Readmissiya toʻgʻrisidagi bitimni amalga oshirish tartibi toʻgʻrisidagi

04.07.2007

OʻZBEKISTON RESPUBLIKASI HUKUMATI VA ROSSIYA FEDERATSIYASI HUKUMATI OʻRTASIDA

Bayonnoma

Oʻzbekiston Respublikasi Hukumati va Rossiya Federatsiyasi Hukumati, bundan keyin Tomonlar deb ataluvchi,

Oʻzbekiston Respublikasi Hukumati va Rossiya Federatsiyasi Hukumati oʻrtasidagi readmissiya toʻgʻrisida Bitimni (quyida matnda “Bitim” deb yuritiladi) amalga oshirish bilan bogʻliq masalalarni yanada toʻliqroq boshqarish yuzasidan oʻzaro istaklarini bildirgan holda,

quyidagilar toʻgʻrisida kelishib oldilar:

1-modda.

1. Oʻzbekiston Respublikasi yoki Rossiya Federatsiyasining fuqaroligi quyidagi hujjatlar bilan tasdiqlanadi:

a) Oʻzbekiston Respublikasi fuqarolari uchun: diplomatik pasport, Oʻzbekiston Respublikasi fuqarosining pasporti, Oʻzbekiston Respublikasining 16 yoshga toʻlmagan fuqarosining guvohnomasi, Oʻzbekiston Respublikasiga qaytib kelish uchun guvohnoma;

b) Rossiya Federatsiyasi fuqarosi uchun: diplomatik pasport, xizmat pasporti, Rossiya Federatsiyasi fuqarosining Rossiya Federatsiyasi hududidan tashqarisida shaxsini aniqlovchi Rossiya Federatsiyasi fuqarosi pasporti, Rossiya Federatsiyasi fuqarosi pasporti, Rossiya Federatsiyasi fuqarosi belgisi qoʻyilgan SSSR chet el pasporti, Rossiya Federatsiyasi fuqaroligi toʻgʻrisida 1974-yildagi SSSR fuqarosi pasporti, dengizchi pasporti (dengizchi shaxsiy guvohnomasi), Rossiya Federatsiyasi fuqaroligi toʻgʻrisida ilovasi bor boʻlgan bolaning tugʻilishi haqida guvohnomasi, Rossiya Federatsiyasi fuqaroligi toʻgʻrisida belgisi bor boʻlgan bolaning tugʻilishi haqida guvohnomasi, Rossiya Federatsiyasiga kirish (qaytib kelish) toʻgʻrisidagi guvohnoma.

2. Tomonlardan har biri boshqa Tomonni yozma ravishda diplomatik kanallar orqali ushbu moddaning 1-bandida koʻrsatilgan shu Tomon davlatining fuqaroligini tasdiqlovchi hujjatlar roʻyxatidagi oʻzgarishlar toʻgʻrisida xabardor qiladi.

3. Mazkur moddaning 1-bandida koʻrsatilgan hujjatlar, agarda amal qilish muddati tugagan boʻlsa ham, Oʻzbekiston Respublikasi yoki Rossiya Federatsiyasi fuqaroligini aniqlashda hisobga olinishi mumkin.

4. Shaxs Oʻzbekiston Respublikasi yoki Rossiya Federatsiyasining fuqaroligiga ega ekanligi toʻgʻrisida qarorga kelish quyidagilarga asoslanadi:

a) mazkur moddaning 1-bandida keltirilgan hujjatlarning nusxalari yoki dublikatlari;

b) Oʻzbekiston Respublikasi yoki Rossiya Federatsiyasi vakolatli organlari tomonidan berilgan boshqa hujjatlar;

v) tegishli vakolatli organlar tomonidan qonuniy asoslarda readmissiya qilinayotgan shaxsdan olingan yozma tushuntirishlar;

g) tegishli vakolatli organlar tomonidan qonuniy asoslarda guvohlardan olingan yozma tushuntirishlari;

d) mutasaddi rahbar xodimlarning yozma tushuntirishlari.

2-modda.

1. Uchinchi davlatlarning fuqarolari va fuqaroligi boʻlmagan shaxslarning har bir Tomon davlati hududiga kirganligi holati quyidagi hujjatlar asosida tasdiqlanadi:

a) soʻralayotgan Tomonning shaxsni aniqlovchi hujjatlarga yoki chegarani kesib oʻtish huquqini beruvchi yoki boshqa oʻtish hujjatlaridagi kirish toʻgʻrisidagi belgilari;

b) talab qilingan Tomonning qalbaki hujjatlardagi kirish toʻgʻrisidagi belgisi;

v) talab qilingan Tomonning davlat chegarasini kesib oʻtish holatini belgilash mumkin boʻlgan boshqa hujjatlar.

2. Mazkur moddaning 1-bandida koʻrsatilgan hujjatlar Tomonlardan qoʻshimcha rasmiyatchiliksiz uchinchi davlat fuqarolarining va fuqaroligi boʻlmagan shaxslarning har bir Tomon davlat hududiga kirganligini tasdiqlovchi hujjatlar sifatida qabul qilinadi.

3-modda.

1. Uchinchi davlat fuqarolari yoki fuqaroligi boʻlmagan shaxslar soʻralayotgan Tomon davlatining hududiga kirgan yoki u erda boʻlgan degan qarorga kelish quyidagilarga asoslanadi:

a) amal qilish muddati koʻpi bilan 6 oy oldin tugagan soʻralayotgan Tomon davlatida yashash uchun ruxsatnoma;

b) soʻrayotgan Tomon davlatining vakolatli organlari tomonidan soʻralayotgan Tomon davlatining hududida berilgan va amal qilish muddati tugagan vizalar;

v) vakolatli rahbar xodimlarning yozma tushuntirishlari;

g) mutasaddi vakolatli organlar tomonidan qonuniy asoslarda readmissiya qilinayotgan shaxsdan olingan yozma tushuntirishlar;

d) soʻralayotgan Tomon davlati hududida berilgan yoʻl chiptalari, shuningdek tibbiy muassasalar maʼlumotlari va hisob varaqalari;

e) qonuniy asosda olingan guvohlarning yozma tushuntirishlari.

2. Mazkur moddaning 1-bandida koʻrsatilgan, uchinchi davlat fuqarolarining va fuqaroligi boʻlmagan shaxslarning kirib kelgan degan xulosaga kelish uchun asos boʻladigan hujjatlar deb hisoblanadi, agarda faqat topshirilayotgan hujjatlarni soʻralayotgan Tomon daliliy asosda ularni rad etmasa.

4-modda.

Aniq shaxs (shaxslarga) nisbatan readmissiyani amalga oshirish sanasi, vaqti va joyi vakolatli organlarning oʻzaro kelishuvi asosida belgilanadi.

5-modda.

Soʻrayotgan Tomon davlatining vakolatli organlari readmissiya toʻgʻrisidagi soʻrovnomani soʻralayotgan Tomon davlatining vakolatli organlariga yuboradi.

6-modda.

1. Shaxsni readmissiya qilish toʻgʻrisidagi soʻrovnomada quyidagilar koʻrsatiladi:

a) familiyasi, ismi, nasabi (ikkinchi ismi), tugʻilgan joyi va sanasi, jinsi, fuqaroligi (hozirgi va avvalgi), turar joyi va shaxsni aniqlash imkonini beruvchi boshqa maʼlumotlar;

b) mazkur bayonnomaning 1-moddasiga muvofiq Tomonlar davlatlarining fuqaroligini tasdiqlovchi hujjat, yoki shaxsni aniqlovchi va (yoki) Tomonlar davlatlari chegaralarini kesib oʻtish huquqini beruvchi hujjat, ularning raqami, amal qilish muddati, berilgan sanasi va joyi, va uni bergan organ nomini koʻrsatgan holda;

v) Tomonlardan birining davlati hududida yashash va u erda boʻlish huquqini beruvchi hujjat, ularning raqami, amal qilish muddati, berilgan sanasi va joyi, va uni bergan organ nomini koʻrsatgan holda;

g) soʻrayotgan Tomon davlatining hududiga noqonuniy kirib kelganlik yoki turishini tasdiqlovchi hujjatlar;

d) soʻrayotgan Tomon davlatining hududiga soʻralayotgan Tomon davlatining hududidan bevosita kirib kelganlikni tasdiqlovchi hujjatlar;

e) davlat chegarasi orqali oʻtish punktining nomi, shaxsning soʻralayotgan Tomon davlatiga rejalashtirilgan qaytishi vaqti va usullari;

j) tibbiy xizmatga muhtoj shaxsning sogʻligʻi toʻgʻrisida maʼlumot;

z) kuzatib boruvchi shaxslar (readmissiya qilinayotgan shaxsni kuzatib borgan holda) toʻgʻrisida maʼlumotlar;

i) tarjimon xizmatlarini koʻrsatish zarurati toʻgʻrisida maʼlumotlar.

2. Zarurat tugʻilganda soʻrayotgan Tomon davlatining vakolatli organlari readmissiya toʻgʻrisidagi soʻrovnomada readmissiya qilinayotgan shaxsni soʻralayotgan Tomon davlatining hududiga kirishi uchun zarur hujjatlarni ushbu shaxsga rasmiylashtirishni soʻraydilar.

3. Mazkur moddaning 1-bandida koʻrsatilgan maʼlumotlarni berish ushbu Bitimning 8-moddasida keltirilgan qoidalarni eʼtiborga olgan holda amalga oshiriladi.

4. Vakolatli organlarning kelishuvi boʻyicha ushbu moddaning 1-bandida keltirilgan maʼlumotlar roʻyxatiga oʻzgartishlar kiritilishi mumkin.

7-modda.

1. Shaxsni tranzit qilish toʻgʻrisidagi soʻrovnomada quyidagilar koʻrsatiladi:

a) uchinchi davlat fuqarosi yoki fuqaroligi boʻlmagan shaxslar toʻgʻrisida maʼlumotlar (familiyasi, ismi, nasabi (ikkinchi ismi), tugʻilgan sanasi va joyi, jinsi, fuqaroligi (hozirgi va avvalgi), turar joyi va shaxsini aniqlash imkonini beruvchi boshqa maʼlumotlar);

b) Tomonlar davlatlarining fuqaroligini tasdiqlovchi hujjat, yoki shaxsni aniqlovchi va (yoki) Tomonlar davlatlari chegaralarini kesib oʻtish huquqini beruvchi hujjat, ularning raqami, amal qilish muddati, berilgan sanasi va joyi, va uni bergan organ nomini koʻrsatgan holda;

v) topshirilayotgan shaxsni oxirgi va tranzit davlatlarida, (agar shunday davlatlar mavjud boʻlsa), qabul qilib olishi toʻgʻrisidagi oxirgi yetib borish davlati tomonidan, shuningdek tranzit davlatlari tomonidan taqdim etiladigan maʼlumotlar;

g) tranzit boʻyicha yurish vaqti va yoʻnalishi;

d) readmissiya qilinayotgan shaxsni kuzatib boruvchi shaxslar toʻgʻrisida maʼlumotlar;

e) soʻralayotgan Tomon davlatlarining vakolatli organlari tomonidan tranzitni taʼminlashdagi zarur koʻmagi;

j) tranzitni taʼminlash uchun zarur boʻlgan boshqa maʼlumotlar.

2. Vakolatli organlarning kelishuvi boʻyicha ushbu moddaning 1-bandida koʻrsatilgan maʼlumotlar roʻyxatiga oʻzgartishlar kiritilishi mumkin.

8-modda.

1. Mazkur Bayonnoma Bitim bilan bir paytda kuchga kiradi va tugatiladi.

2. Tomonlar kelishuviga binoan ushbu Bayonnomaga oʻzgartishlar va qoʻshimchalar kiritilishi mumkin.

Toshkent shahrida 2007-yil 4-iyulda oʻzbek va rus tillarida ikkita nusxada tuzildi, bunda ikkala matn bir xil kuchga ega.

(imzolar)