Surishtiruv instituti takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida (O‘RQ-442-son)

06.09.2017

Oʻzbekiston Respublikasining Qonuni

Qonunchilik palatasi tomonidan 2017-yil 18-avgustda qabul qilingan Senat tomonidan 2017-yil 24-avgustda maʼqullangan

1-modda. Oʻzbekiston Respublikasining 1994-yil 22-sentabrda qabul qilingan 2012-XII-sonli Qonuni bilan tasdiqlangan Oʻzbekiston Respublikasining Jinoyat kodeksi (Oʻzbekiston Respublikasi Oliy Kengashining Axborotnomasi, 1995-yil, № 1, 3-modda; Oʻzbekiston Respublikasi Oliy Majlisining Axborotnomasi, 1996-yil, № 9, 144-modda; 1997-yil, № 2, 56-modda, № 9, 241-modda; 1998-yil, № 5-6, 102-modda, № 9, 181-modda; 1999-yil, № 1, 20-modda, № 5, 124-modda, № 9, 229-modda; 2000-yil, № 5-6, 153-modda; 2001-yil, № 1-2, 23-modda, № 9-10, 165-modda; 2002-yil, № 9, 165-modda; 2003-yil, № 1, 8-modda, № 9-10, 149-modda; 2004-yil, № 1-2, 18-modda, № 9, 171-modda; Oʻzbekiston Respublikasi Oliy Majlisi palatalarining Axborotnomasi, 2005-yil, № 9, 314-modda, № 12, 417, 418-moddalar; 2006-yil, № 6, 261-modda, № 12, 656-modda; 2007-yil, № 4, 158, 166-moddalar, № 6, 248-modda, № 9, 416, 422-moddalar, № 12, 607-modda; 2008-yil, № 4, 187, 188, 189-moddalar, № 7, 352-modda, № 9, 485, 487, 488-moddalar, № 12, 640, 641-moddalar; 2009-yil, № 1, 1-modda, № 4, 128-modda, № 9, 329, 334, 335, 337-moddalar, № 12, 470-modda; 2010-yil, № 5, 176, 179-moddalar, № 9, 341-modda, № 12, 471, 477-moddalar; 2011-yil, № 1, 1-modda; 2012-yil, № 4, 108-modda, № 9/1, 242-modda, № 12, 336-modda; 2013-yil, № 4, 98-modda, № 10, 263-modda; 2014-yil, № 1, 2-modda, № 5, 130-modda, № 9, 244-modda, № 12, 343-modda; 2015-yil, № 6, 228-modda, № 8, 310, 312-moddalar, № 12, 452-modda; 2016-yil, № 4, 125-modda, № 9, 276-modda, № 12, 383, 385-moddalar; 2017-yil, № 3, 47-modda, № 6, 300-modda), 148-moddasining birinchi qismi dispozitsiyasidagi “yoki ishga tiklash toʻgʻrisidagi sud qarorini bajarmaslik” degan soʻzlar chiqarib tashlansin.

2-modda. Oʻzbekiston Respublikasining 1994-yil 22-sentabrda qabul qilingan 2013-XII-sonli Qonuni bilan tasdiqlangan Oʻzbekiston Respublikasining Jinoyat-protsessual kodeksiga (Oʻzbekiston Respublikasi Oliy Kengashining Axborotnomasi, 1995-yil, № 2, 5-modda; Oʻzbekiston Respublikasi Oliy Majlisining Axborotnomasi, 1995-yil, № 12, 269-modda; 1997-yil, № 2, 56-modda, № 9, 241-modda; 1998-yil, № 5–6, 102-modda, № 9, 181-modda; 1999-yil, № 1, 20-modda, № 5, 124-modda, № 9, 229-modda; 2000-yil, № 5-6, 153-modda, № 7–8, 217-modda; 2001-yil, № 1-2, 11, 23-moddalar, № 9–10, 165, 182-moddalar; 2002-yil, № 9, 165-modda; 2003-yil, № 5, 67-modda; 2004-yil, № 1–2, 18-modda, № 9, 171-modda; Oʻzbekiston Respublikasi Oliy Majlisi palatalarining Axborotnomasi, 2005-yil, № 12, 418-modda; 2006-yil, № 6, 261-modda; 2007-yil, № 4, 166-modda, № 6, 248, 249-moddalar, № 9, 422-modda, № 12, 594, 595, 607-moddalar; 2008-yil, № 4, 177, 187-moddalar, № 9, 482, 484, 487-moddalar, № 12, 636, 641-moddalar; 2009-yil, № 1, 1-modda, № 4, 136-modda, № 9, 335-modda, № 12, 469, 470-moddalar; 2010-yil, № 6, 231-modda, № 9, 334, 336, 337, 342-moddalar, № 12, 477-modda; 2011-yil, № 4, 103, 104-moddalar, № 9, 252-modda, № 12/2, 363-modda; 2012-yil, № 1, 3-modda, № 9/2, 244-modda, № 12, 336-modda; 2014-yil, № 9, 244-modda; 2015-yil, № 8, 310, 312-moddalar, № 12, 452-modda; 2016-yil, № 4, 125-modda, № 9, 276-modda, № 12, 385-modda; 2017-yil, № 3, 47-modda, № 6, 300-modda) quyidagi qoʻshimcha va oʻzgartishlar kiritilsin:

1) 25-moddaning uchinchi qismi “ayblov xulosasi yoki” degan soʻzlardan keyin “ayblov dalolatnomasi yoxud” degan soʻzlar bilan toʻldirilsin;

2) 36-moddaning birinchi qismi quyidagi tahrirda bayon etilsin:

“Tergovchi: jinoyat ishini qoʻzgʻatishga va tugatishga, ishni qoʻzgʻatishni rad etishga; jinoyatni sodir etishda gumon qilinayotgan shaxslarni ushlash va soʻroq qilishga; ushbu Kodeksda nazarda tutilgan tergov harakatlarini olib borishga; shaxsni ishda gumon qilinuvchi tariqasida ishtirok qilish uchun jalb etish toʻgʻrisida qaror qabul qilishga; shaxsni ishda ayblanuvchi tariqasida ishtirok qilish uchun jalb etish toʻgʻrisida va unga nisbatan ehtiyot chorasini tanlash haqida qaror qabul qilishga, bundan qamoqqa olish yoki uy qamogʻi mustasno; oʻz yurituviga qabul qilgan ishlar boʻyicha tezkor-qidiruv tadbirlarini bajarish toʻgʻrisida yozma topshiriqlar berishga; boshqa tergovchi va surishtiruvchilarga ayrim tergov harakatlarini yuritish toʻgʻrisida topshiriq berishga; tergovga qadar tekshiruv yoki tezkor-qidiruv faoliyatini amalga oshiruvchi organlarga shaxslarni ushlab turish, majburiy keltirish, qidirish toʻgʻrisidagi qarorlarning ijrosini topshirishga, ulardan ayrim tergov harakatlarini yuritishda koʻmaklashishni talab qilishga; qamoqqa olish yoki uy qamogʻi tarzidagi ehtiyot chorasini qoʻllash toʻgʻrisida iltimosnoma berishga, shuningdek ehtiyot chorasini ushbu Kodeksning 240-moddasiga muvofiq bekor qilishga yoki oʻzgartirishga; ayblanuvchini lavozimidan chetlashtirish toʻgʻrisida, shaxsni tibbiy muassasaga joylashtirish haqida iltimosnomalar berishga, shuningdek mazkur protsessual majburlov choralarini ushbu Kodeksda belgilangan tartibda bekor qilishga; murdani eksgumatsiya qilish toʻgʻrisida, pochta-telegraf joʻnatmalarini xatlash haqida iltimosnomalar berishga, shuningdek mazkur choralarni ushbu Kodeksda belgilangan tartibda bekor qilishga; amnistiya aktiga asosan jinoyat ishini qoʻzgʻatishni rad qilish toʻgʻrisida yoki jinoyat ishini tugatish haqida sudga iltimosnoma kiritish toʻgʻrisida prokurorga taqdimnoma kiritishga haqlidir”;

3) 38-modda quyidagi tahrirda bayon etilsin:

“38-modda. Surishtiruv

Jinoyat ishlari boʻyicha surishtiruv:

1) ichki ishlar organlari;

2) Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti va uning joylardagi boʻlinmalari;

3) Oʻzbekiston Respublikasi Bosh prokuraturasi huzuridagi Majburiy ijro byurosi va uning joylardagi boʻlinmalari;

4) Oʻzbekiston Respublikasi Davlat bojxona qoʻmitasi va uning joylardagi boʻlinmalari surishtiruvchilari tomonidan olib boriladi”;

4) quyidagi tahrirdagi 381-modda bilan toʻldirilsin:

“381-modda. Surishtiruvchining vakolatlari

Surishtiruvchi: jinoyat ishini qoʻzgʻatishga va tugatishga, ishni qoʻzgʻatishni rad etishga; jinoyatni sodir etishda gumon qilinayotgan shaxslarni ushlash va soʻroq qilishga; ushbu Kodeksda nazarda tutilgan tergov harakatlarini olib borishga; shaxsni ishda gumon qilinuvchi tariqasida ishtirok qilish uchun jalb etish toʻgʻrisida qaror qabul qilishga; shaxsni ishda ayblanuvchi tariqasida ishtirok qilish uchun jalb etish haqida va unga nisbatan ehtiyot chorasini tanlash toʻgʻrisida qaror qabul qilishga, bundan qamoqqa olish yoki uy qamogʻi mustasno; oʻz yurituviga qabul qilgan ishlar boʻyicha tezkor-qidiruv tadbirlarini bajarish haqida yozma topshiriqlar berishga; boshqa surishtiruvchilarga ayrim tergov harakatlarini yuritish toʻgʻrisida topshiriq berishga; tergovga qadar tekshiruv yoki tezkor-qidiruv faoliyatini amalga oshiruvchi organlarga shaxslarni ushlab turish, majburiy keltirish, qidirish toʻgʻrisidagi qarorlarning ijrosini topshirishga, ulardan ayrim tergov harakatlarini yuritishda koʻmaklashishni talab qilishga; qamoqqa olish yoki uy qamogʻi tarzidagi ehtiyot chorasini qoʻllash toʻgʻrisida iltimosnoma berishga, shuningdek ehtiyot chorasini ushbu Kodeksning 240-moddasiga muvofiq bekor qilishga yoki oʻzgartirishga; ayblanuvchini lavozimidan chetlashtirish toʻgʻrisida, shaxsni tibbiy muassasaga joylashtirish haqida iltimosnomalar berishga, shuningdek mazkur protsessual majburlov choralarini ushbu Kodeksda belgilangan tartibda bekor qilishga; murdani eksgumatsiya qilish toʻgʻrisida, pochta-telegraf joʻnatmalarini xatlash haqida iltimosnomalar berishga, shuningdek mazkur choralarni ushbu Kodeksda belgilangan tartibda bekor qilishga; amnistiya aktiga asosan jinoyat ishini qoʻzgʻatishni rad qilish toʻgʻrisida yoki jinoyat ishini tugatish haqida sudga iltimosnoma kiritish haqida prokurorga taqdimnoma kiritishga haqlidir.

Surishtiruvchi surishtiruvning yoʻnalishiga oid barcha qarorlarni mustaqil ravishda qabul qiladi, bundan qonunda prokuror ruxsatini olish nazarda tutilgan hollar mustasno.

Surishtiruvchi prokurorning shaxsni ishda ayblanuvchi tariqasida ishtirok etishga jalb qilish haqidagi, jinoyatni tavsif qilish va ayblov hajmi haqidagi, qamoqqa olish yoki uy qamogʻi tarzidagi ehtiyot chorasini qoʻllash toʻgʻrisida iltimosnoma qoʻzgʻatish haqidagi, ayblanuvchini lavozimidan chetlashtirish, shaxsni tibbiy muassasaga joylashtirish tarzidagi protsessual majburlov choralarini qoʻllash haqidagi, amnistiya aktiga asosan jinoyat ishini qoʻzgʻatishni rad qilish toʻgʻrisida yoki jinoyat ishini tugatish haqida sudga iltimosnoma kiritish haqida prokurorga taqdimnoma kiritish toʻgʻrisidagi, ishni sudga yuborish yoki ishni tugatish haqidagi, tugallangan ishni qoʻshimcha tergovga qaytarish toʻgʻrisidagi koʻrsatmalariga rozi boʻlmasa, oʻz eʼtirozlarini yozma ravishda bayon qilgan holda ishni yuqori turuvchi prokurorga taqdim etishga haqlidir. Bunday hollarda yuqori turuvchi prokuror quyi turuvchi prokurorning koʻrsatmasini oʻz qarori bilan yo bekor qiladi yoki ish boʻyicha surishtiruv yuritishni boshqa surishtiruvchiga topshiradi.

Surishtiruvchining oʻz yuritishidagi ish yuzasidan qonunga muvofiq bergan yozma topshiriqlari va chiqargan qarorlari barcha korxonalar, muassasalar, tashkilotlar, mansabdor shaxslar va fuqarolar tomonidan ijro etilishi majburiydir”;

5) 39-modda quyidagi tahrirda bayon etilsin:

“39-modda. Surishtiruv boʻlinmasi boshligʻining va uning oʻrinbosarining vakolatlari

Surishtiruv boʻlinmasining boshligʻi va uning oʻrinbosari oʻz vakolatlari doirasida jinoyatlarni ochish va ularning oldini olish yuzasidan surishtiruvchilarning oʻz vaqtida harakat qilishini nazorat etadilar, jinoyat ishlari boʻyicha surishtiruvni toʻla, har tomonlama va xolisona olib borish choralarini koʻradilar.

Surishtiruv boʻlinmasi boshligʻi va uning oʻrinbosari ishlarni tekshirib koʻrishga, surishtiruvchiga surishtiruv yuritish, shaxsni ishda gumon qilinuvchi, ayblanuvchi tariqasida ishtirok qilish uchun jalb etish, jinoyatni tavsif qilish va ayblovning hajmi, ishning yoʻnalishini belgilash, ayrim tergov harakatlarini oʻtkazish haqida koʻrsatmalar berishga, ishni bir surishtiruvchidan ikkinchi surishtiruvchiga olib berishga, ishni tergov qilishni bir necha surishtiruvchiga topshirishga, shuningdek surishtiruvchi vakolatlaridan foydalanib, surishtiruv yuritishda qatnashishga va surishtiruvni shaxsan oʻzi olib borishga haqlidir.

Surishtiruv boʻlinmasi boshligʻining va uning oʻrinbosarining ish yuzasidan koʻrsatmalari surishtiruvchiga yozma tarzda beriladi va ularning ijro etilishi majburiydir.

Olingan koʻrsatmalar ustidan prokurorga shikoyat qilinishi, ushbu Kodeks 381-moddasining uchinchi qismida nazarda tutilgan hollarni istisno etganda, ularning ijro etilishini toʻxtatib qoʻymaydi”;

6) quyidagi tahrirdagi 391 va 392-moddalar bilan toʻldirilsin:

“391-modda. Tergovga qadar tekshiruvni amalga oshiruvchi organlar

Tergovga qadar tekshiruv quyidagilar tomonidan amalga oshiriladi:

1) ichki ishlar organlari;

2) harbiy qismlar, qoʻshilmalarning komandirlari, harbiy muassasalar va harbiy oʻquv yurtlarining boshliqlari — ularga boʻysunuvchi harbiy xizmatchilar, shuningdek oʻquv mashqlari oʻtkazilayotgan vaqtda harbiy xizmatga majburlar tomonidan sodir etilgan jinoyatlarga doir ishlar boʻyicha; Oʻzbekiston Respublikasi Qurolli Kuchlari xodimlarining xizmat majburiyatini bajarish bilan bogʻliq jinoyatlari yoki qism, qoʻshilma, muassasa yoxud oʻquv yurti joylashgan erda sodir etgan jinoyatlariga doir ishlar boʻyicha;

3) milliy xavfsizlik xizmati organlari — qonunga koʻra ularning yuritishiga berilgan ishlar boʻyicha;

4) Oʻzbekiston Respublikasi Ichki ishlar vazirligi jazoni ijro etish tizimini boshqarish organlarining boshliqlari, jazoni ijro etish koloniyalari, tarbiya koloniyalari, tergov hibsxonalari hamda turmalarning boshliqlari — shu muassasalar xodimlari xizmatni oʻtashning belgilangan tartibiga qarshi qilgan jinoyatlarga doir ishlar, xuddi shuningdek mazkur muassasalar hududida sodir etilgan boshqa jinoyatlarga doir ishlar boʻyicha;

5) davlat yongʻindan nazorat qilish organlari — yongʻinlarga doir va yongʻinga qarshi qoidalarni buzganlikka doir ishlar boʻyicha;

6) chegarani qoʻriqlash organlari — davlat chegarasini buzganlikka doir ishlar boʻyicha;

7) olis safarda boʻlgan dengiz kemalarining kapitanlari;

8) davlat bojxona xizmati organlari — bojxona toʻgʻrisidagi qonun hujjatlarini buzganlikka doir ishlar boʻyicha;

9) Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti va uning joylardagi boʻlinmalari — soliq va valyuta toʻgʻrisidagi qonun hujjatlarini buzganlikka doir ishlar boʻyicha;

10) Oʻzbekiston Respublikasi Bosh prokuraturasi huzuridagi Majburiy ijro byurosi va uning joylardagi boʻlinmalari — voyaga yetmagan yoki mehnatga layoqatsiz shaxslarni, ota-onani moddiy taʼminlashdan boʻyin tovlashga, sud qarorini bajarmaslikka, band solingan mol-mulkni qonunga xilof ravishda tasarruf etishga doir ishlar boʻyicha, shuningdek elektr, issiqlik energiyasi, gaz, suvdan foydalanish qoidalarini buzish bilan bogʻliq boʻlgan ishlar boʻyicha;

11) Oʻzbekiston Respublikasi Davlat soliq qoʻmitasining Chakana savdo va xizmat koʻrsatish sohasida huquqbuzarliklarni profilaktika qilish bosh boshqarmasi va uning hududiy boʻlimlari — bozorlar, savdo komplekslari hududlarida va ularga tutash boʻlgan avtotransport vositalarini vaqtincha saqlash joylarida aniqlangan moliyaviy-iqtisodiy va soliq sohalaridagi huquqbuzarliklarga doir ishlar boʻyicha.

Tergovga qadar tekshiruvni amalga oshiruvchi organlar zimmasiga zarur choralar koʻrish vazifasi, shu jumladan jinoyat alomatlarini va jinoyat sodir etgan shaxslarni topish, ushbu Kodeksning qoidalariga muvofiq tekshirib chiqilganidan soʻng jinoyat ishi yuzasidan dalil tariqasida foydalanish mumkin boʻlgan maʼlumotlarni aniqlash maqsadida ilmiy-texnika vositalaridan foydalangan holda, zarur choralar koʻrish vazifasi yuklatiladi. Ichki ishlar, milliy xavfsizlik xizmati, davlat bojxona xizmati organlari, shuningdek Oʻzbekiston Respublikasi Bosh prokuraturasi huzuridagi Majburiy ijro byurosi hamda Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti va ularning joylardagi boʻlinmalari shu maqsadda tezkor-qidiruv tadbirlarini oʻtkazishga haqli.

Tezkor-qidiruv faoliyatini oʻtkazish tartibi qonun bilan belgilanadi.

392-modda. Tergovga qadar tekshiruvni amalga oshiruvchi organ boshligʻining va uning mansabdor shaxsining vakolatlari

Ushbu Kodeksning 391-moddasida sanab oʻtilgan har bir organning rahbarlari tergovga qadar tekshiruvni amalga oshiruvchi organning boshligʻi sifatida harakat qila turib, tergovga qadar tekshiruvni boshlashga yoki oʻziga boʻysunuvchi boshqa mansabdor shaxsga uni yuritishni topshirishga, jinoyat ishini qoʻzgʻatishga yoki ish qoʻzgʻatishni rad etishga yoxud arizani, xabarni tergovga tegishliligiga koʻra oʻtkazishga haqlidir.

Tergovga qadar tekshiruvni amalga oshiruvchi mansabdor shaxs zimmasiga tergovga qadar tekshiruvni amalga oshirishga doir vazifalarni yuklatish tartibi mazkur organ tomonidan belgilanadi.

Boshliqning topshirigʻiga binoan va uning rahbarligida ishlayotgan mansabdor shaxs jinoyatning oldini olish yoki uning sodir etilishiga yoʻl qoʻymaslik, dalillarni toʻplash va saqlash, jinoyat sodir etishda gumon qilinganlarni ushlash va yashiringan gumon qilinuvchilarni qidirib topish hamda jinoyat tufayli yetkazilgan mulkiy zararning oʻrni qoplanishini taʼminlash uchun zarur boʻlgan, kechiktirib boʻlmaydigan barcha harakatlarni amalga oshirishi shart.

Tergovga qadar tekshiruvni yoki tezkor-qidiruv tadbirlarini amalga oshiruvchi organning mansabdor shaxsi zimmasiga tergovchi, surishtiruvchi yuritayotgan ish boʻyicha ayrim protsessual harakatlarni va tezkor-qidiruv tadbirlarini oʻtkazish toʻgʻrisidagi topshiriqlarini bajarish hamda tergovchiga, surishtiruvchiga protsessual harakatlarni bajarishida koʻmaklashish majburiyati ham yuklatiladi.

Tergovga qadar tekshiruvni amalga oshiruvchi organning mansabdor shaxsi tergovga qadar tekshiruvni amalga oshirayotganda, xuddi shuningdek tergovchining, surishtiruvchining topshirigʻini bajarayotganda, ushbu Kodeksda belgilangan qoidalarga amal qilgan holda protsessual harakatlarni amalga oshiradi va qarorlar qabul qiladi.

Tergovga qadar tekshiruvni amalga oshiruvchi organ mansabdor shaxsining qarorlari mazkur organ boshligʻi tomonidan tasdiqlanishi lozim. Boshliqning yozma koʻrsatmalari ularni bajarishni toʻxtatmay turib, ushbu koʻrsatmalar ustidan prokurorga shikoyat qilishga haqli boʻlgan unga boʻysunuvchi mansabdor shaxs uchun majburiydir.

Prokurorning yozma koʻrsatmalari tergovga qadar tekshiruvni amalga oshiruvchi organ boshligʻi va uning mansabdor shaxsi uchun majburiydir. Ular prokurorning koʻrsatmalaridan norozi boʻlgan taqdirda, koʻrsatmalarni bajarishni toʻxtatmay turib, yuqori turuvchi prokurorga ularning ustidan shikoyat qilishga haqlidir”;

7) 46-moddaning:

birinchi qismidagi “dastlabki tergov tamom boʻlganidan soʻng ishning barcha materiallari bilan tanishib chiqish hamda undan zarur maʼlumotlarni yozib olish, materiallar va hujjatlardan texnika vositalari yordamida oʻz hisobidan koʻchirma nusxalar olish yoki ulardagi maʼlumotlarni oʻzga shaklda qayd etish; jinoyat ishining” degan soʻzlar “surishtiruv yoki dastlabki tergov tamom boʻlganidan soʻng ishning barcha materiallari bilan tanishib chiqish hamda undan zarur maʼlumotlarni yozib olish, materiallar va hujjatlardan texnika vositalari yordamida oʻz hisobidan koʻchirma nusxalar olish yoki ulardagi maʼlumotlarni oʻzga shaklda qayd etish; jinoyat ishining surishtiruvchi” degan soʻzlar bilan almashtirilsin;

uchinchi qismi “hozir boʻlishi” degan soʻzlardan keyin “surishtiruv” degan soʻz bilan toʻldirilsin;

8) 53-moddaning birinchi qismi “hujjatlar bilan” degan soʻzlardan keyin “surishtiruv yoki” degan soʻzlar bilan toʻldirilsin;

9) 55-moddaning birinchi qismi “harakatlarida ishtirok etish” degan soʻzlardan keyin “surishtiruv yoki” degan soʻzlar bilan toʻldirilsin;

10) 57-moddaning birinchi qismi “iltimos qilish” degan soʻzlardan keyin “surishtiruv yoki” degan soʻzlar bilan toʻldirilsin;

11) 59-moddaning birinchi qismi “rad qilish” degan soʻzlardan keyin “surishtiruv yoki” degan soʻzlar bilan toʻldirilsin;

12) 76-moddaning:

nomi quyidagi tahrirda bayon etilsin:

“76-modda. Sudyaning, prokurorning, tergovchining, surishtiruvchining, tergovga qadar tekshiruvni amalga oshiruvchi organ mansabdor shaxsining va sud majlisi kotibining ishda ishtirok etishiga monelik qiladigan holatlar”;

birinchi qismi “tergovchi, surishtiruvchi” degan soʻzlardan keyin “tergovga qadar tekshiruvni amalga oshiruvchi organning mansabdor shaxsi” degan soʻzlar bilan toʻldirilsin;

ikkinchi qismi “shu ishni yuritishda” degan soʻzlardan keyin “tergovga qadar tekshiruvni amalga oshiruvchi organning mansabdor shaxsi” degan soʻzlar bilan toʻldirilsin;

13) 79-moddaning 1-bandi “tergovchi, surishtiruvchi” degan soʻzlardan keyin “tergovga qadar tekshiruvni amalga oshiruvchi organning mansabdor shaxsi” degan soʻzlar bilan toʻldirilsin;

14) 80-modda quyidagi tahrirdagi oʻn uchinchi qism bilan toʻldirilsin:

“Agar tergovga qadar tekshiruvni amalga oshiruvchi organning mansabdor shaxsi ushbu Kodeksning 76, 79-moddalarida koʻrsatilgan holatlar mavjudligi sababli oʻzini oʻzi rad etmasa, uni rad qilish masalasi manfaatdor shaxslarning arizalariga koʻra tergovga qadar tekshiruvni amalga oshiruvchi organ boshligʻi yoki prokuror tomonidan hal qilinadi. Rad qilishni qanoatlantirish yoki qanoatlantirmaslik haqida qaror chiqariladi”;

15) 82-moddaning birinchi xatboshisi “ayblov xulosasi” degan soʻzlardan keyin “yoki ayblov dalolatnomasi” degan soʻzlar bilan toʻldirilsin;

16) 108-moddaning 5-bandi quyidagi tahrirda bayon etilsin:

“5) boshqa surishtiruvchi yoki tergovchi tomonidan ilgari soʻroq qilingan shaxsning koʻrsatuvlari toʻgʻri yozilganligini ishni yuritish uchun qabul qilgan surishtiruvchi yoki tergovchi qoʻshimcha soʻroq qilish yoʻli bilan tekshirib koʻrishni lozim topsa”;

17) 135-moddaning birinchi qismi “aniqlashtirish maqsadida” degan soʻzlardan keyin “tergovga qadar tekshiruvni amalga oshiruvchi organning mansabdor shaxsi” degan soʻzlar bilan toʻldirilsin;

18) 136-moddaning:

birinchi qismidagi “Surishtiruv yoki” degan soʻzlar “Tergovga qadar tekshiruv, surishtiruv yoki” degan soʻzlar bilan almashtirilsin;

ikkinchi qismi “hollarda” degan soʻzdan keyin “tergovga qadar tekshiruvni amalga oshiruvchi organning mansabdor shaxsi” degan soʻzlar bilan toʻldirilsin;

19) 137-moddaning toʻrtinchi qismi “lekin” degan soʻzdan keyin “tergovga qadar tekshiruvni amalga oshiruvchi organning mansabdor shaxsi” degan soʻzlar bilan toʻldirilsin;

20) 139-moddaning:

birinchi qismi quyidagi tahrirda bayon etilsin:

“Tergovga qadar tekshiruvni amalga oshiruvchi organning mansabdor shaxsi, surishtiruvchi, tergovchi va sud tevarak-atrof va binolarni quyidagi qoidalarga rioya qilgan holda koʻzdan kechiradilar”;

ikkinchi qismi “boʻlsa” degan soʻzdan keyin “tergovga qadar tekshiruvni amalga oshiruvchi organning mansabdor shaxsi” degan soʻzlar bilan toʻldirilsin;

21) 140-moddaning birinchi qismi quyidagi tahrirda bayon etilsin:

“Tergovga qadar tekshiruvni amalga oshiruvchi organning mansabdor shaxsi, surishtiruvchi, tergovchi va sud narsa va hujjatlarni ular topilgan joyda, basharti koʻzdan kechirish koʻp vaqt yoki qoʻshimcha texnik vositalar talab qilsa, keyinchalik surishtiruv, dastlabki tergov yoki sud muhokamasi oʻtkazilayotgan joyda koʻzdan kechiradilar”;

22) 141-moddaning birinchi qismi “muvofiq” degan soʻzdan keyin “tergovga qadar tekshiruvni amalga oshiruvchi organning mansabdor shaxsi” degan soʻzlar bilan toʻldirilsin;

23) 1481-moddaning birinchi qismi “toʻgʻrisidagi iltimosnoma” degan soʻzlardan keyin “surishtiruv yoki” degan soʻzlar bilan toʻldirilsin;

24) 162-modda:

quyidagi mazmundagi ikkinchi qism bilan toʻldirilsin:

“Tergovga qadar tekshiruvni amalga oshiruvchi organning mansabdor shaxsi faqat ushbu Kodeksning 224-moddasiga asosan shaxsni ushlagan taqdirda, unda qurol borligi yoki u jinoyat sodir etganligini fosh qiluvchi dalillardan qutulish niyatida ekanligini taxmin qilishga yetarli asoslar mavjud boʻlsa, uni shaxsiy tintuv qilishni va olib qoʻyishni amalga oshirishga ham haqlidir. Bunda shaxsiy tintuv va olib qoʻyish bayonnomasi ushbu Kodeksning 163-moddasi talablariga rioya qilgan holda tuziladi”;

ikkinchi va uchinchi qismlari tegishincha uchinchi va toʻrtinchi qismlar deb hisoblansin;

uchinchi qismining:

1-bandidagi “jamoat tartibini saqlashga doir burchini bajarayotgan militsiya xodimi tomonidan” degan soʻzlar chiqarib tashlansin;

2-bandidagi “militsiyaga” degan soʻz “ichki ishlar organiga” degan soʻzlar bilan almashtirilsin;

toʻrtinchi qismidagi “surishtiruvchi yoki tergovchi tomonidan” degan soʻzlar chiqarib tashlansin;

25) 1661-moddaning birinchi qismi “iltimosnoma” degan soʻzdan keyin “surishtiruv yoki” degan soʻzlar bilan toʻldirilsin;

26) 168-moddaning birinchi qismidagi “Dastlabki tergov davomida” degan soʻzlar “Surishtiruv yoki dastlabki tergov bosqichida” degan soʻzlar bilan almashtirilsin;

27) 172-moddaning birinchi qismidagi “Surishtiruvchi” degan soʻz “Tergovga qadar tekshiruvni amalga oshiruvchi organning mansabdor shaxsi, surishtiruvchi” degan soʻzlar bilan almashtirilsin;

28) 174-moddaning toʻrtinchi qismidagi “Surishtiruvchi” degan soʻz “Tergovga qadar tekshiruvni amalga oshiruvchi organning mansabdor shaxsi, surishtiruvchi” degan soʻzlar bilan almashtirilsin;

29) 180-moddaning birinchi qismidagi “tayinlash toʻgʻrisida” degan soʻzlar “tayinlash toʻgʻrisida tergovga qadar tekshiruvni amalga oshiruvchi organning mansabdor shaxsi” degan soʻzlar bilan almashtirilsin;

30) 182-moddaning birinchi qismidagi “Surishtiruvchi” degan soʻz “Tergovga qadar tekshiruvni amalga oshiruvchi organning mansabdor shaxsi, surishtiruvchi” degan soʻzlar bilan almashtirilsin;

31) 183-moddaning:

birinchi qismi “oʻtkaziladigan boʻlsa” degan soʻzlardan keyin “tergovga qadar tekshiruvni amalga oshiruvchi organning mansabdor shaxsi” degan soʻzlar bilan toʻldirilsin;

ikkinchi qismi quyidagi tahrirda bayon etilsin:

“Ekspertizani tayinlagan tergovga qadar tekshiruvni amalga oshiruvchi organning mansabdor shaxsi, surishtiruvchi, tergovchi yoki sud ekspertga ekspertiza tayinlanganligi toʻgʻrisidagi qarorni yoki ajrimni taqdim etadi, uni ushbu Kodeksning 68-moddasida koʻrsatilgan huquq va majburiyatlari bilan tanishtiradi va bila turib notoʻgʻri xulosa berganligi, surishtiruv yoki dastlabki tergov maʼlumotlarini surishtiruvchining, tergovchining yoxud prokurorning ruxsatisiz oshkor qilganligi, shuningdek xulosa berishni rad etganligi yoki bundan boʻyin tovlaganligi uchun jinoiy javobgarlik toʻgʻrisida ogohlantiradi. Ekspert bergan ariza va iltimosnomalar ham shu zaylda qayd etiladi. Ekspertning iltimosi rad etilgan taqdirda, ekspertiza tayinlagan tergovga qadar tekshiruvni amalga oshiruvchi organning mansabdor shaxsi, surishtiruvchi, tergovchi yoki sud bu haqda qaror yoki ajrim chiqaradi”;

uchinchi qismidagi “ekspertiza tayinlagan” degan soʻzlar “ekspertiza tayinlagan tergovga qadar tekshiruvni amalga oshiruvchi organning mansabdor shaxsi” degan soʻzlar bilan almashtirilsin;

32) 187-moddaning:

birinchi qismi quyidagi tahrirda bayon etilsin:

“Ekspert xulosasi tergovga qadar tekshiruvni amalga oshiruvchi organning mansabdor shaxsi, surishtiruvchi, tergovchi yoki sud tomonidan jinoyat ishi yoki tergovga qadar tekshiruv materiallari boʻyicha toʻplangan boshqa dalillar bilan birgalikda uning ilmiy asoslanganligi va ekspertiza oʻtkazish uchun belgilangan barcha protsessual qoidalarga rioya etilganligi nuqtai nazaridan baholanadi”;

uchinchi qismi quyidagi tahrirda bayon etilsin:

“Agar jinoyat ishi yoki tergovga qadar tekshiruv materiallari boʻyicha bir necha ekspertiza oʻtkazilgan va ekspertlar bir xil fikrga kelmagan boʻlsa, tergovga qadar tekshiruvni amalga oshiruvchi organning mansabdor shaxsi, surishtiruvchi, tergovchi yoki sud baʼzi ekspertlarning xulosalariga qoʻshilish va boshqa ekspertlarning xulosalariga qoʻshilmaslik toʻgʻrisidagi oʻz fikrini asoslab berishi lozim”;

33) 1872-moddaning birinchi qismi “Taftish” degan soʻzdan keyin “tergovga qadar tekshiruvni amalga oshiruvchi organ mansabdor shaxsining” degan soʻzlar bilan toʻldirilsin;

34) 1877-moddaning:

ikkinchi qismi “iltimosnomasiga koʻra” degan soʻzlardan keyin “surishtiruvchining” degan soʻzlar bilan toʻldirilsin;

uchinchi qismi “olingan holda” degan soʻzlardan keyin “surishtiruv” degan soʻz bilan toʻldirilsin;

35) 18711-modda birinchi qismining oltinchi xatboshisi “uzaytirish toʻgʻrisida” degan soʻzlardan keyin “surishtiruvchiga” degan soʻzlar bilan toʻldirilsin;

36) 208-moddaning ikkinchi qismi “ayblov xulosasiga” degan soʻzlardan keyin “yoki ayblov dalolatnomasiga” degan soʻzlar bilan toʻldirilsin;

37) 213-modda quyidagi mazmundagi ikkinchi qism bilan toʻldirilsin:

“Tergovga qadar tekshiruvni amalga oshiruvchi organning mansabdor shaxsi ushlab turish tarzidagi protsessual majburlov chorasini ushbu Kodeksning 221 va 224-moddalarida belgilangan hollarda va tartibda qoʻllashga haqlidir”;

38) 218-modda quyidagi mazmundagi ikkinchi qism bilan toʻldirilsin:

“Shaxsning qaramogʻidagilarga homiylik qilish va uning mol-mulkini qoʻriqlash toʻgʻrisidagi koʻrsatilgan choralar ushlab turish tarzidagi protsessual majburlov chorasini qoʻllagan tergovga qadar tekshiruvni amalga oshiruvchi organning mansabdor shaxsi tomonidan ham koʻrilishi shart”;

39) 219-moddaning matni quyidagi tahrirda bayon etilsin:

“Prokurorning protsessual majburlov choralarini qoʻllash haqidagi koʻrsatmalari surishtiruvchi va tergovchi, shuningdek tergovga qadar tekshiruvni amalga oshiruvchi organ uchun majburiydir. Bunday koʻrsatmalarga eʼtirozlar yuqori turuvchi prokurorga ushbu Kodeksning 36, 39 va 392-moddalarida nazarda tutilgan tartibda taqdim etilishi mumkin”;

40) 222-moddaning matni quyidagi tahrirda bayon etilsin:

“Ichki ishlar organining, tergovga qadar tekshiruvni, surishtiruvni yoki dastlabki tergovni amalga oshiruvchi boshqa organning xodimi, shuningdek muomalaga layoqatli har qanday shaxs ushbu Kodeksning 221-moddasida koʻrsatilgan asoslar mavjud boʻlgan taqdirda, jinoyat sodir etishda gumon qilingan shaxsni ushlash va yaqin oradagi ichki ishlar organiga yoki huquqni muhofaza qiluvchi boshqa organga olib kelishga haqlidir”;

41) 223-moddaning matnidagi “militsiyaga” degan soʻz “ichki ishlar organiga” degan soʻzlar bilan almashtirilsin;

42) 224-moddaning:

birinchi qismidagi “militsiya muassasasiga” degan soʻzlar “ichki ishlar organiga” degan soʻzlar bilan almashtirilsin;

ikkinchi qismidagi “militsiya muassasasiga” degan soʻzlar “ichki ishlar organiga” degan soʻzlar bilan almashtirilsin;

43) 225-moddaning birinchi — toʻrtinchi qismlari quyidagi tahrirda bayon etilsin:

“Ushlab turilgan shaxs ichki ishlar organiga yoki huquqni muhofaza qiluvchi boshqa organga keltirilganidan soʻng huquqni muhofaza qiluvchi organning navbatchisi yoki boshqa xodimi boshliqning koʻrsatmasiga binoan ushlab turish bayonnomasini darhol tuzishi va unda quyidagilarni aks ettirishi lozim: kimning, kim tomonidan, qachon, qanday holatda, qonunda koʻrsatilgan qanday asoslarga koʻra ushlanganligini; ushlangan shaxs qanday jinoyatni sodir etganlikda gumon qilinayotganligini; ichki ishlar organi boʻlimiga yoki huquqni muhofaza qiluvchi organga u qaysi vaqtda olib kelinganligini. Bayonnomani ushlab turishning asosliligini tekshirish vazifasi topshirilgan ichki ishlar organi xodimi yoki huquqni muhofaza qiluvchi boshqa organ xodimi, ushlab keltirgan vakolatli shaxs yoki fuqaro, ushlangan shaxs va xolislar imzo chekib tasdiqlaydilar.

Ichki ishlar organi xodimi yoki huquqni muhofaza qiluvchi boshqa organning xodimi amalga oshirilgan ushlab turish haqida ushlangan shaxs ichki ishlar organiga yoki huquqni muhofaza qiluvchi boshqa organga keltirilgan paytdan eʼtiboran oʻn ikki soat ichida prokurorga yozma shaklda xabar berishi shart.

Ushlab turishning asosli ekanligini tekshirish, hujjatlarni talab qilish va koʻzdan kechirish ushlangan shaxs ichki ishlar organiga yoki huquqni muhofaza qiluvchi boshqa organga keltirilgan paytdan eʼtiboran yigirma toʻrt soatdan kechiktirmay oʻtkazilishi lozim.

Ushlab turishga asos boʻlmagan taqdirda, ichki ishlar organi boʻlinmasining boshligʻi yoki boshqa vakolatli shaxs ushlanganni ozod qilish toʻgʻrisida qaror chiqaradi. Qarorning nusxasi darhol prokurorga yuboriladi”;

44) 226-moddaning birinchi qismi quyidagi tahrirda bayon etilsin:

“Ushlab turish muddati ushlangan ichki ishlar organiga yoki huquqni muhofaza qiluvchi boshqa organga keltirilgan paytdan eʼtiboran koʻpi bilan qirq sakkiz soatni tashkil etadi. Surishtiruvchi, tergovchi yoki prokuror tomonidan zarur va yetarli asoslar taqdim etilganda ushlab turish sudning qarori bilan qoʻshimcha ravishda qirq sakkiz soatga uzaytirilishi mumkin”;

45) 227-moddaning birinchi qismi quyidagi tahrirda bayon etilsin:

“Surishtiruvchining, tergovchining yoki prokurorning ushlab turish, gumon qilinuvchi tariqasida ishda ishtirok etishga jalb qilish haqidagi qarori asosida ichki ishlar organi yoki huquqni muhofaza qiluvchi boshqa organ xodimi ushlangan shaxsni ushbu Kodeksning 224-moddasi qoidalariga rioya etgan holda eng yaqin ichki ishlar organiga yoki huquqni muhofaza qiluvchi boshqa organga darhol olib borishi shart. Amalga oshirilgan ushlab turish toʻgʻrisida ushlab turish haqida qaror chiqargan vakolatli shaxs darhol xabardor qilinishi lozim”;

46) 228-moddaning birinchi qismidagi “militsiya muassasasi” degan soʻzlar “ichki ishlar organi” degan soʻzlar bilan almashtirilsin;

47) 238-moddaning matni “hal qilishda” degan soʻzlardan keyin “surishtiruvchi” degan soʻz bilan toʻldirilsin;

48) 240-moddaning:

birinchi qismi “Ehtiyot chorasi” degan soʻzlardan keyin “surishtiruvchi” degan soʻz bilan toʻldirilsin;

ikkinchi qismi “prokurorning roziligi bilan” degan soʻzlardan keyin “surishtiruvchi yoki” degan soʻzlar bilan toʻldirilsin;

49) 241-moddaning ikkinchi qismidagi “Dastlabki tergov” degan soʻzlar “Surishtiruv yoki dastlabki tergov” degan soʻzlar bilan almashtirilsin;

50) 243-moddaning:

ikkinchi qismi quyidagi tahrirda bayon etilsin:

“Qonunda nazarda tutilgan holatlar mavjud boʻlganda va surishtiruv yoki dastlabki tergov davomida qamoqqa olish yoki uy qamogʻi tarzidagi ehtiyot chorasi tanlanganda prokuror, shuningdek prokurorning roziligi bilan surishtiruvchi yoki tergovchi qamoqqa olish yoki uy qamogʻi tarzidagi ehtiyot chorasini qoʻllash toʻgʻrisida iltimosnoma qoʻzgʻatish haqida qaror chiqaradi”;

beshinchi qismi “sodir qilingan yoki” degan soʻzlardan keyin “surishtiruv” degan soʻz bilan toʻldirilsin;

yettinchi qismining uchinchi va toʻrtinchi jumlalari quyidagi tahrirda bayon etilsin:

“Sud majlisida gumon qilinuvchining yoki ayblanuvchining qonuniy vakili, shuningdek surishtiruvchi, tergovchi ishtirok etishga haqli. Zarur boʻlgan hollarda surishtiruvchi, tergovchi sudga chaqirilishi mumkin”;

51) 244-moddaning:

uchinchi qismi “bunday shaxslar vaqtincha saqlash hibsxonalarida” degan soʻzlardan keyin “surishtiruvchi yoki” degan soʻzlar bilan toʻldirilsin;

beshinchi qismi “koʻchirish toʻgʻrisidagi” degan soʻzlardan keyin “surishtiruvchining” degan soʻz bilan toʻldirilsin;

yettinchi qismi “koʻchirish toʻgʻrisidagi” degan soʻzlardan keyin “surishtiruvchining yoki” degan soʻzlar bilan toʻldirilsin;

52) 247-moddaning:

uchinchi qismi “sodir etilgan yoki” degan soʻzlardan keyin “surishtiruv” degan soʻz bilan toʻldirilsin;

beshinchi qismi “Zarur hollarda” degan soʻzlardan keyin “surishtiruvchi” degan soʻz bilan toʻldirilsin;

53) 249-moddaning:

birinchi qismi “shaxslar tomonidan” degan soʻzlardan keyin “surishtiruv” degan soʻz bilan toʻldirilsin;

ikkinchi qismi “qabul qilish haqida” degan soʻzlardan keyin “surishtiruvchi” degan soʻz bilan toʻldirilsin;

uchinchi qismi “va uni” degan soʻzlardan keyin “surishtiruvchi” degan soʻz bilan toʻldirilsin;

54) 250-moddaning birinchi qismi quyidagi tahrirda bayon etilsin:

“Munosib xulq-atvorda boʻlish haqidagi tilxat ayblanuvchining yoki sudlanuvchining surishtiruvchiga, tergovchiga, prokurorga yoki sudga tergov va suddan yashirinmaslik, jinoyat ishi boʻyicha haqiqatni aniqlashga toʻsqinlik qilmaslik, jinoiy faoliyat bilan shugʻullanmaslik, surishtiruvchi, tergovchi, prokuror va sudning chaqiruvi bilan yetib kelish haqida bergan yozma majburiyatidan iboratdir. Tilxat beruvchi shaxs bundan tashqari oʻz zimmasiga surishtiruvchining, tergovchining, prokurorning yoki sudning ijozatisiz ushbu aholi punktidan chiqib ketmaslik va shu aholi punkti doirasida istiqomat joyini oʻzgartirsa, bu haqda ularni xabardor qilish majburiyatini oladi”;

55) 251-moddaning ikkinchi qismi “Kafillar sonini” degan soʻzlardan keyin “surishtiruvchi” degan soʻz bilan toʻldirilsin;

56) 252-moddaning:

ikkinchi qismi “Bu majburiyat” degan soʻzlardan keyin “surishtiruvchi” degan soʻz bilan toʻldirilsin;

uchinchi qismi “ehtiyot chorasini tanlagan” degan soʻzlardan keyin “surishtiruvchi” degan soʻz bilan toʻldirilsin;

57) 254-moddaning:

birinchi qismi “xizmatga majbur shaxs” degan soʻzlardan keyin “surishtiruvchi” degan soʻz bilan toʻldirilsin;

uchinchi qismi quyidagi tahrirda bayon etilsin:

“Ushbu ehtiyot chorasini qoʻllash, bekor qilish yoki oʻzgartirish toʻgʻrisidagi surishtiruvchi, tergovchi, prokurorning qarori va sudning ajrimi qoʻmondonlik uchun majburiydir, unga harbiy xizmatchi ustidan kuzatuv oʻrnatish zaruratini keltirib chiqargan ayblovning mohiyati tushuntirilishi lozim. Oldini olish maqsadida mazkur ehtiyot chorasi qoʻllanilgan harakatlar ayblanuvchi tomonidan sodir etilgan taqdirda, qoʻmondonlik surishtiruvchini, tergovchini, prokurorni yoki sudni bu haqda darhol xabardor qilishi shart”;

58) 255-moddaning toʻrtinchi qismi “xabardor etgan holda” degan soʻzlardan keyin “surishtiruvchi” degan soʻz bilan toʻldirilsin;

59) 256-moddaning:

birinchi qismi “prokuror, tergovchi” degan soʻzlardan keyin “va surishtiruvchi” degan soʻzlar bilan toʻldirilsin;

uchinchi qismidagi “Tergovchining” degan soʻz “Surishtiruvchining, tergovchining” degan soʻzlar bilan almashtirilsin;

60) 257-moddaning:

birinchi qismi “chetlashtirish toʻgʻrisidagi iltimosnoma” degan soʻzlardan keyin “surishtiruv yoki” degan soʻzlar bilan toʻldirilsin;

uchinchi qismi “Zarur boʻlganda” degan soʻzlardan keyin “surishtiruvchi” degan soʻz bilan toʻldirilsin;

61) 259-moddaning matni “bu haqda” degan soʻzlardan keyin “surishtiruvchini” degan soʻz bilan toʻldirilsin;

62) 266-moddaning:

birinchi qismi “prokuror, tergovchi” degan soʻzlardan keyin “va surishtiruvchi” degan soʻzlar bilan toʻldirilsin;

uchinchi qismidagi “Tergovchining” degan soʻz “Surishtiruvchining yoki tergovchining” degan soʻzlar bilan almashtirilsin;

63) 267-moddaning:

birinchi qismi “joylashtirish toʻgʻrisidagi iltimosnoma” degan soʻzlardan keyin “surishtiruv yoki” degan soʻzlar bilan toʻldirilsin;

uchinchi qismi “Zarur hollarda” degan soʻzlardan keyin “surishtiruvchi yoki” degan soʻzlar bilan toʻldirilsin;

oltinchi qismi “iltimosnoma” degan soʻzdan keyin “surishtiruv yoki” degan soʻzlar bilan toʻldirilsin;

64) 269-moddaning birinchi qismi “prokuror, tergovchi” degan soʻzlardan keyin “va surishtiruvchi” degan soʻzlar bilan toʻldirilsin;

65) 299-modda ruscha matnining birinchi qismi “sootvetstvuyuщemu” degan soʻzdan keyin “doznavatelyu” degan soʻz bilan toʻldirilsin;

66) 306-moddaning:

birinchi qismi “qarorda esa” degan soʻzlardan keyin “surishtiruvchi” degan soʻz bilan toʻldirilsin;

ikkinchi qismidagi “prokuror yoki tergovchi” degan soʻzlar “prokuror, tergovchi yoki surishtiruvchi” degan soʻzlar bilan almashtirilsin;

67) 307-moddaning birinchi qismi “sud ajrim” degan soʻzlardan keyin “surishtiruvchi” degan soʻz bilan toʻldirilsin;

68) 308-moddaning birinchi qismidagi “Tergovchining” degan soʻz “Surishtiruvchining, tergovchining” degan soʻzlar bilan almashtirilsin;

69) 309-moddaning matni “prokuror, tergovchining” degan soʻzlardan keyin “va surishtiruvchining” degan soʻzlar bilan toʻldirilsin;

70) 312-moddaning ikkinchi qismi “arizasiga binoan” degan soʻzlardan keyin “surishtiruvchi” degan soʻz bilan toʻldirilsin;

71) toʻqqizinchi boʻlim quyidagi mazmundagi 401-bob bilan toʻldirilsin:

“401-bob. Ishni sudga qadar yuritishning umumiy shartlari

3201-modda. Ishni sudga qadar yuritishning shakllari

Ishni sudga qadar yuritish jinoyatga oid arizalar, xabarlar va boshqa maʼlumotlar qabul qilingan paytdan boshlanadi hamda tergovga qadar tekshiruvni va jinoyat ishini tergov qilishni oʻz ichiga oladi.

3202-modda. Tergovga qadar tekshiruv

Tergovga qadar tekshiruv jinoyatga oid arizalar, xabarlar va boshqa maʼlumotlarni tekshirish, ularni koʻrib chiqish natijasi yuzasidan qaror qabul qilishga doir tadbirlarni, shuningdek ish uchun ahamiyatli boʻlishi mumkin boʻlgan jinoyat izlari, narsalar va hujjatlarni mustahkamlash va saqlashga doir choralarni oʻz ichiga oladi.

Tergovga qadar tekshiruv mazkur Kodeksning 391-moddasida koʻrsatilgan organlar tomonidan ushbu Kodeksning 41-bobida belgilangan qoidalarga muvofiq amalga oshiriladi.

Tergovga qadar tekshiruv surishtiruvchi, tergovchi yoki prokuror tomonidan ham olib borilishi mumkin.

3203-modda. Jinoyat ishini tergov qilish

Jinoyat ishini tergov qilish surishtiruv yoki dastlabki tergov shaklida amalga oshiriladi.

Dastlabki tergov ushbu Kodeksning 345-moddasi ikkinchi — yettinchi qismlarida nazarda tutilgan jinoyat ishlari boʻyicha, shuningdek ushbu moddaning toʻrtinchi qismida nazarda tutilgan hollarda oʻtkaziladi.

Surishtiruv ushbu Kodeksning 3812-moddasi birinchi — uchinchi qismlarida nazarda tutilgan jinoyat ishlari boʻyicha oʻtkaziladi.

Tergovi surishtiruv shaklida oʻtkaziladigan jinoyat ishlari tergovning har tomonlama, xolisona va toʻla oʻtkazilishini taʼminlash maqsadida ushbu Kodeksning 3815-moddasiga muvofiq prokurorning asoslantirilgan qaroriga koʻra dastlabki tergov olib borish uchun topshirilishi mumkin”;

72) 321-moddaning matni “prokuror” degan soʻzdan keyin “va tergovga qadar tekshiruvni amalga oshiruvchi organning mansabdor shaxsi” degan soʻzlar bilan toʻldirilsin;

73) 322-modda birinchi qismining 4-bandi quyidagi tahrirda bayon etilsin:

“4) jinoyat sodir etilganligini koʻrsatuvchi maʼlumotlar va izlarni surishtiruvchi, tergovchi, prokuror, shuningdek tergovga qadar tekshiruvni amalga oshiruvchi organning bevosita oʻzi aniqlashi”;

74) 328-moddaning:

1-bandi quyidagi tahrirda bayon etilsin:

“1) tergovga qadar tekshiruvni amalga oshiruvchi organning mansabdor shaxsi maʼmuriy vazifani amalga oshirayotganida jinoyatga oid maʼlumotlarni aniqlaganida”;

2-bandidagi “tergovchi” degan soʻz “surishtiruvchi, tergovchi” degan soʻzlar bilan almashtirilsin;

75) 329-moddaning:

birinchi qismidagi “bevosita yoxud surishtiruv organlari yordamida” degan soʻzlar chiqarib tashlansin;

ikkinchi qismi “ushlab turish” degan soʻzlardan keyin “ushbu Kodeks 162-moddasining ikkinchi qismiga muvofiq shaxsiy tintuv va olib qoʻyish” degan soʻzlar bilan toʻldirilsin;

uchinchi qismidagi “surishtiruvchi yoki tergovchining” degan soʻzlar “surishtiruvchi, tergovchi yoki tergovga qadar tekshiruvni amalga oshiruvchi organ mansabdor shaxsining” degan soʻzlar bilan almashtirilsin;

76) 330-moddaning birinchi xatboshisi quyidagi tahrirda bayon etilsin:

“Jinoyatga oid maʼlumotlar olingan yoki bunday maʼlumotlar bevosita aniqlangan har bir holda quyidagi qarorlardan biri qabul qilinadi”;

77) 331-moddaning:

birinchi qismi “prokuror” degan soʻzdan keyin “shuningdek tergovga qadar tekshiruvni amalga oshiruvchi organning mansabdor shaxsi” degan soʻzlar bilan toʻldirilsin;

uchinchi qismi quyidagi tahrirda bayon etilsin:

“Jinoyat ishini qoʻzgʻatish toʻgʻrisidagi qarorning koʻchirma nusxasi ushbu ishning tergov qilinishi ustidan nazoratni amalga oshirishi lozim boʻlgan prokurorga yuboriladi”;

78) 333-moddaning matni quyidagi tahrirda bayon etilsin:

“Ushbu Kodeks 83-moddasining 1 va 2-bandlarida hamda 84-moddasi birinchi qismining 1, 3 — 8-bandlarida nazarda tutilgan holatlar aniqlangan taqdirda, tergovga qadar tekshiruvni amalga oshiruvchi organning mansabdor shaxsi, surishtiruvchi, tergovchi yoki prokuror jinoyat ishini qoʻzgʻatishni rad qilish toʻgʻrisida qaror chiqaradi, jinoyat sodir etilganligi toʻgʻrisida xabar bergan fuqaro, korxona, muassasa, tashkilot, jamoat birlashmasi yoki mansabdor shaxs bu haqda xabardor qilinadi. Bunda ularga qaror ustidan shikoyat qilish huquqi va tartibi tushuntirilishi lozim. Jinoyat ishini qoʻzgʻatishni rad qilish toʻgʻrisidagi qarorning koʻchirma nusxasi prokurorga yuboriladi.

Ushbu Kodeks 84-moddasi birinchi qismining 2-bandida nazarda tutilgan holat surishtiruvchi, tergovchi yoki prokuror tomonidan aniqlangan taqdirda, jinoyat ishini qoʻzgʻatishni rad qilish ushbu Kodeksning 63-bobida nazarda tutilgan qoidalarga binoan sud tomonidan amalga oshiriladi.

Ushbu Kodeks 84-moddasi birinchi qismining 1, 2, 3-bandlarida nazarda tutilgan asoslarga koʻra jinoyat ishi qoʻzgʻatishni rad etishga, agar oʻziga nisbatan jinoyat ishi qoʻzgʻatishni rad etish toʻgʻrisidagi masala qoʻyilayotgan shaxs yoki vafot etgan shaxsning yaqin qarindoshlari bunga eʼtiroz bildirsa, yoʻl qoʻyilmaydi.

Tergovga qadar tekshiruvni amalga oshiruvchi organning mansabdor shaxsi tomonidan ushbu Kodeks 84-moddasi birinchi qismining 2-bandida nazarda tutilgan holat aniqlangan taqdirda, jinoyatga oid ariza, xabar va boshqa maʼlumotlar darhol prokurorga yuboriladi”.

79) 334-moddaning birinchi qismidagi “surishtiruvchi” degan soʻzlar “tergovga qadar tekshiruvni amalga oshiruvchi organning mansabdor shaxsi, surishtiruvchi” degan soʻzlar bilan almashtirilsin;

80) 336-moddaning matni quyidagi tahrirda bayon etilsin:

“Jinoyat ishini qoʻzgʻatish toʻgʻrisida qaror chiqarilganidan keyin:

1) prokuror ishni ushbu Kodeksning 345 va 3812-moddalariga muvofiq dastlabki tergov yoki surishtiruv organiga yuboradi yoxud oʻzi dastlabki tergov yoki surishtiruv yuritishga kirishadi;

2) tergovchi dastlabki tergovni yuritishga kirishadi va bu haqda darhol prokurorni xabardor qiladi yoki prokurorning roziligi bilan jinoyat ishini ushbu Kodeksning 345-moddasida belgilangan tergovning tegishliligiga koʻra boshqa dastlabki tergov organiga yoki ushbu Kodeksning 3812-moddasida belgilangan tergovning tegishliligiga koʻra surishtiruv organiga yuboradi;

3) surishtiruvchi surishtiruv yuritishga kirishadi va bu haqda darhol prokurorni xabardor qiladi yoki prokurorning roziligi bilan jinoyat ishini ushbu Kodeksning 3812-moddasida belgilangan tergovning tegishliligiga koʻra boshqa surishtiruv organiga yoki ushbu Kodeksning 345-moddasida belgilangan tergovning tegishliligiga koʻra dastlabki tergov organiga yuboradi;

4) tergovga qadar tekshiruvni amalga oshiruvchi organ boshligʻi jinoyat ishini ushbu Kodeksning 345 va 3812-moddalarida belgilangan tergovning tegishliligiga koʻra dastlabki tergov yoki surishtiruv organiga oʻtkazish uchun darhol prokurorga yuboradi. Jinoyat ishining tergovi tergovga qadar tekshiruvni amalga oshirgan organning surishtiruviga yoki dastlabki tergoviga tegishli boʻlgan taqdirda, jinoyat ishi prokurorni darhol xabardor qilgan holda surishtiruvni yoki dastlabki tergovni amalga oshirish uchun qabul qilinishi mumkin”.

81) 337-moddaning:

1-bandi quyidagi tahrirda bayon etilsin:

“1) jinoyat ishini qoʻzgʻatish toʻgʻrisidagi qarorni bekor qilishga va ish qoʻzgʻatishni rad qilishga”;

2-bandi quyidagi tahrirda bayon etilsin:

“2) jinoyat ishini qoʻzgʻatishni rad qilish toʻgʻrisidagi qarorni bekor qilishga va ayni vaqtda ish qoʻzgʻatishga haqlidir”;

82) 338-moddaning:

birinchi qismidagi “Surishtiruvchi yoki surishtiruv organi boshligʻining, tergovchining” degan soʻzlar chiqarib tashlansin;

ikkinchi qismidagi “Surishtiruvchining, surishtiruv organi boshligʻining” degan soʻzlar “Tergovga qadar tekshiruvni amalga oshiruvchi organ mansabdor shaxsining, surishtiruvchining” degan soʻzlar bilan almashtirilsin;

83) 42-bob chiqarib tashlansin;

84) 345-moddaning matni quyidagi tahrirda bayon etilsin:

“Ushbu moddaning ikkinchi — yettinchi qismlarida nazarda tutilgan jinoyat ishlari boʻyicha dastlabki tergov oʻtkazilishi shart.

Jinoyat kodeksining 97 – 1031, 108, 116, 141 – 149, 175, 180 – 1811-moddalarida, 184-moddasi uchinchi qismida, 186-moddasi ikkinchi, uchinchi va toʻrtinchi qismlarida, 1921 – 19211, 205 — 212, 215, 218 — 221, 230, 231-moddalarida, 232-moddasi ikkinchi qismida, 233 – 236, 2411–242, 265-moddalarida nazarda tutilgan jinoyatlarga doir ishlar boʻyicha, shuningdek qonunda koʻrsatilgan ayrim toifadagi mansabdor shaxslarning jinoyatlariga doir ishlar boʻyicha dastlabki tergov prokuratura organlarining tergovchilari tomonidan olib boriladi.

Jinoyat kodeksining 279 — 302-moddalarida nazarda tutilgan jinoyatlarga doir ishlar boʻyicha, shuningdek harbiy xizmatchilar tomonidan sodir etilgan jinoyatlarga doir ishlar boʻyicha dastlabki tergov harbiy prokuratura tergovchilari tomonidan olib boriladi.

Jinoyat kodeksining 150 — 163, 182, 223, 246-moddalarida nazarda tutilgan jinoyatlarga doir ishlar boʻyicha dastlabki tergov milliy xavfsizlik xizmati tergovchilari tomonidan olib boriladi.

Jinoyat kodeksining 104-moddasida, 105-moddasi ikkinchi qismida, 106, 107-moddalarida, 110-moddasi ikkinchi qismida, 113-moddasi uchinchi — beshinchi qismlarida, 114-moddasi uchinchi qismida, 117-moddasi ikkinchi va uchinchi qismlarida, 118, 119-moddalarida, 121-moddasi ikkinchi qismida, 124-moddasida, 127-moddasi ikkinchi va uchinchi qismlarida, 128-moddasi ikkinchi qismida, 129-moddasi ikkinchi qismida, 131-moddasi uchinchi va toʻrtinchi qismlarida, 133-moddasi ikkinchi qismida, 134, 135, 137-moddalarida, 138-moddasi ikkinchi qismida, 164–166-moddalarida, 168-moddasi ikkinchi va uchinchi qismlarida, 169-moddasi ikkinchi — toʻrtinchi qismlarida, 171-moddasi uchinchi qismida, 173-moddasi uchinchi qismida, 1861-moddasida, 1862-moddasi ikkinchi va uchinchi qismlarida, 193–204-moddalarida, 213-moddasi uchinchi va toʻrtinchi qismlarida, 214-moddasi uchinchi va toʻrtinchi qismlarida, 216, 217, 222-moddalarida, 225-moddasi uchinchi qismida, 226-moddasi ikkinchi qismida, 228-moddasi ikkinchi qismida, 243–245, 247–250-moddalarida, 2501-moddasi ikkinchi — toʻrtinchi qismlarida, 251–2551-moddalarida, 2552-moddasi ikkinchi — toʻrtinchi qismlarida, 256–258-moddalarida, 259-moddasi ikkinchi qismida, 260-moddasi ikkinchi va uchinchi qismlarida, 262-moddasi ikkinchi va uchinchi qismlarida, 263-moddasida, 2631-moddasi ikkinchi va uchinchi qismlarida, 264-moddasida, 266-moddasi ikkinchi va uchinchi qismlarida, 267-moddasida, 268-moddasi ikkinchi va uchinchi qismlarida, 269-moddasi ikkinchi va uchinchi qismlarida, 270-moddasi ikkinchi va uchinchi qismlarida, 271, 273-moddalarida, 274-moddasi ikkinchi qismida, 275-moddasida, 276-moddasi ikkinchi qismida, 277-moddasi uchinchi qismida, 278-moddasi ikkinchi va toʻrtinchi qismlarida nazarda tutilgan jinoyatlarga doir ishlar boʻyicha, shuningdek voyaga yetmaganlar sodir etgan jinoyatlarga doir barcha ishlar boʻyicha dastlabki tergov ichki ishlar organlarining tergovchilari tomonidan olib boriladi.

Jinoyat kodeksining 130-moddasi uchinchi qismida, 167-moddasi ikkinchi va uchinchi qismlarida, 176, 178, 1863, 188, 1881, 2441, 2442, 2591-moddalarida nazarda tutilgan jinoyatlarga doir ishlar boʻyicha dastlabki tergov ishni qoʻzgʻatgan organ tomonidan olib boriladi.

Jinoyat kodeksining 237–241-moddalarida nazarda tutilgan jinoyatlarga doir ishlar boʻyicha dastlabki tergov ushbu ish qoʻzgʻatilishiga sabab boʻlgan jinoyat qaysi organning tergoviga tegishli boʻlsa, oʻsha organ tomonidan olib boriladi.

Agar tergovni olib borishda boshqa dastlabki tergov organi tergoviga tegishli yangi jinoyat aniqlansa, ishni yuritayotgan dastlabki tergov organi faqat tegishli prokurorning roziligi bilan tergovni toʻliq hajmda tamomlashi mumkin.

Agar tergovni olib borishda surishtiruv organiga tegishli boʻlgan va tergov qilinayotgan jinoyat ishi bilan bogʻliq boʻlmagan yangi jinoyat aniqlansa, jinoyat ishini ajratish va boshqalarga oʻtkazish ushbu Kodeksning 332 va 3812-moddalariga muvofiq amalga oshiriladi. Bunda agar mazkur yangi jinoyat ushbu Kodeks 3812-moddasining ikkinchi qismida nazarda tutilgan jinoyatlar turkumiga kirsa, ajratilgan jinoyat ishi boʻyicha surishtiruvni amalga oshirish prokuror tomonidan surishtiruvchiga topshiriladi.

Turli dastlabki tergov organlari tergoviga tegishli jinoyat ishlari bitta ish yurituviga birlashtirilganda, prokuror tergovni olib borishni ogʻirroq jinoyat toʻgʻrisidagi jinoyat ishining tergovi qaysi organga tegishli boʻlsa, shu organga, jinoyatlarning xususiyati va ijtimoiy xavflilik darajasi teng boʻlganda esa, jinoyat ishini uzoqroq muddat davomida tergov qilayotgan organga topshiradi.

Oʻzbekiston Respublikasi Bosh prokurori yoki uning oʻrinbosarlari tergovning har tomonlama, toʻliq va xolisona olib borilishini taʼminlash maqsadida jinoyat ishini, tergovga tegishlilik qoidalaridan qatʼi nazar, quyidagi hollarda asoslantirilgan qarorga binoan bir dastlabki tergov organidan boshqasiga oʻtkazishga haqli:

1) agar jinoyat ishining tergovi tegishli boʻlgan organ jinoyatni hisobga olishdan ilgari yashirgan boʻlsa;

2) agar jinoyat ishining tergovi tegishli boʻlgan organning rahbari yoki rahbarning yaqin qarindoshi ish yuzasidan jabrlanuvchi, gumon qilinuvchi yoxud ayblanuvchi, fuqaroviy daʼvogar yoki fuqaroviy javobgar deb topilgan boʻlsa;

3) aybsizligi ayon boʻlgan shaxs ayblanuvchi tariqasida jalb etilganda yoki qamoqqa olish yoki uy qamogʻi tarzidagi ehtiyot chorasini qoʻllash toʻgʻrisida oldindan bila turib qonunga xilof ravishda iltimosnoma qoʻzgʻatilganda;

4) dastlabki tergovni olib borishda qiynoqqa solish va boshqa shafqatsiz, gʻayriinsoniy yoki qadr-qimmatni kamsituvchi muomala turlari qoʻllanilganda;

5) tergovning natijalariga va ish boʻyicha qonuniy qaror qabul qilinishiga salbiy taʼsir koʻrsatishi mumkin boʻlgan tarzda ushbu Kodeks talablari buzilganda”;

85) 3481-moddaning uchinchi qismidagi “ushbu Kodeksning 245, 341 va 351-moddalarida belgilangan tartibda hisoblanadi” degan soʻzlar “ushbu Kodeksning 245, 351 va 3817-moddalarida belgilangan tartibda hisoblanadi” degan soʻzlar bilan almashtirilsin;

86) 355-modda ikkinchi qismining 5-bandi quyidagi tahrirda bayon etilsin:

“5) tergovga qadar tekshiruvni amalga oshiruvchi organlarga va tezkor-qidiruv faoliyatini amalga oshiruvchi organlarga tergov harakatlarini yoki tezkor-qidiruv tadbirlarini olib borish toʻgʻrisida topshiriqlar va koʻrsatmalar beradi, shuningdek ulardan tergovchilar bajarayotgan tergov harakatlarini oʻtkazishda yordam berishni talab qiladi, oʻz topshiriqlari, koʻrsatmalari, talablari bajarilishi ustidan nazorat qilib boradi”;

87) 367-moddaning ikkinchi qismidagi “surishtiruv organi” degan soʻzlar “tezkor-qidiruv faoliyatini amalga oshiruvchi organ” degan soʻzlar bilan almashtirilsin;

88) quyidagi mazmundagi 461-bob bilan toʻldirilsin:

“461-bob. Surishtiruvning umumiy shartlari

3811-modda. Surishtiruvni amalga oshirishga vakolatli boʻlgan mansabdor shaxslar

Surishtiruvni ushbu Kodeksning 38-moddasida belgilangan organlarning surishtiruvchilari amalga oshiradi.

Surishtiruvni ushbu Kodeksda belgilangan hollarda prokurorlar va tergovchilar ham amalga oshirishi mumkin.

3812-modda. Jinoyat ishining tergovga tegishliligi

Surishtiruv quyidagilarning surishtiruvchilari tomonidan olib boriladi:

1) ichki ishlar organlarining — Jinoyat kodeksining 105-moddasi birinchi qismida, 109-moddasida, 110-moddasi birinchi qismida, 111, 112-moddalarida, 113-moddasi birinchi va ikkinchi qismlarida, 114-moddasi birinchi va ikkinchi qismlarida, 115-moddasida, 117-moddasi birinchi qismida, 120-moddasida, 121-moddasi birinchi qismida, 125, 126-moddalarida, 127-moddasi birinchi qismida, 128-moddasi birinchi qismida, 129-moddasi birinchi qismida, 131-moddasi birinchi va ikkinchi qismlarida, 132-moddasida, 133-moddasi birinchi qismida, 136-moddasida, 138-moddasi birinchi qismida, 139, 140-moddalarida, 168-moddasi birinchi qismida, 169-moddasi birinchi qismida, 170-moddasida, 171-moddasi birinchi va ikkinchi qismlarida, 172-moddasida, 173-moddasi birinchi va ikkinchi qismlarida, 185–1851-moddalarida, 1862-moddasi birinchi qismida, 213-moddasi birinchi va ikkinchi qismlarida, 214-moddasi birinchi va ikkinchi qismlarida, 224-moddasida, 225-moddasi birinchi va ikkinchi qismlarida, 226-moddasi birinchi qismida, 227-moddasida, 228-moddasi birinchi va uchinchi qismlarida, 2281–2293-moddalarida, 2501-moddasi birinchi qismida (bojxona toʻgʻrisidagi qonun hujjatlarini buzish bilan bogʻliq jinoyatlardan tashqari), 2552-moddasi birinchi qismida, 259-moddasi birinchi qismida, 260-moddasi birinchi qismida, 261-moddasida, 262-moddasi birinchi qismida, 2631-moddasi birinchi qismida, 266-moddasi birinchi qismida, 268-moddasi birinchi qismida, 269-moddasi birinchi qismida, 270-moddasi birinchi qismida, 274-moddasi birinchi qismida, 276-moddasi birinchi qismida, 277-moddasi birinchi va ikkinchi qismlarida, 278-moddasi birinchi va uchinchi qismlarida, 2781–2786-moddalarida nazarda tutilgan jinoyatlarga doir ishlar boʻyicha;

2) Oʻzbekiston Respublikasi Bosh prokuraturasi huzuridagi Majburiy ijro byurosi hamda uning joylardagi boʻlinmalari — Jinoyat kodeksining 122, 123, 1852-moddalarida, 232-moddasi birinchi qismida nazarda tutilgan jinoyatlarga doir ishlar boʻyicha;

3) Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti hamda uning joylardagi boʻlinmalari — Jinoyat kodeksining 177, 179, 183-moddalarida, 184-moddasi birinchi va ikkinchi qismlarida (bojxona toʻgʻrisidagi qonun hujjatlarini buzish bilan bogʻliq jinoyatlardan tashqari), 1841-moddasida, 186-moddasi birinchi qismida, 189–192-moddalarida nazarda tutilgan jinoyatlarga doir ishlar boʻyicha;

4) Oʻzbekiston Respublikasi Davlat bojxona qoʻmitasi hamda uning joylardagi boʻlinmalari — Jinoyat kodeksining 130-moddasi birinchi va ikkinchi qismlarida, 1301-moddasida, 184-moddasi birinchi va ikkinchi qismlarida, 2443-moddasida, 2501-moddasi birinchi qismida nazarda tutilgan bojxona toʻgʻrisidagi qonun hujjatlarini buzish bilan bogʻliq boʻlgan jinoyatlarga doir ishlar boʻyicha.

Jinoyat kodeksining 130-moddasi birinchi va ikkinchi qismlarida (bojxona toʻgʻrisidagi qonun hujjatlarini buzish bilan bogʻliq jinoyatlardan tashqari), 1301-moddasida (bojxona toʻgʻrisidagi qonun hujjatlarini buzish bilan bogʻliq jinoyatlardan tashqari), 167-moddasi birinchi qismida, 2443-moddasida (bojxona toʻgʻrisidagi qonun hujjatlarini buzish bilan bogʻliq jinoyatlardan tashqari) nazarda tutilgan jinoyatlarga doir ishlar boʻyicha surishtiruv ishni qoʻzgʻatgan organ tomonidan olib boriladi.

Jinoyat kodeksining 237-moddasi birinchi qismida, 238-moddasi birinchi va ikkinchi qismlarida, 239, 240-moddalarida nazarda tutilgan jinoyatlarga doir ishlar boʻyicha surishtiruv ushbu ish qoʻzgʻatilishiga sabab boʻlgan jinoyat qaysi organning tergoviga tegishli boʻlsa, oʻsha organ tomonidan olib boriladi.

Agar surishtiruvni olib borishda boshqa surishtiruv organi tergoviga tegishli yangi jinoyat aniqlansa, ishni yuritayotgan surishtiruv organi faqat tegishli prokurorning roziligi bilan surishtiruvni toʻliq hajmda tamomlashi mumkin.

Agar surishtiruvni olib borishda dastlabki tergov organiga tegishli boʻlgan va tergov qilinayotgan jinoyat ishi bilan bogʻliq boʻlgan yangi jinoyat aniqlansa, prokurorning roziligi bilan jinoyat ishi ushbu Kodeksning 345-moddasida belgilangan tergovning tegishliligiga koʻra dastlabki tergov organiga oʻtkaziladi.

Agar surishtiruvni olib borishda dastlabki tergov organiga tegishli boʻlgan va tergov qilinayotgan jinoyat ishi bilan bogʻliq boʻlmagan yangi jinoyat aniqlansa, jinoyat ishini ajratish va boshqalarga oʻtkazish ushbu Kodeksning 332 va 345-moddalariga muvofiq amalga oshiriladi. Bunda agar mazkur yangi jinoyat ushbu Kodeks 345-moddasining oltinchi qismida nazarda tutilgan jinoyatlar turkumiga kirsa, ajratilgan jinoyat ishi boʻyicha dastlabki tergovni amalga oshirish prokuror tomonidan dastlabki tergov organiga topshiriladi.

Turli surishtiruv organlariga tegishli jinoyat ishlari bitta ish yurituviga birlashtirilganda, prokuror surishtiruvni olib borishni ogʻirroq jinoyat toʻgʻrisidagi jinoyat ishining tergovi qaysi organga tegishli boʻlsa shu organga, jinoyatlarning xususiyati va ijtimoiy xavflilik darajasi teng boʻlganda esa, jinoyat ishi boʻyicha uzoqroq muddat davomida surishtiruv olib borayotgan organga topshiradi.

Surishtiruv organlari tergoviga tegishli boʻlgan jinoyat ishlari boshqa dastlabki tergov organlari tergoviga tegishli boʻlgan jinoyat ishlari bilan bitta ish yurituviga birlashtirilganda, prokuror tergovni olib borishni ushbu Kodeksning 345-moddasida belgilangan tergovga tegishlilik qoidalari boʻyicha dastlabki tergov organiga topshiradi.

Jinoyat qayerda sodir etilgan boʻlsa, jinoyat ishi oʻsha tuman (shahar) surishtiruv organining surishtiruvchisiga tegishli boʻladi.

Surishtiruv, agar ish holatlarini ancha tez, puxta, toʻla, xolisona, har tomonlama tekshirishga yordam bersa, ish qoʻzgʻatilgan joyda yoki gumon qilinuvchi yoxud ayblanuvchi yoki guvohlarning koʻpchiligi turgan erda ham oʻtkazilishi mumkin.

Yuqori turuvchi prokuror yoki yuqori turuvchi surishtiruv boʻlinmasi boshligʻining farmoyishiga asosan surishtiruv hududiy jihatdan tergovga tegishlilik qoidalariga rioya qilinmagan holda olib borilishi mumkin.

3813-modda. Surishtiruvni amalga oshirishda jinoyat-protsessual qonun hujjatlari normalarining qoʻllanilishi

Surishtiruv mazkur bobda belgilangan xususiyatlarni inobatga olgan holda ushbu Kodeks bilan belgilangan umumiy qoidalarga muvofiq amalga oshiriladi.

3814-modda. Surishtiruvchining topshiriqlarini bajarish

Har bir surishtiruvchi oʻz yurituvida boʻlgan jinoyat ishi boʻyicha Oʻzbekiston Respublikasining hududida istalgan joyda biror tergov harakatini shaxsan oʻzi bajarishga yoxud uni oʻtkazishni boshqa surishtiruvchiga topshirishga haqlidir.

Surishtiruvchining topshirigʻida ijro etuvchi uchun majburiy boʻlgan ijro muddati koʻrsatiladi. Topshiriqni bu muddat ichida ijro etishning iloji boʻlmasa, topshiriq olgan shaxs topshiriq bergan surishtiruvchiga topshiriq qachon bajarilishi mumkinligi toʻgʻrisida yozma ravishda, telegramma yoki telefonogramma orqali xabar qiladi va uning koʻrsatmalariga binoan topshiriqni bajarishni davom ettiradi.

3815-modda. Jinoyat ishini oʻtkazish

Jinoyat ishini bir surishtiruv organi doirasida bir surishtiruvchidan boshqa surishtiruvchiga oʻtkazish shu surishtiruv organining rahbari yoki surishtiruv boʻlinmasi boshligʻi tomonidan amalga oshiriladi.

Ishni bir surishtiruv boʻlinmasidan boshqasiga oʻtkazish yuqori surishtiruv organi rahbari yoki yuqori surishtiruv boʻlinmasining boshligʻi tomonidan prokuror roziligi bilan amalga oshiriladi.

Ishni bir surishtiruv organidan boshqa surishtiruv organiga oʻtkazish prokuror roziligi bilan amalga oshiriladi.

Tergovning har tomonlama, toʻla va xolisona olib borilishini taʼminlash maqsadida prokuror quyidagi holatlarda ishni sudga qadar yuritishning har qanday bosqichida jinoyat ishini dastlabki tergov shaklida tergov qilish uchun dastlabki tergov organiga oʻtkazishi yoki oʻz ish yurituviga olishi mumkin:

1) ishda ayblanuvchi tariqasida ishtirok etish uchun jalb qilinishi lozim boʻlgan shaxsni aniqlash uchun dastlabki tergov organlari va tezkor-qidiruv faoliyatini amalga oshiruvchi organlarni jalb qilgan holda qoʻshimcha tergov va protsessual choralarni qoʻllash zarur boʻlganda;

2) ushbu Kodeksning 345-moddasi oʻn birinchi qismi 1–5-bandlarida nazarda tutilganda.

Ushbu moddaning toʻrtinchi qismida nazarda tutilgan asoslar boʻyicha jinoyat ishini oʻtkazish haqida prokuror asoslantirilgan qaror chiqaradi.

3816-modda. Surishtiruvning boshlanishi

Surishtiruvchi jinoyat ishini qoʻzgʻatib, uni oʻz ish yurituviga oladi va bu haqda ish qoʻzgʻatish toʻgʻrisidagi qarorga yozib qoʻyadi. Basharti surishtiruvchiga oldin qoʻzgʻatilgan ish berilgan boʻlsa, u ishni oʻz yurituviga olganligi toʻgʻrisida qaror chiqaradi, shundan soʻng surishtiruvni boshlaydi.

3817-modda. Surishtiruv yuritish muddati

Surishtiruv jinoyat ishi qoʻzgʻatilgan kundan boshlab bir oydan oshmagan muddatda tamomlanishi lozim.

Jinoyat ishlari birlashtirilayotganda ular boʻyicha ish yuritish muddati uzoqroq muddat davomida tergov qilingan jinoyat ishi boʻyicha belgilanadi. Bunda qolgan jinoyat ishlari boʻyicha ish yuritish muddati uzoqroq tergov qilingan ishning muddati bilan qamrab olinadi va qoʻshimcha ravishda hisobga olinmaydi.

Alohida ish yurituviga ajratilgan jinoyat ishi boʻyicha surishtiruv muddati, agar jinoyat ishi yangi jinoyat boʻyicha yoki yangi shaxsga nisbatan ajratilayotgan boʻlsa, tegishli qaror chiqarilgan kundan eʼtiboran hisoblanadi.

Qolgan hollarda muddat bu jinoyat ishi qaysi jinoyat ishidan alohida ish yurituviga ajratilgan boʻlsa, oʻsha jinoyat ishi qoʻzgʻatilgan paytdan eʼtiboran hisoblanadi.

Ish ayblov dalolatnomasi bilan, ishni tibbiy yoʻsindagi majburlov choralarini qoʻllash yoxud taraflarning yarashuvi uchun sudga yuborish toʻgʻrisidagi qaror bilan, amnistiya aktiga asosan jinoyat ishini tugatish haqida sudga iltimosnoma kiritish toʻgʻrisidagi taqdimnoma bilan prokurorga topshirilgan kuni yoxud ishni tugatish haqida qaror chiqarilgan kuni surishtiruv tamomlangan hisoblanadi.

Surishtiruv muddatiga quyidagilar kirmaydi:

1) ayblanuvchi, himoyachi, shuningdek jabrlanuvchi, fuqaroviy daʼvogar, fuqaroviy javobgar va ularning vakillari ish materiallari bilan tanishib chiqqan vaqt;

2) surishtiruv toʻxtatib turilgan vaqt;

3) qoʻshimcha surishtiruv oʻtkazish uchun prokuror tomonidan qaytarilgan ish surishtiruvchiga kelib tushgunga qadar oʻtgan vaqt.

Ushbu moddaning birinchi qismida belgilangan surishtiruv muddati prokuror tomonidan yigirma kungacha uzaytirilishi mumkin.

Ish qoʻshimcha surishtiruv oʻtkazish uchun qaytarib yuborilganda, shuningdek toʻxtatilgan yoki tugatilgan ish qayta tiklanganda qoʻshimcha surishtiruv muddati mazkur ishni surishtiruvchi qabul qilgan paytdan eʼtiboran oʻn kun doirasida belgilanadi.

3818-modda. Surishtiruvning surishtiruvchilar guruhi tomonidan amalga oshirilishi hamda tergov harakatlarining bir necha surishtiruvchilar tomonidan bajarilishi

Jinoyat ishi koʻp mehnat talab etsa, juda murakkab yoki oʻta dolzarb boʻlsa, prokuror yoki surishtiruv boʻlinmasining boshligʻi shu ish boʻyicha surishtiruv ishlarini yuritishni doimiy yoki maxsus tuzilgan surishtiruvchilar guruhiga topshirishi mumkin.

Surishtiruvchilar guruhini tuzish tartibi, guruh rahbari va aʼzolarining vakolatlari, shuningdek tergov harakatlarining bir necha surishtiruvchilar tomonidan bajarilishi tartibi ushbu Kodeksning 354–357-moddalarida belgilangan tergovchilar guruhini tuzish, guruh rahbarining va guruh aʼzolari boʻlgan tergovchilarning vakolatlari, shuningdek tergov harakatlarini bir necha tergovchilar tomonidan bajarish tartibi bilan bir xil belgilanadi.

3819-modda. Surishtiruvni toʻxtatish

Surishtiruv surishtiruvchining qarori bilan ushbu Kodeksning 364–371-moddalarida belgilangan hollarda va tartibda toʻxtatiladi.

Shu bilan birga surishtiruvchi tomonidan faqat ayblanuvchi tariqasida ishda ishtirok etishga jalb qilinishi toʻgʻrisida qaror chiqarilgan shaxsga nisbatan qidiruv eʼlon qilinishi mumkin.

Agar surishtiruv ushbu Kodeksning 364-moddasi 1-bandida belgilangan asoslarga koʻra toʻxtatilgan boʻlsa, surishtiruvchi tezkor-qidiruv faoliyatini amalga oshiruvchi organlar orqali ishda ayblanuvchi tariqasida ishtirok etishga jalb qilinishi lozim boʻlgan shaxsni aniqlash va uni javobgarlikka tortish choralarini koʻrishi shart.

38110-modda. Surishtiruvni tamomlash turlari

Surishtiruv jinoyat ishini tugatish toʻgʻrisida qaror chiqarish, ayblov dalolatnomasi, ishni tibbiy yoʻsindagi majburlov choralarini qoʻllash yoki taraflarning yarashuvi uchun sudga yuborish toʻgʻrisida qaror chiqarish yoxud amnistiya aktiga asosan jinoyat ishini tugatish haqida sudga iltimosnoma kiritish toʻgʻrisida taqdimnoma tayyorlash bilan tamomlanadi.

38111-modda. Jinoyat ishini tugatish

Jinoyat ishi ushbu Kodeksning 83 va 84-moddalarida nazarda tutilgan asoslar mavjud boʻlganda tugatiladi.

Ushbu Kodeks 84-moddasi birinchi qismining 2-bandida nazarda tutilgan asos mavjud boʻlganda jinoyat ishini tugatish ushbu Kodeksning 63-bobida nazarda tutilgan qoidalarga binoan sud tomonidan amalga oshiriladi.

Surishtiruvchining jinoyat ishini tugatish toʻgʻrisidagi qarori ushbu Kodeksning 374-moddasida nazarda tutilgan talablarga rioya etilgan holda tuziladi.

Surishtiruvchi ishni tugatish toʻgʻrisida qaror chiqargach, bu haqda gumon qilinuvchiga, ayblanuvchiga, himoyachiga, shuningdek jabrlanuvchiga, fuqaroviy daʼvogarga, fuqaroviy javobgarga va ularning vakillariga, xuddi shuningdek ish korxona, muassasa, tashkilot yoki fuqaroning bergan xabari bilan qoʻzgʻatilgan boʻlsa, shu korxona, muassasa, tashkilot vakillariga yoxud fuqaroga xabar qiladi. Ayni vaqtda ularga ishni tugatish toʻgʻrisidagi qaror ustidan prokurorga shikoyat qilish huquqi tushuntiriladi.

Harbiy xizmatga chaqiriluvchi shaxsga nisbatan ish tugatilganda surishtiruvchi bu haqda yetti kunlik muddat ichida yozma tarzda tuman (shahar) mudofaa ishlari boʻlimiga xabar qiladi.

38112-modda. Ayblov dalolatnomasi

Surishtiruvchi toʻplangan dalillarni ishni sudga oʻtkazish uchun yetarli deb topsa, ayblov dalolatnomasi tuzadi.

Ayblov dalolatnomasi soddalashtirilgan shaklda tuziladi va surishtiruvda aniqlangan holatlar, ayblanuvchining shaxsi toʻgʻrisidagi maʼlumotlar, eʼlon qilingan ayblovning mazmuni, shuningdek surishtiruv davomida aniqlangan va ushbu jinoyat ishi uchun ahamiyatli boʻlgan boshqa maʼlumotlarni oʻz ichiga oladi. Ayblov dalolatnomasining namunaviy shakli Oʻzbekiston Respublikasi Bosh prokurori tomonidan tasdiqlanadi.

Ayblov dalolatnomasiga sud majlisiga chaqirilishi lozim boʻlgan shaxslarning yashash joyi koʻrsatilgan roʻyxati, shuningdek gumon qilinuvchi va ayblanuvchiga nisbatan qancha vaqt qamoqqa olish yoki uy qamogʻi tariqasidagi ehtiyot chorasi qoʻllanilganligi, ashyoviy dalillar, hukmning fuqaroviy daʼvo va boshqa mulkiy undirishlar boʻyicha qismi ijrosini taʼminlash choralari, sud chiqimlari toʻgʻrisidagi maʼlumotlar ilova qilinadi.

Sud majlisiga chaqirilishi lozim boʻlgan shaxslarning xavfsizligini taʼminlash zarur boʻlgan hollarda, ushbu Kodeksning 380-moddasi uchinchi qismiga muvofiq mazkur shaxslarning tegishli roʻyxati tuziladi va sudga taqdim etiladi.

38113-modda. Jinoyat ishi tamomlanganidan keyin undagi materiallar bilan tanishib chiqish huquqini taʼminlash

Ayblov dalolatnomasi tuzilganidan soʻng surishtiruvchi ayblanuvchi va himoyachiga surishtiruv tamomlanganligini eʼlon qiladi, ularga ishdagi barcha materiallar bilan tanishib chiqishga doir huquqlarini tushuntiradi va tanishib chiqish uchun ishni tikilgan hamda raqamlangan koʻrinishda, hujjatlarning har bir jildini roʻyxati bilan taqdim etadi.

Basharti ish tugatilgan boʻlsa, surishtiruvchi bu haqda va ish materiallari bilan tanishish huquqi haqida gumon qilinuvchini, ayblanuvchini, himoyachini xabardor qiladi hamda ularning iltimosiga binoan ularga tanishib chiqish uchun ishni taqdim etadi.

Surishtiruvchi surishtiruv tamomlanganligi va ish ayblov dalolatnomasi bilan sudga yuborilishi yoki ish tugatilganligi toʻgʻrisida jabrlanuvchi, fuqaroviy daʼvogar, fuqaroviy javobgar va ularning vakillariga xabar qiladi, basharti ular xohlasalar, barcha ish materiallari bilan tanishib chiqish huquqiga ega ekanliklarini tushuntiradi. Soʻng surishtiruvchi koʻrsatib oʻtilgan protsess ishtirokchilarining iltimosiga muvofiq, tanishib chiqish uchun ularga ishni taqdim etadi.

Jabrlanuvchilar, guvohlar, xolislar va protsessning boshqa ishtirokchilari xavfsizligini taʼminlash maqsadida tergov harakatlari bayonnomasining kirish qismlari tanishib chiqish uchun taqdim qilinmasligi mumkin. Bunday hollarda bayonnomalarning koʻrsatib oʻtilgan protsess ishtirokchilari toʻgʻrisidagi maʼlumotlarni oʻz ichiga olgan kirish qismlari muhrlangan holda saqlanadi.

Basharti ayblanuvchining himoyachisi yoki jabrlanuvchi, fuqaroviy daʼvogar, fuqaroviy javobgarning vakili uzrli sabablarga binoan belgilangan vaqtda ish materiallari bilan tanishib chiqish uchun kela olmasa, surishtiruvchi tanishib chiqish muddatini koʻpi bilan besh sutkaga kechiktirishi mumkin. Himoyachi yoki vakil bu muddat ichida kelmagan taqdirda ayblanuvchiga boshqa himoyachini taklif qilish, jabrlanuvchi, fuqaroviy daʼvogar yoki fuqaroviy javobgarga boshqa vakil chaqirish uchun imkoniyat yaratiladi.

Ish bilan tanishib chiqayotgan shaxs ishdagi hujjatlardan koʻchirmalar yozib olishga haqlidir, davlat sirlarini yoki qonun bilan qoʻriqlanadigan boshqa sirlarni oʻz ichiga olgan maʼlumotlar bundan mustasno. Surishtiruvchi ayblov dalolatnomasi va ishdagi materiallar bilan tanishib chiqqanlik toʻgʻrisida bayonnoma tuzadi.

Ish bilan tanishib chiqqanidan keyingi ogʻzaki iltimoslarni surishtiruvchi bayonnomaga kiritadi. Protsess ishtirokchisi yozma tarzda alohida iltimosnoma berishi mumkin, bu haqda bayonnomada yozib qoʻyiladi.

38114-modda. Iltimoslar qilish va ularni koʻrib chiqish tartibi

Ayblanuvchi, himoyachi, shuningdek jabrlanuvchi, fuqaroviy daʼvogar, fuqaroviy javobgar va ularning vakillari ish bilan tanishib chiqishgach yoki biror sababga koʻra tanishib chiqishdan bosh tortganlaridan keyin surishtiruvchi ulardan qoʻshimcha surishtiruv harakatlarini oʻtkazish yoki yangi qarorlar qabul qilish xususida iltimoslari bor yoki yoʻqligini aniqlaydi.

Taraflarning arizasiga binoan ularga iltimosnomalar tayyorlash va taqdim qilish uchun ikki sutka doirasida vaqt berilishi mumkin. Surishtiruvchi iltimosnomani toʻla yoki qisman rad qilish toʻgʻrisida qaror chiqaradi va bu haqda iltimosnoma berilgan vaqtdan boshlab uch sutka ichida arizachiga xabar beradi.

Arizachi iltimosni qondirish rad qilinganligi toʻgʻrisidagi qaror bilan tanishib chiqqanidan keyin ikki sutka ichida prokurorga rad etilganlik ustidan shikoyat qilishi mumkin.

38115-modda. Jinoyat ishi bilan qayta tanishtirish

Surishtiruvchi iltimos qondirilganidan keyin, u kim tomonidan va kimlarning manfaatlari yoʻlida bildirilgan boʻlishidan qatʼi nazar, zarur hollarda bayon qilingan tergov va boshqa protsessual harakatlarni oʻtkazgandan hamda ayblov dalolatnomasini qayta tuzgandan soʻng, ayblanuvchi, himoyachiga, shuningdek jabrlanuvchi, fuqaroviy daʼvogar, fuqaroviy javobgar va ularning vakillariga ayblov dalolatnomasi va jinoyat ishining boshqa materiallari bilan yana tanishib chiqish imkoniyatini beradi.

38116-modda. Jinoyat ishining prokurorga yuborilishi

Ayblov dalolatnomasi surishtiruvchi tomonidan imzolanadi va surishtiruv boʻlinmasi boshligʻi bilan kelishilganidan soʻng, jinoyat ishi darhol prokurorga yuboriladi.

38117-modda. Surishtiruvchining harakatlari hamda qarorlari ustidan shikoyat berish

Surishtiruvchining harakatlari va qarorlari ustidan shikoyatlar surishtiruv boʻlinmasi boshligʻiga yoki ishni tergov qilishda qonunlarga rioya etilishi ustidan nazorat olib borayotgan prokurorga beriladi”;

89) 47-bobning nomi “Surishtiruv va dastlabki tergov organlari” degan soʻzlardan keyin “shuningdek tergovga qadar tekshiruvni amalga oshiruvchi organlarning” degan soʻzlar bilan toʻldirilsin;

90) 382-modda:

uchinchi qismining:

ikkinchi xatboshisi “tergov organlaridan” degan soʻzlardan keyin “hamda tergovga qadar tekshiruvni yoki tezkor-qidiruv faoliyatini amalga oshiruvchi organlardan” degan soʻzlar bilan toʻldirilsin;

uchinchi xatboshisi “surishtiruvchilar va tergovchilarning” degan soʻzlardan keyin “shuningdek tergovga qadar tekshiruvni amalga oshiruvchi organ mansabdor shaxsining” degan soʻzlar bilan toʻldirilsin;

toʻqqizinchi xatboshisi quyidagi tahrirda bayon etilsin:

“tergovga qadar tekshiruvni yoki tezkor-qidiruv faoliyatini amalga oshiruvchi organlarga shaxslarni ushlash, majburiy keltirish, qidirish haqidagi qarorlar, sudning qamoqqa olish tarzidagi ehtiyot chorasini qoʻllash toʻgʻrisidagi ajrimini ijro etishni, shuningdek prokuror yoki prokuratura tergovchisi yurituvidagi ishlar yuzasidan jinoyatlarni ochish va jinoyat sodir etgan shaxslarni aniqlash uchun zarur choralarni koʻrish toʻgʻrisida koʻrsatmalar beradi”;

oʻn ikkinchi xatboshisi “dastlabki tergov” degan soʻzlardan keyin “va surishtiruv” degan soʻzlar bilan toʻldirilsin;

oʻn toʻrtinchi xatboshisi quyidagi tahrirda bayon etilsin:

“jinoyat ishini prokuraturaning bir tergovchisidan boshqasiga, ushbu Kodeksda belgilangan hollarda va tartibda esa, bir dastlabki tergov va surishtiruv organidan boshqa dastlabki tergov va surishtiruv organiga oʻtkazadi”;

oʻn oltinchi xatboshisi quyidagi tahrirda bayon etilsin:

“jinoyat ishlari qoʻzgʻatadi yoki ularni qoʻzgʻatishni rad etadi, ishlarni tugatadi yoxud yuritilishini toʻxtatadi; qonunda nazarda tutilgan hollarda tergovchi yoki surishtiruvchining ishni tugatishiga rozilik beradi; ayblov xulosasi, ayblov dalolatnomasi yoki qarorini tasdiqlaydi, ishlarni sudga yuboradi”;

toʻrtinchi qismi “tergov organlariga” degan soʻzlardan keyin “hamda tergovga qadar tekshiruvni yoki tezkor-qidiruv faoliyatini amalga oshiruvchi organlarga” degan soʻzlar bilan toʻldirilsin;

91) 383-moddaning matni “ayblov xulosasi” degan soʻzlardan keyin “yoki ayblov dalolatnomasini” degan soʻzlar bilan toʻldirilsin;

92) 384-modda quyidagi tahrirda bayon etilsin:

“384-modda. Ayblov xulosasi yoki ayblov dalolatnomasi bilan kelgan jinoyat ishi yuzasidan prokuror hal etishi lozim boʻlgan masalalar

Prokuror yoki uning oʻrinbosari tergovchidan ayblov xulosasi yoki surishtiruvchidan ayblov dalolatnomasi bilan kelgan jinoyat ishini oʻrganib chiqishi va:

1) ayblanuvchi zimmasiga qoʻyilayotgan qilmish sodir etilgan yoki etilmaganligini va bu qilmishda jinoyat tarkibi bor-yoʻqligini;

2) qoʻyilgan ayb ishdagi mavjud dalillar bilan asoslantirilgan-asoslantirilmaganligini;

3) ayblanuvchining isbotlangan barcha jinoiy qilmishlari ayblov mazmuniga kiritilgan-kiritilmaganligini;

4) jinoyati fosh qilingan barcha shaxslar ayblanuvchi tariqasida ishda ishtirok etishga jalb qilingan-qilinmaganligini;

5) ayblovni yoki ishni tugatishga sabab boʻladigan holatlar bor-yoʻqligini;

6) ayblanuvchining qilmishlariga toʻgʻri yoki notoʻgʻri tavsif berilganligini;

7) tergovga tegishlilik qoidalariga rioya qilinganligini;

8) ehtiyot chorasi toʻgʻri yoki notoʻgʻri tanlanganligini;

9) fuqaroviy daʼvoni va boshqa mulkiy undirishlarni taʼminlash choralari koʻrilgan-koʻrilmaganligini;

10) jinoyatning sabablari va uning sodir etilishiga imkon bergan shart-sharoitlar aniqlangan-aniqlanmaganligini hamda ularga barham berish choralari koʻrilgan-koʻrilmaganligini;

11) tergov sinchkovlik bilan, har tomonlama, toʻla va xolisona oʻtkazilgan-oʻtkazilmaganligini, barcha vajlar tekshirilganligini va himoyaning iltimosnomalari koʻrib chiqilganligini;

12) ishni birlashtirishda yoki ajratishda ushbu Kodeksning 332-moddasi talablariga rioya etilgan-etilmaganligini;

13) ayblov xulosasi yoki ayblov dalolatnomasi ushbu Kodeksning 379, 380 va 38112-moddalarida nazarda tutilgan talablarga muvofiq tuzilgan-tuzilmaganligini;

14) surishtiruvchi va tergovchi ushbu Kodeksning boshqa talablariga rioya qilgan-qilmaganligini tekshirishi shart”;

93) 385-moddaning:

nomi “ayblov xulosasi” degan soʻzlardan keyin “yoki ayblov dalolatnomasi” degan soʻzlar bilan toʻldirilsin;

birinchi qismi quyidagi tahrirda bayon etilsin:

“Prokuror yoki uning oʻrinbosari ayblov xulosasi yoki ayblov dalolatnomasi bilan kelgan jinoyat ishini koʻpi bilan besh sutkada koʻrib chiqishi va quyidagi qarorlardan birini qabul qilishi shart:

1) ishni sudga yuborish uchun asoslar mavjud deb topib, ayblov xulosasi yoki ayblov dalolatnomasini tasdiqlash;

2) oʻz qarori bilan ayblov mazmunidan ayrim bandlarni chiqarib tashlash, yengilroq jinoyatni nazarda tutuvchi qonunni qoʻllash va shu oʻzgartirishlar bilan ayblov xulosasi yoki ayblov dalolatnomasini tasdiqlash;

3) qoʻshimcha tergov oʻtkazish uchun ishni oʻz koʻrsatmalari bilan surishtiruvchi yoki tergovchiga qaytarish;

4) surishtiruv oʻtkazilgan jinoyat ishini tergovga tegishlilik qoidalari buzilganligi aniqlangan yoki ushbu Kodeksning 3815-moddasi toʻrtinchi qismida nazarda tutilgan hollarda dastlabki tergov organiga oʻtkazish;

5) ishni yuritishni toʻxtatish;

6) ishni tugatish;

7) amnistiya aktiga asosan jinoyat ishini tugatish toʻgʻrisida sudga iltimosnoma kiritish”;

94) 386-moddaning matni “Ayblov xulosasi” degan soʻzlardan keyin “yoki ayblov dalolatnomasi” degan soʻzlar bilan toʻldirilsin;

95) 387-moddaning matni “Dastlabki tergovda” degan soʻzlardan keyin “yoki surishtiruvda” degan soʻzlar bilan toʻldirilsin;

96) 388-modda:

birinchi qismi “ayblov xulosasini” degan soʻzlardan keyin “yoki ayblov dalolatnomasini” degan soʻzlar bilan toʻldirilsin;

ikkinchi qismining ikkinchi jumlasi quyidagi tahrirda bayon etilsin:

“Ayni vaqtda prokuror yoki uning oʻrinbosari ayblanuvchiga va himoyachiga ayblov xulosasi yoki ayblov dalolatnomasi va unga qilingan ilovalarning tasdiqlangan nusxalarini yuboradi, sud majlisiga chaqirilishi lozim boʻlgan shaxslar roʻyxati bundan mustasno, basharti ayblov xulosasi yoki ayblov dalolatnomasi yoxud ilovaga oʻzgartishlar kiritilgan boʻlsa, ularni oʻzgartirish toʻgʻrisidagi qarorning nusxasi ham yuboriladi”;

97) 391-moddaning ikkinchi qismi “dastlabki tergov” degan soʻzlardan keyin “yoki surishtiruv” degan soʻzlar bilan toʻldirilsin;

98) 392-moddaning birinchi qismi “dastlabki tergov” degan soʻzlardan keyin “yoki surishtiruv” degan soʻzlar bilan toʻldirilsin;

99) 395-modda birinchi qismining:

birinchi xatboshisi “xulosasi bilan yoki” degan soʻzlardan keyin “ayblov dalolatnomasi yoxud” degan soʻzlar bilan toʻldirilsin;

4-bandi quyidagi tahrirda bayon etilsin:

“4) dastlabki tergov yoki surishtiruvning texnik yoʻsindagi kamchiliklarini bartaraf etish uchun ishni ayblov xulosasi yoki ayblov dalolatnomasini tasdiqlagan prokurorga yuborish toʻgʻrisida”;

100) 396-moddaning 7-bandi “ayblov xulosasi” degan soʻzlardan keyin “yoki ayblov dalolatnomasi” degan soʻzlar bilan toʻldirilsin;

101) 398-moddaning matni quyidagi tahrirda bayon etilsin:

“Sudya surishtiruv yoki dastlabki tergov yuritilganda jinoyat oqibatida keltirilgan mulkiy zarar qoplanishini taʼminlash choralari koʻrilmaganligini va bunday choralar bevosita sud tomonidan koʻrilishi mumkin emasligini aniqlasa, surishtiruvchi yoki tergovchining zimmasiga zarur choralar koʻrish vazifasini yuklaydi”;

102) 400-moddaning matni “koʻrish uchun” degan soʻzlardan keyin “ayblov dalolatnomasi yoki” degan soʻzlar bilan toʻldirilsin;

103) 402-moddaning matni “basharti ular” degan soʻzlardan keyin “surishtiruv yoki” degan soʻzlar bilan toʻldirilsin;

104) quyidagi mazmundagi 4051-modda bilan toʻldirilsin:

“4051-modda. Ayblov dalolatnomasi bilan kelgan jinoyat ishini sudda muhokama qilish muddatlari

Ayblov dalolatnomasi bilan kelgan jinoyat ishini sudda muhokama qilish muddati ishni muhokama qilish boshlangan kundan eʼtiboran bir oydan oshmasligi kerak.

Jinoyat ishini koʻrish toʻxtatib turilgan vaqt ishni muhokama qilish muddatiga kirmaydi.

Ushbu moddaning birinchi qismida nazarda tutilgan muddat birinchi instansiya sudining ajrimiga asosan Qoraqalpogʻiston Respublikasi jinoyat ishlari boʻyicha sudining, jinoyat ishlari boʻyicha viloyat, Toshkent shahar sudlarining, Oʻzbekiston Respublikasi harbiy sudining raisi tomonidan ikki oygacha uzaytirilishi mumkin”;

105) 415-moddaning ikkinchi qismi “Sud” degan soʻzdan keyin “surishtiruvda” degan soʻz bilan toʻldirilsin;

106) 4151-modda quyidagi tahrirda bayon etilsin:

“4151-modda. Surishtiruvning, dastlabki tergovning toʻliq emasligini yoki jinoyat-protsessual qonuni normalarining jiddiy buzilishlarini bartaraf etish

Surishtiruv, dastlabki tergovning toʻliq emasligi yoki jinoyat-protsessual qonuni normalarining jiddiy buzilishlari jinoyat ishini koʻrib chiqish chogʻida sud tomonidan bartaraf etiladi.

Sudlanuvchiga nisbatan ayblovni ogʻirrogʻi bilan yoki haqiqiy ahvolga koʻra dastlabki ayblovdan jiddiy farq qiladigan ayblov bilan almashtirish uchun yoki boshqa shaxsni ishda ayblanuvchi tariqasida ishtirok etishga jalb qilish uchun asoslar aniqlangan taqdirda, sud surishtiruv, dastlabki tergovning toʻliq emasligini yoki jinoyat-protsessual qonuni normalarining jiddiy buzilishlarini ushbu Kodeksning 416 va 417-moddalariga muvofiq bartaraf etadi”;

107) 416-moddaning:

beshinchi qismi “uning ijrosini” degan soʻzlardan keyin “ayblov dalolatnomasi yoki” degan soʻzlar bilan toʻldirilsin;

oltinchi qismi “taqdim etadi” degan soʻzlardan keyin “ayblov dalolatnomasi yoki” degan soʻzlar bilan toʻldirilsin;

sakkizinchi qismi “qoʻshimcha dalillar va” degan soʻzlardan keyin “ayblov dalolatnomasi yoki” degan soʻzlar bilan toʻldirilsin;

108) 417-moddaning:

ikkinchi qismi “ish boʻyicha” degan soʻzlardan keyin “ayblov dalolatnomasi yoki” degan soʻzlar bilan toʻldirilsin;

toʻrtinchi qismi quyidagi tahrirda bayon etilsin:

“Sud ajrimini ijro etish natijalariga koʻra davlat ayblovini qoʻllab-quvvatlovchi prokuror sudga yangidan tuzilgan ayblov xulosasi yoki ayblov dalolatnomasi yoxud ularga qoʻshimchani taqdim etadi hamda uning koʻchirma nusxasini sudlanuvchiga va uning himoyachisiga topshiradi”;

yettinchi qismi quyidagi tahrirda bayon etilsin:

“Prokuror tomonidan ayblov dalolatnomasi yoki ayblov xulosasiga qoʻshimchalar taqdim etilganda, sud sudlanuvchiga, uning himoyachisiga prokuror tomonidan taqdim etilgan qoʻshimcha dalillar va ayblov dalolatnomasi yoki ayblov xulosasiga qoʻshimcha bilan tanishishga, shuningdek ushbu dalillarga va dalolatnoma yoki xulosaga eʼtirozlar taqdim etishga boʻlgan huquqini taʼminlaydi”;

109) 4201-moddaning uchinchi qismidagi “Kodeksning 405-moddasi” degan soʻzlar “Kodeksning 405 va 4051-moddalari” degan soʻzlar bilan almashtirilsin;

110) 434-moddaning ikkinchi qismi “ayblov xulosasining” degan soʻzlardan keyin “va ayblov dalolatnomasining” degan soʻzlar bilan toʻldirilsin;

111) 439-moddaning matni “qoʻyilgan ayblovni” degan soʻzlardan keyin “yoxud ayblov dalolatnomasida bayon etilgan ayblovning mazmunini” degan soʻzlar bilan toʻldirilsin;

112) 442-moddaning yettinchi qismi “ayblov xulosasiga” degan soʻzlardan keyin “va ayblov dalolatnomasiga” degan soʻzlar bilan toʻldirilsin;

113) 446-moddaning ikkinchi qismidagi “dastlabki tergovda” degan soʻzlar “sudgacha ish yuritish bosqichida” degan soʻzlar bilan almashtirilsin;

114) 447-moddaning ikkinchi qismidagi “surishtiruv organining boshligʻi” degan soʻzlar “surishtiruvchi” degan soʻz bilan almashtirilsin;

115) 481-moddaning ikkinchi qismi “tergov harakatlari oʻtkazishni” degan soʻzlardan keyin “surishtiruvchi yoki” degan soʻzlar bilan toʻldirilsin;

116) 485-moddaning:

nomidagi “Tergovning” degan soʻz “Surishtiruv yoki tergovning” degan soʻzlar bilan almashtirilsin;

3-bandi “tekshirilmagan boʻlsa” degan soʻzlardan keyin “surishtiruv” degan soʻz bilan toʻldirilsin;

117) 487-modda ikkinchi qismining:

4-bandidagi “dastlabki tergov” degan soʻzlar “surishtiruv yoki dastlabki tergov” degan soʻzlar bilan almashtirilsin;

9-bandi “boʻla turib” degan soʻzlardan keyin “surishtiruv” degan soʻz bilan toʻldirilsin;

118) 524-moddaning toʻrtinchi qismi “yoxud buni tergovchiga” degan soʻzlardan keyin “yoki surishtiruvchiga” degan soʻzlar bilan toʻldirilsin;

119) 548-moddaning birinchi xatboshisidagi “Dastlabki tergov” degan soʻzlar “Surishtiruv, dastlabki tergov” degan soʻzlar bilan almashtirilsin;

120) 553-moddaning ikkinchi qismi “Soʻroq qilish chogʻida” degan soʻzlardan keyin “surishtiruvchining” degan soʻz bilan toʻldirilsin;

121) 554-moddaning matni quyidagi tahrirda bayon etilsin:

“Voyaga yetmagan ayblanuvchini soʻroq qilishda surishtiruvchi, tergovchi yoki prokurorning ixtiyoriga koʻra pedagog yoki psixolog ishtirok etishi mumkin. U surishtiruvchining, tergovchining ruxsati bilan ayblanuvchiga savollar berishga, soʻroq tugaganidan soʻng esa, soʻroq bayonnomasi bilan tanishib, bayonnomadagi yozuvlarning toʻgʻriligi va toʻliqligi haqida oʻz fikrlarini yozma ravishda berishga haqlidir. Bu huquqlar surishtiruvchi, tergovchi tomonidan pedagog yoki psixologga voyaga yetmagan shaxsni soʻroq qilishdan oldin tushuntiriladi va bu haqda soʻroq bayonnomasida qayd qilinadi”;

122) 556-moddaning:

birinchi qismi “voyaga yetmaganning” degan soʻzlardan keyin “surishtiruvchi” degan soʻz bilan toʻldirilsin;

uchinchi qismidagi “Tergovchi” degan soʻz “Surishtiruvchi, tergovchi” degan soʻzlar bilan almashtirilsin;

123) 557-moddaning matni “yashash joyida qoldirib boʻlmasa, u” degan soʻzlardan keyin “surishtiruvchining” degan soʻz bilan toʻldirilsin;

124) 559-modda quyidagi tahrirda bayon etilsin:

“559-modda. Surishtiruvni, dastlabki tergovni tamomlash va voyaga yetmagan shaxsni ish materiallari bilan tanishtirish

Voyaga yetmagan ayblanuvchiga surishtiruv, dastlabki tergov tamomlanganligi eʼlon qilinib, unga ish materiallari koʻrsatilayotganda uning qonuniy vakili ishtirok etishga haqli. Surishtiruvchi, tergovchi qonuniy vakilga ayblanuvchini ish materiallari bilan tanishtirish vaqti va joyi toʻgʻrisida xabar berishi kerak.

Surishtiruvchi, tergovchi voyaga yetmagan ayblanuvchiga uning shaxsi shakllanishiga salbiy taʼsir qilishi mumkin boʻlgan ish materiallarini tanishish uchun koʻrsatmaslik toʻgʻrisida qaror chiqarishga haqlidir”;

125) 564-moddaning birinchi qismi “komissiyada koʻrishga topshirishda” degan soʻzlardan keyin “surishtiruvchi” degan soʻz bilan toʻldirilsin;

126) 566-moddaning ikkinchi qismi 3-bandidagi “mazkur shaxsning” degan soʻzlardan keyin “surishtiruv” degan soʻz bilan toʻldirilsin;

127) 567-moddaning matni quyidagi tahrirda bayon etilsin:

“Surishtiruvchi, tergovchi yoki sud ayblanuvchining, sudlanuvchining yoxud ishga ayblanuvchi, sudlanuvchi tariqasida jalb qilinmagan shaxsning ruhiy kasalligi masalalari yuzasidan uning jinoyat sodir etganligi yoki Jinoyat kodeksida nazarda tutilgan ijtimoiy xavfli qilmish sodir etganligi haqida ishonarli dalillar mavjud boʻlgan taqdirda, surishtiruvni, dastlabki tergovni yuritish va sud muhokamasi vaqtida mazkur shaxsning aqli norasoligi yoki ruhiy kasalligi toʻgʻrisida asosli shubha tugʻilgan boʻlsa, sud-psixiatriya ekspertizasi tayinlaydi”;

128) 570-moddaning:

birinchi qismi “ishtirok eta olsa” degan soʻzlardan keyin “surishtiruvchi” degan soʻz bilan toʻldirilsin;

ikkinchi qismi quyidagi tahrirda bayon etilsin:

“Oʻziga nisbatan tibbiy yoʻsindagi majburlov choralari qoʻllash toʻgʻrisida ish yuritilayotgan shaxs: unga qanday ijtimoiy xavfli qilmish sodir etganlik uchun ayb qoʻyilayotganini bilishga; koʻrsatuv berishga; dalillar taqdim qilishga; iltimoslar qilishga; surishtiruv yoki dastlabki tergov tamomlanganidan soʻng ishning barcha materiallari bilan tanishib chiqishga; himoyachiga ega boʻlishga; sud muhokamasida qatnashishga; rad qilishga; surishtiruvchi, tergovchi, prokuror va sudning harakatlari hamda qarorlari ustidan shikoyat qilishga haqlidir”;

uchinchi qismidagi “Tergovchi” degan soʻz “Surishtiruvchi, tergovchi” degan soʻzlar bilan almashtirilsin;

129) 571-moddaning uchinchi qismi quyidagi tahrirda bayon etilsin:

“Sud-psixiatriya ekspertizasi oʻtkazish toʻgʻrisidagi qaror yoki ajrimni ijroga yuborishdan oldin surishtiruvchi, tergovchi yoki sud u bilan himoyachini tanishtirishi va uning quyidagi huquqlarini taʼminlashi zarur: tayinlangan ekspertni yoki umuman ekspertiza muassasasini rad qilish; muayyan shaxsni ekspert qilib tayinlashni iltimos qilish; ekspertning oldiga qoʻshimcha savollar qoʻyish; ekspertiza oʻtkazilayotganda qatnashish uchun ruxsat soʻrash. Surishtiruvchi, tergovchi yoki sud himoyachining iltimosnomasini, basharti asoslar boʻlsa, qondiradi va ekspertizani tayinlash toʻgʻrisidagi qaror yoki ajrimga tegishli qoʻshimchalar va oʻzgartishlar kiritadi”;

130) 572-moddaning:

birinchi qismidagi “Tergovchi” degan soʻz “Surishtiruvchi, tergovchi” degan soʻzlar bilan almashtirilsin;

ikkinchi qismidagi “Tergovchi” degan soʻz “Surishtiruvchi, tergovchi” degan soʻzlar bilan almashtirilsin;

uchinchi qismi “shuningdek” degan soʻzdan keyin “surishtiruv yoki” degan soʻzlar bilan toʻldirilsin;

131) 573-moddaning:

birinchi qismi “toʻgʻrisidagi ishni” degan soʻzlardan keyin “surishtiruvchi” degan soʻz bilan toʻldirilsin;

ikkinchi qismining 2-bandi “ishni” degan soʻzdan keyin “surishtiruvchiga” degan soʻz bilan toʻldirilsin;

132) 585-moddaning yettinchi qismi “umumiy qoidalar boʻyicha” degan soʻzlardan keyin “surishtiruv yoki” degan soʻzlar bilan toʻldirilsin;

133) 586-modda toʻrtinchi qismining 1-bandi “umumiy qoidalar boʻyicha” degan soʻzlardan keyin “surishtiruv yoki” degan soʻzlar bilan toʻldirilsin;

134) 590-moddaning:

birinchi qismi “jinoyat sodir qilingan yoxud” degan soʻzlardan keyin “surishtiruv” degan soʻz bilan toʻldirilsin;

oʻn birinchi qismi “tergovga qadar tekshiruv oʻtkazish yoki” degan soʻzlardan keyin “surishtiruv yoxud” degan soʻzlar bilan toʻldirilsin;

135) 591-modda uchinchi qismining uchinchi xatboshisi quyidagi tahrirda bayon etilsin:

“prokurorning jinoyat ishini qoʻzgʻatishni rad qilish toʻgʻrisidagi yoki jinoyat ishini tugatish haqidagi iltimosnomasini qanoatlantirishni rad etish hamda tergovga qadar oʻtkazilgan tekshiruv yoki surishtiruv materiallarini yoxud jinoyat ishini umumiy qoidalar boʻyicha tegishincha tergovga qadar tekshiruv oʻtkazish yoki surishtiruv yoxud dastlabki tergov ishini yuritish uchun prokurorga yuborish toʻgʻrisidagi”;

136) 592-moddaning birinchi qismidagi “surishtiruv organi” degan soʻzlar “surishtiruvchi” degan soʻz bilan almashtirilsin;

137) 595-moddaning birinchi qismidagi “surishtiruv organi” degan soʻzlar “surishtiruvchi” degan soʻz bilan almashtirilsin.

3-modda. Oʻzbekiston Respublikasining 2012-yil 25-dekabrda qabul qilingan “Tezkor-qidiruv faoliyati toʻgʻrisida”gi OʻRQ-344-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2012-yil, № 12, 335-modda; 2016-yil, № 4, 125-modda) 11-moddasiga quyidagi oʻzgartishlar kiritilsin:

birinchi qismidagi “43-bobida” degan soʻzlar “43 va 461-boblarida” degan soʻzlar bilan almashtirilsin;

ikkinchi qismi quyidagi tahrirda bayon etilsin:

“Prokuratura organlari hamda tezkor-qidiruv faoliyatini amalga oshiruvchi organlar toifasiga kirmaydigan surishtiruv va dastlabki tergov organlari ish yurituvida boʻlgan jinoyat ishlari boʻyicha tezkor-qidiruv tadbirlari tezkor-qidiruv faoliyatini amalga oshiruvchi organlar tomonidan surishtiruvchining, tergovchining yozma topshirigʻi, prokurorning koʻrsatmasi va topshirigʻi asosida oʻtkaziladi”.

4-modda. Oʻzbekiston Respublikasi Ichki ishlar vazirligi, Bosh prokuraturasi, Adliya vazirligi va boshqa manfaatdor tashkilotlar ushbu Qonunning ijro etilishini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

5-modda. Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

6-modda. Ushbu Qonun rasmiy eʼlon qilingan kundan eʼtiboran kuchga kiradi hamda mazkur Qonun kuchga kirgandan soʻng aniqlangan (roʻyxatga olingan) jinoyatga oid arizalar, xabarlar va boshqa maʼlumotlar boʻyicha materiallar va jinoyat ishlariga tatbiq etiladi.

Oʻzbekiston Respublikasining Prezidenti Sh. MIRZIYOYEV

Toshkent sh.,

2017-yil 6-sentabr,

OʻRQ-442-son