22-modda. Hisob roʻyxatidan oʻtkazishni rad etish

Hisob roʻyxatidan oʻtkazishni rad etish uchun quyidagilar asos boʻladi:

ariza beruvchi tomonidan taqdim etilgan hujjatlarning nobank kredit tashkilotlari va mikromoliyalashtirish faoliyati toʻgʻrisidagi qonunchilik talablariga muvofiq emasligi va (yoki) ularda notoʻgʻri yoki buzib koʻrsatilgan maʼlumotlarning mavjudligi;

ariza beruvchining ishtirokchilari (aksiyadorlari) tarkibida ushbu Qonun 14-moddasining ikkinchi qismida koʻrsatilgan shaxslarning mavjudligi;

rahbar xodimlarning ushbu Qonunning 16-moddasida belgilangan talablarga muvofiq emasligi;

ariza beruvchining ustav fondi (ustav kapitali) ushbu Qonunning 17-moddasi talablariga muvofiq emasligi;

norezident boʻlgan yuridik shaxs nazorat qilish organining hisob roʻyxatidan oʻtkazishni rad etish toʻgʻrisidagi tavsiyasi mavjudligi;

ariza beruvchining hisob roʻyxatidan oʻtkazish uchun hujjatlarni ushbu Qonunda belgilangan muddatlarda taqdim etmaganligi.

Hisob roʻyxatidan oʻtkazishni rad etish haqidagi xabarnoma (bundan buyon matnda rad etish toʻgʻrisidagi xabarnoma deb yuritiladi) ariza beruvchiga rad etish asoslari koʻrsatilgan holda, hisob roʻyxatidan oʻtkazishni rad etish toʻgʻrisidagi qaror qabul qilingan sanadan eʼtiboran bir ish kunidan kechiktirmay yuboriladi.

Hisob roʻyxatidan oʻtkazish ushbu modda birinchi qismining ikkinchi — oltinchi xatboshilarida koʻrsatilgan asoslarga koʻra rad etilgan taqdirda, rad etish haqidagi xabarnomada ariza beruvchi rad etish asoslarini bartaraf etib, hujjatlarni takroran koʻrib chiqish uchun taqdim etishi mumkin boʻlgan muddat ham koʻrsatilishi kerak. Mazkur muddat rad etish asoslarini bartaraf etish uchun zarur boʻlgan vaqtga mutanosib boʻlishi, biroq oʻn ish kunidan kam boʻlmasligi kerak.

Hisob roʻyxatidan oʻtkazish uchun ariza beruvchi tomonidan taqdim etilgan hujjatlarni takroran koʻrib chiqish hujjatlar olingan kundan eʼtiboran oʻn kundan koʻp boʻlmagan muddatda amalga oshiriladi.

Hisob roʻyxatidan oʻtkazish uchun ariza beruvchi tomonidan taqdim etilgan hujjatlarni takroran koʻrib chiqish chogʻida rad etish toʻgʻrisidagi xabarnomada ilgari koʻrsatilmagan yangi asoslar boʻyicha hisob roʻyxatidan oʻtkazishni rad etishga yoʻl qoʻyilmaydi.

Hisob roʻyxatidan oʻtkazish uchun hujjatlar rad etish asoslari bartaraf etilmasdan takroran taqdim etilgan taqdirda, Markaziy bank ushbu hujjatlar qabul qilingan kundan eʼtiboran besh ish kuni ichida ular koʻrib chiqilmasligi toʻgʻrisida ariza beruvchini xabardor qiladi.