Iqtisodiy va ilmiy-texnikaviy hamkorlik toʻgʻrisida

04.04.2007

Oʻzbekiston Respublikasi Hukumati bilan Bolgariya Respublikasi Hukumati oʻrtasida

Bitim

Bundan buyon “Ahdlashuvchi Tomonlar” deb ataluvchi Oʻzbekiston Respublikasi Hukumati bilan Bolgariya Respublikasi Hukumati,

anʼanaviy oʻzaro iqtisodiy munosabatlarni rivojlantirishga qatʼiy niyatlarini tasdiqlab,

oʻzaro manfaatli hamkorlikni rivojlantirish va mustahkamlash usullari va vositalarini topishga tayyorligini bildirib,

Bolgariya Respublikasining 2007-yil 1-yanvardan Yevropa Ittifoqiga qoʻshilishidan kelib chiqadigan huquq va majburiyatlarini inobatga olib,

Oʻzbekiston Respublikasi Yevroosiyo iqtisodiy hamkorligini taʼsis etish toʻgʻrisida 2000-yil 10-oktabrdagi Shartnomaga qoʻshilishi toʻgʻrisida 2006-yil 25-yanvarda imzolangan Bayonnomadan kelib chiqadigan Oʻzbekiston Respublikasining huquq va majburiyatlarini eʼtiborga olib,

ushbu Bitim ular oʻrtasidagi aloqalarni yangi sharoitlarda rivojlantirishga va, xususan, oʻzaro manfaatli iqtisodiy, texnik hamda texnologik hamkorlikni faollashtirishiga yordam berishiga ishonch bildirib,

quyidagilar toʻgʻrisida kelishib oldilar:

1-modda

Ahdlashuvchi Tomonlar oʻzlarining milliy qonunchiligi doirasida oʻzaro manfaatli iqtisodiy va ilmiy-texnikaviy hamkorlikni rivojlantirishga va kengaytirishga koʻmaklashadilar.

2-modda

Ahdlashuvchi Tomonlar asosan quyidagi sohalarda ikki tomonlama keng hamkorlikni amalga oshirish uchun kuchlarini beradilar:

1. Sanoat, shu jumladan yengil sanoat, mashinasozlik, metallurgiya, qayta ishlash sohalari, elektronika va elektromashinasozlik, kimyo va neftni qayta ishlash sohalari;

2. Farmatsevtika ishlab chiqarishi;

3. Qishloq xoʻjaligi, oʻsimlikshunoslik va chorvachilik, oziq-ovqat sanoati;

4. Oʻrmon xoʻjaligi;

5. Harbiy-iqtisodiy hamkorlik;

6. Energetika;

7. Ilmiy-tadqiqot va tajriba-konstruktorlik faoliyati;

8. Qurilish va qurilish sanoati;

9. Telekommunikatsiya va axborot texnologiyalari;

10. Transport va logistika;

11. Turizm;

12. Atrof muhitni muhofaza qilish;

13. Sarmoyalar jalb qilishda koʻmaklashuv;

14. Kichik va oʻrta tadbirkorlar oʻrtasida hamkorlik;

15. Taʼlim;

16. Sogʻliqni saqlash;

17. Ilm-fan, texnika va texnologiya, shu jumladan yuqori texnologiyalar.

3-modda

Ahdlashuvchi Tomonlar quyidagi yoʻllar bilan ikki mamlakat oʻrtasida hamkorlikni rivojlantirish va kengaytirish uchun kuchlarini beradilar:

hukumat organlari, tashkilotlari va ishbilarmon doiralari, palatalar hududiy va mahalliy organlar iqtisodiyot sohasidagi hamkorlikni mustahkamlash, jumladan bir-birini qiziqtiradigan iqtisodiy va ilmiy-texnikaviy axborot, Ahdlashuvchi Tomonlar davlatlari organlari, ilmiy-tadqiqot muassasalari va biznes vakillari tashriflari bilan almashish;

ishbilarmon doiralar oʻrtasidagi yangi aloqalar oʻrnatilishini ragʻbatlantirish va mavjud aloqalarni kengaytirish, oʻzaro aloqalarni amalga oshirish;

biznes-axborot almashish, xalqaro yarmarkalar va koʻrgazmalarda ishtirok etish, ishbilarmon doiralar vakillari uchun tadbirlarni (seminarlar, konferensiyalar, simpoziumlar va davra suhbatlari) tashkil etishda koʻmaklashish;

ikki tomonlama iqtisodiy munosabatlarda kichik va oʻrta biznesning rolini oshirishda koʻmaklashish;

oʻzaro manfaatli sohalarda marketing, konsalting va ekspert xizmatlari koʻrsatishda hamkorlik qilish;

moliya institutlari va bank tuzilmalari oʻrtasida yanada yaqinroq aloqalar va hamkorlikni rivojlantirish;

ikki tomonlama investitsion va turistik faoliyatni rivojlantirishga koʻmaklashish;

ikki mamlakat kompaniyalarining vakolatxona va filiallarini ochishda hamda qoʻshma korxonalar tuzishda koʻmaklashish;

xalqaro hamkorlikni ragʻbatlantirish;

uchinchi mamlakatlar bozorlarida hamkorlikni kengaytirish;

dasturlar va loyihalar toʻgʻrisida maʼlumotlar almashish va ularni amalga oshirishda tadbirkorlarning ishtirok etishiga koʻmaklashish.

4-modda

Ushbu Bitimning 2-moddasida belgilangan sohalarda hamkorlikni taʼminlash maqsadida Ahdlashuvchi Tomonlar iqtisodiy va ilmiy-texnikaviy hamkorlik boʻyicha Qoʻshma Oʻzbek-Bolgar Hukumatlararo Komissiyasini tuzadilar (kelgusida — Hukumatlararo Komissiya).

5-modda

1. Hukumatlararo Komissiyaning vazifalari:

— ikki tomonlama iqtisodiy va ilmiy-texnikaviy munosabatlarni rivojlantirish masalalarini koʻrib chiqish;

— ikki tomonlama iqtisodiy va ilmiy-texnikaviy munosabatlarni rivojlantirishning yangi imkoniyatlarini belgilash;

— ikki mamlakat tashkilotlari oʻrtasida iqtisodiy va ilmiy-texnikaviy munosabatlarni yaxshilash boʻyicha takliflar ishlab chiqish;

— bir-birini qiziqtiradigan sohalarda iqtisodiy va ilmiy-texnikaviy hamkorlik dasturlarini ishlab chiqish;

— Oʻzbekiston Respublikasi va Bolgariya Respublikasi oʻrtasida iqtisodiy va ilmiy-texnikaviy sohalarda imzolangan xalqaro shartnomalar hamda, boshqa ikki tomonlama kelishuvlar, shu jumladan, Hukumatlararo Komissiya qarorlarining ijrosini kuzatib borish;

— ushbu Bitimni tatbiq qilish boʻyicha takliflar taqdim etish;

— bahamjihat harakatning Ahdlashuvchi Tomonlar oʻrtasida kelishilgan boshqa shakllari.

2. Hukumatlararo Komissiya oʻzbek va bolgar tomonlarining vakillaridan tuziladi.

Har bir Ahdlashuvchi Tomon Hukumatlararo Komissiyaning oʻz qismining “Hamrais” deb ataluvchi Raisini, uning tarkibini va kotibini belgilaydi.

Ayrim masalalarni muhokama qilish uchun Hukumatlararo Komissiya oʻz vakolati doirasida ishchi guruhlarni tuzish va shuningdek ularning vazifalarini hamda masalalarni amalga oshirish muddatlarini belgilashi mumkin.

3. Hukumatlararo Komissiya yigʻilishlari, odatda, bir yilda bir marta navbat bilan Oʻzbekiston Respublikasida va Bolgariya Respublikasida oʻtkaziladi.

Hukumatlararo Komissiya Hamraislari navbatdagi yigʻilishgacha kechi bilan bir oy muddatda yigʻilishni chaqirish va kun tartibi toʻgʻrisida kelishib oladilar. Hamraislarning roziligi bilan yigʻilish kun tartibiga maxsus kiritilmagan masalalar ham muhokama qilinishi mumkin. Har bir Hamraisning taklifiga koʻra Hukumatlararo Komissiyaning navbatdan tashqari yigʻilishini chaqirish yoki Hamraislar uchrashuvini tashkil etish mumkin.

Hukumatlararo Komissiya yigʻilishlariga maslahatchilar va ekspertlarni taklif qilish mumkin.

Hukumatlararo Komissiya yigʻilishlarida ishlatiladigan tillar boʻlib bolgar va rus tillari hisoblanadi.

Har bir yigʻilishda boʻlib oʻtgan muhokama natijalari toʻgʻrisida rus tilida bayonnoma tuziladi.

4. Hukumatlararo Komissiyaning faoliyati bilan bogʻliq masalalar yigʻilishlar oraligʻida ish vaqtida Hukumatlararo Komissiya Hamraislari yoki ularning koʻrsatmalari boʻyicha, kotiblari oʻrtasida muhokama qilinadi.

5. Hukumatlararo Komissiya oʻz ish reglamentini belgilaydi.

6-modda

1. Ushbu Bitim Oʻzbekiston Respublikasi va Bolgariya Respublikasi tomonlar hisoblanuvchi boshqa xalqaro shartnomalardan hamda xalqaro tashkilotlarda ishtirok etishidan kelib chiquvchi Ahdlashuvchi Tomonlarning huquq va majburiyatlarini cheklab qoʻymaydi.

2. Bir tomondan, Oʻzbekiston Respublikasi va, ikkinchi tomondan, Yevropa Hamjamiyatlari va ularning aʼzo davlatlari oʻrtasidagi sherikchilikni taʼsis etuvchi sherikchilik va hamkorlik toʻgʻrisida 1996-yil 21-iyunda imzolangan Bitim bilan tartibga solinuvchi, ushbu Bitim bilan qamrab olingan masalalarga nisbatan Sherikchilik va hamkorlik toʻgʻrisidagi Bitim qoidalari ustuvorlik qiladi.

7-modda

Ushbu Bitim qoidalarining qoʻllanishi yoki talqin etilishi bilan bogʻliq bahsli masalalar Ahdlashuvchi Tomonlar oʻrtasida oʻzaro maslahatlashuvlar va muzokaralar oʻtkazish yoʻli bilan hal etiladi.

8-modda

Ahdlashuvchi Tomonlarning oʻzaro kelishuvi asosida, ushbu Bitimga uning ajralmas qismi hisoblanadigan hamda ushbu Bitimning 9-moddasida bayon qilingan tartibga muvofiq kuchga kiradigan alohida bayonnomalar bilan rasmiylashtiriladigan oʻzgartirish va qoʻshimchalar kiritilishi mumkin.

9-modda

1. Ushbu Bitim imzolangan kundan boshlab kuchga kiradi.

2. Ushbu Bitim kuchga kirgan sanadan boshlab Oʻzbekiston Respublikasi Hukumati va Bolgariya Respublikasi Hukumati oʻrtasida savdo iqtisodiy hamkorlik toʻgʻrisida 1998-yil 24-iyunda imzolangan Bitim oʻz kuchini yoʻqotadi.

3. Mazkur Bitim nomuayyan muddatga tuziladi.

4. Ahdlashuvchi Tomonlardan har biri boshqa Ahdlashuvchi Tomonni yozma ravishda xabardor qilish orqali ushbu Bitim amal qilishini toʻxtatishi mumkin. Bitim ikkinchi Ahdlashuvchi Tomon shunday yozma xabar olgan sanadan keyin keluvchi oltinchi oyning birinchi kunida oʻz kuchini yoʻqotadi.

Buning tasdigʻi uchun, quyida qoʻl qoʻyuvchilar, oʻz Hukumatlaridan tegishli ravishda vakolat olib, ushbu Bitimni imzoladilar.

Toshkent shahrida 2007-yil 4-aprelda ikki asl nusxada, har biri oʻzbek, bolgar va rus tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilishda kelishmovchiliklar yuzaga kelsa, Ahdlashuvchi Tomonlar rus tilidagi matnga amal qiladilar.

(imzolar)