22-modda. Milliy gvardiyaning harbiy xizmatchisini (xodimini) boʻshatish

Milliy gvardiyaning harbiy xizmatchisini harbiy xizmatdan boʻshatish tartibi umumiy harbiy majburiyat va harbiy xizmat toʻgʻrisidagi qonunchilik hujjatlarida belgilanadi.

Milliy gvardiyaning xodimini xizmatdan boʻshatishga quyidagilar asos boʻladi:

oʻz xohishi boʻyicha (pensiya olish huquqini beradigan xizmat muddatini oʻtamaganlar uchun) — xodimning bildirgisi asosida;

xizmatda boʻlishning belgilangan yosh chegarasiga yetganligi;

pensiya olish huquqini beradigan xizmat muddatini oʻtaganligi — xodimning bildirgisi asosida;

tashkiliy-shtat oʻzgarishlari;

kasalligi — harbiy-tibbiy komissiyaning xizmatga yaroqsizlik toʻgʻrisidagi xulosasi asosida;

sogʻligʻining cheklanganligi holati — harbiy-tibbiy komissiyaning Milliy gvardiyadagi xizmatga yaroqliligi cheklanganligi toʻgʻrisidagi va xizmat boʻyicha boshqa lavozimga oʻtkazish imkoniyati mavjud boʻlmagan taqdirda, egallab turgan lavozimiga muvofiq xizmat majburiyatlarini bajara olmasligi haqidagi xulosasi asosida;

dastlabki sinov muddati davomida xizmatga yaroqsizligi;

malakasi yetarli emasligi oqibatida egallab turgan lavozimiga noloyiqligi — attestatsiya natijalari asosida;

xizmat intizomini qoʻpol ravishda buzganligi;

Milliy gvardiya xodimining shaʼni va qadr-qimmatiga putur yetkazuvchi xatti-harakatlar sodir etganligi;

sodir etgan jinoyati uchun sudning hukmi, ajrimi, qarori qonuniy kuchga kirganligi;

xodimda intizomiy jazo chorasi mavjud boʻlgan taqdirda, muntazam ravishda xizmat intizomini buzganligi;

boshqa davlat organiga xizmatga oʻtganligi (kadrlarning amaldagi zaxirasiga kiritilmagan holda);

Oʻzbekiston Respublikasi fuqaroligi bekor qilinganligi yoki chet davlat fuqaroligini olganligi;

xodimlar uchun ushbu Qonunda va boshqa qonunchilik hujjatlarida belgilangan cheklovlar va taqiqlarga rioya etmaganligi.

Quyidagi hollarda xodimlarning xizmatdan boʻshatilishiga yoʻl qoʻyilmaydi:

tibbiyot muassasalarida davolanishda boʻlganida, ular Milliy gvardiyaning va (yoki) Oʻzbekiston Respublikasi Ichki ishlar vazirligining tibbiyot muassasalari tomonidan vaqtincha mehnatga layoqatsiz deb topilganda;

taʼtilda yoki xizmat safarida boʻlganda;