiriladi.

Organik jihatdan muvofiqlik sertifikati organik mahsulotlarni ishlab chiqarish, qayta ishlash, saqlash, transportda tashish, tamgʻalash va realizatsiya qilishning muvofiqligini baholash natijasidir.

Organik mahsulotlarni ishlab chiqaruvchi organik mahsulotlarning muvofiqligini tasdiqlash tartib-taomilidan oʻtganidan va organik jihatdan muvofiqlik sertifikatini olganidan keyin organik mahsulotlarning milliy muvofiqlik belgisidan foydalanish huquqiga ega boʻladi.

Organik mahsulotlarning milliy muvofiqlik belgisining tavsifi, shakli va unga doir texnik talablar texnik jihatdan tartibga solish sohasidagi normativ hujjatlarda belgilanadi.

21-modda. Muvofiqlikni baholash organini avtorizatsiyalashtirish

Akkreditatsiya qilingan muvofiqlikni baholash organi organik mahsulotlarni ishlab chiqarish, qayta ishlash, saqlash, transportda tashish va realizatsiya qilish jarayonlarining muvofiqligini organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablariga muvofiq baholash ishlarini keyinchalik amalga oshirish uchun vakolatli davlat organi tomonidan avtorizatsiyalashtirishdan oʻtishi shart.

Muvofiqlikni baholash organi avtorizatsiyalashtirishdan oʻtish uchun vakolatli davlat organiga avtorizatsiyalashtirish toʻgʻrisida ariza beradi.

Avtorizatsiyalashtirish toʻgʻrisidagi arizaga quyidagilar ilova qilinadi:

akkreditatsiya haqidagi guvohnomaning koʻchirma nusxasi;

yuridik shaxsning davlat roʻyxatidan oʻtkazilganligi toʻgʻrisidagi guvohnomaning koʻchirma nusxasi;

yuridik shaxs ustavining va (yoki) taʼsis shartnomasining koʻchirma nusxasi;

organik mahsulotlarni ishlab chiqarish, ularga ishlov berish, ularni qayta ishlash, saqlash, transportda tashish va realizatsiya qilish (organik oʻsimlik mahsulotlari, chorvachilikdan olinadigan organik mahsulotlar, organik oziq-ovqat mahsulotlari, organik ozuqa mahsulotlari va boshqalar) sohasida bazaviy ixtisoslashuv toʻgʻrisidagi maʼlumotlarga ega boʻlgan doimiy inspektorlarning yoki inspektorning mavjudligi haqidagi maʼlumotlar;

muvofiqlikni baholash organi xodimlarining roʻyxati va ularning organik mahsulotlarni ishlab chiqarish, ularga ishlov berish, ularni qayta ishlash, saqlash, transportda tashish va realizatsiya qilish sohasidagi malaka darajasini (ish tajribasini, organik mahsulotlar ishlab chiqarish sohasidagi maxsus bilimlarini, organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablarini bilishini) tasdiqlovchi hujjatlar.

Vakolatli davlat organi muvofiqlikni baholash organini avtorizatsiyalashtirish haqidagi yoki avtorizatsiyalashtirishni rad etish toʻgʻrisidagi qarorni ushbu moddaning uchinchi qismida koʻrsatilgan ariza va unga ilova qilinadigan hujjatlar olingan kundan eʼtiboran besh ish kuni ichida qabul qiladi.

Muvofiqlikni baholash organi:

avtorizatsiyadan oʻtgan taqdirda, organik mahsulotlarni ishlab chiqarish, qayta ishlash, saqlash, transportda tashish va realizatsiya qilish jarayonlarining muvofiqligini organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablariga muvofiq baholashni belgilangan tartibda amalga oshiradi;

organik jihatdan muvofiqlik sertifikatini berish, uning amal qilishini toʻxtatib turish yoki uni bekor qilish toʻgʻrisida qaror qabul qilingan kundan eʼtiboran uch ish kuni ichida vakolatli davlat organini yozma shaklda xabardor qiladi;

bir yil ichida berilgan sertifikatlar toʻgʻrisidagi yillik hisobotni vakolatli davlat organiga taqdim etadi.

Muvofiqlikni baholash organining avtorizatsiyalashtirishni rad etish toʻgʻrisidagi qarori quyidagi hollarda qabul qilinadi:

muvofiqlikni baholash organi avtorizatsiyalashtirishni bekor qilish toʻgʻrisida ariza berganda;

organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablari muvofiqlikni baholash organi tomonidan buzilganda;

ushbu moddaning uchinchi qismi talablariga muvofiq boʻlmaganda;

muvofiqlikni baholash organi tomonidan taqdim etilgan hujjatlarda koʻrsatilgan axborot ishonchsiz boʻlganda;

akkreditatsiya toʻgʻrisidagi guvohnomaning amal qilishi toʻxtatib turilganda, tugatilganda yoki u bekor qilinganda.

Muvofiqlikni baholash organi organik mahsulotlarning muvofiqligini baholash toʻgʻrisida oʻzi bilan shartnoma tuzgan organik mahsulotlarni ishlab chiqaruvchilarni ushbu organning avtorizatsiyalashtirilishi bekor boʻlganligi haqida yozma shaklda xabardor qilishi shart.

Muvofiqlikni baholash organi tomonidan berilgan, avtorizatsiyalashtirilishi bekor qilingan organik jihatdan muvofiqlik sertifikati haqiqiy deb topiladi, bunday mahsulotlarni ishlab chiqaruvchilar esa organik mahsulotlarni ishlab chiqaruvchi maqomini organik jihatdan muvofiqlik sertifikatining amal qilish muddati tugaguniga qadar saqlab qoladi.

22-modda. Organik mahsulotlar sohasida ekvivalentlikni baholash

Organik mahsulotlar sohasida ekvivalentlikni baholash vakolatli davlat organi tomonidan amalga oshiriladi.

Organik mahsulotlarni ishlab chiqarish sohasida ekvivalentlikni baholash chogʻida organik mahsulotlar toʻgʻrisidagi qonunchilik hamda texnik jihatdan tartibga solish sohasidagi normativ hujjatlar talablari xorijiy mamlakatlar qonunchiligiga va xalqaro standartlarga muvofiq oʻrganiladi.

23-modda. Organik mahsulotlarni tamgʻalash

Organik mahsulotlarni tamgʻalash qonunchilikda belgilangan tartibda amalga oshiriladi.

Organik mahsulotlarni ishlab chiqaruvchilar organik mahsulotlarning milliy muvofiqlik belgisidan foydalanish huquqiga ega.

Organik mahsulotlarni ishlab chiqaruvlar tomonidan organik mahsulotlarni tamgʻalashda:

“organic” (organik), “biologic” (biologik), “ecologic” (ekologik), “natural” (tabiiy) degan soʻzlardan va ularning qisqartmalaridan yoki ushbu soʻzlardan hosil qilingan soʻzlardan alohida tarzda yoxud organik mahsulotlarning nomiga qoʻshib foydalanilishi mumkin;

organik jihatdan muvofiqlik sertifikatini bergan muvofiqlikni baholash organi akkreditatsiya qilinganligi toʻgʻrisidagi guvohnomaning Muvofiqlikni baholash organlarining davlat reyestrida nazarda tutilgan roʻyxatga olish raqami koʻrsatiladi.

6-bob. Yakunlovchi qoidalar

24-modda. Organik mahsulotlarni ishlab chiqaruvchilar reyestri

Organik mahsulotlarni ishlab chiqaruvchilar reyestri vakolatli davlat organi tomonidan elektron hujjat tarzida shakllantiriladi va yuritiladi.

Organik mahsulotlarni ishlab chiqaruvchilar reyestri vakolatli davlat organining rasmiy veb-saytiga joylashtiriladi.

25-modda. Organik mahsulotlar toʻgʻrisidagi axborotning shaffofligi va ochiqligini taʼminlash

Vakolatli davlat organi fuqarolarning hayotiga va sogʻligʻiga tahdid solishi yoki moddiy zarar yetkazishi mumkin boʻlgan qalbakilashtirilgan organik mahsulotlar chiqarilishining oldini olishga, uning oqibatlarini kamaytirishga yoki uni bartaraf etishga qaratilgan choralar toʻgʻrisida aholini xabardor qiladi.

Organik mahsulotlarni realizatsiya qilish bilan shugʻullanuvchi shaxslarga organik jihatdan muvofiqlik sertifikatiga ega boʻlmagan organik mahsulotlarni realizatsiya qilish taqiqlanadi.

Muvofiqlikni baholash organi vakolatli davlat organiga organik mahsulotlarni ishlab chiqaruvchilar tomonidan organik mahsulotlarni ishlab chiqarish, qayta ishlash, saqlash, transportda tashish va realizatsiya qilish, shu jumladan ularni qonunchilikda belgilangan tartibda sertifikatlashtirishni amalga oshirish toʻgʻrisida axborot taqdim etadi.

26-modda. Nizolarni hal etish

Organik mahsulotlar sohasida yuzaga keladigan nizolar qonunchilikda belgilangan tartibda hal etiladi.

27-modda. Organik mahsulotlar toʻgʻrisidagi qonunchilikni buzganlik uchun javobgarlik

Organik mahsulotlar toʻgʻrisidagi qonunchilikni buzganlikda aybdor shaxslar belgilangan tartibda javobgar boʻladi.

28-modda. Ushbu Qonunning ijrosini, yetkazilishini, mohiyati va ahamiyati tushuntirilishini taʼminlash

Oʻzbekiston Respublikasi Qishloq xoʻjaligi vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

29-modda. Qonunchilikni ushbu Qonunga muvofiqlashtirish

Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

30-modda. Ushbu Qonunning kuchga kirishi

Ushbu Qonun rasmiy eʼlon qilingan kundan eʼtiboran uch oy oʻtgach kuchga kiradi.

Oʻzbekiston Respublikasining Prezidenti Sh. MIRZIYOYEV

Toshkent sh.,

2022-yil 25-aprel,

OʻRQ-766-son