Agrosanoat majmuasi sohasidagi hamkorlik toʻgʻrisida

10.03.2008

OʻZBEKISTON RESPUBLIKASI HUKUMATI VA TURKMANISTON HUKUMATI OʻRTASIDA

Bitim

Bundan keyin Tomonlar deb ataluvchi, Oʻzbekiston Respublikasi Hukumati bilan Turkmaniston Hukumati,

Tomonlarning bozor munosabatlari sharoitida agrosanoat majmuasi sohasidagi oʻzaro manfaatli hamkorlikni rivojlantirishga va chuqurlashtirishga intilishlarini eʼtiborga olib,

ilmiy-texnikaviy, savdo-iqtisodiy munosabatlarni va Oʻzbekiston Respublikasi hamda Turkmaniston hududida joylashgan agrosanoat majmuasining xoʻjalik subyektlari oʻrtasidagi hamkorligini yanada rivojlantirishni qoʻllab-quvvatlashga intilib,

quyidagilar toʻgʻrisida kelishib oldilar:

1-modda.

Tomonlar oʻz milliy qonunchiliklariga muvofiq agrosanoat majmuasi sohasida oʻzaro manfaatli hamkorlik olib boradilar, va shuningdek mulk shaklidan va boʻysunishdan qatʼi nazar, ikki davlatning xoʻjalik subyektlari oʻrtasidagi aloqalarni rivojlantirish va chuqurlashtirishga koʻmaklashadilar.

2-modda.

1. Ushbu Bitim qoidalarini bajarish boʻyicha Tomonlarning vakolatli organlari quyidagilar:

Oʻzbekiston Respublikasi Hukumati nomidan Oʻzbekiston Respublikasi Qishloq va suv xoʻjaligi vazirligi;

Turkmaniston Hukumati nomidan — Turkmaniston Qishloq xoʻjaligi vazirligi.

2. Vakolatli organlarning nomlari yoki vazifalari oʻzgargan taqdirda, Tomonlar diplomatik kanallar orqali oʻz vaqtida xabardor qilinadi.

3-modda.

Tomonlar agrosanoat majmuasining quyidagi sohalarida oʻzaro manfaatli hamkorlikni rivojlantirishga koʻmaklashadilar:

1) gʻoʻza, gʻalla ekinlari va qishloq xoʻjaligi ekinlarining boshqa turlarini yetishtirish, va shuningdek urugʻchilik sohasida tajriba almashish;

2) bozor iqtisodiyoti, xoʻjalik yuritishning yangi shakllarini joriy qilish tajribasini almashish, fermer xoʻjaliklarini tashkil qilish va faoliyatining samaradorligini aniqlash;

3) chorvachilik va parrandachilik sohasida, shu jumladan qishloq xoʻjaligi hayvonlarining genetikasi, koʻpayishi va fiziologiyasi sohasida tajriba almashish;

4) oʻsimliklarni biologik va kimyoviy usullar bilan himoya qilish, oʻsimliklarni himoya qilishning kimyoviy vositalarini birgalikda tekshirish va qayd etish boʻyicha fan yutuqlarini joriy qilishda koʻmaklashish;

5) qishloq xoʻjalik mahsulotini yetishtirish va unga boʻlgan talabni tahlil qilish hamda oldindan aytib berish;

6) tuproqni tekshirish va eroziyani nazorat qilish;

7) qishloq xoʻjalik ishlab chiqarishi sohasida suv xoʻjaligi, suv resurslarini boshqarish tizimlari va irrigatsiyani rivojlantirish;

8) Oʻzbekistonda ishlab chiqarilgan qishloq xoʻjalik mahsuloti, texnika va mineral oʻgʻitlarni sotib olish va yetkazib berish boʻyicha bahamjihat harakat qilish;

9) qishloq xoʻjaligi mahsulotlarini saqlash, qayta ishlash, bunga konsentratlar ishlab chiqarish texnologiyasi ham kiradi.

Hamkorlikning boshqa yoʻnalishlari Tomonlarning oʻzaro kelishuviga muvofiq qoʻshimcha tartibda kiritilishi mumkin.

4-modda.

Ushbu Bitim doirasida hamkorlik quyidagi yoʻllar bilan amalga oshiriladi:

1) ilmiy-texnikaviy va iqtisodiy axborot, ilmiy tadqiqotlar natijalari bilan almashish;

2) ekspert olimlarning ishtirokida ikki tomonlama simpoziumlar, seminarlar, malaka oshirish kurslari anjumanlarini hamda Tomonlarning oʻzaro kelishuvi bilan aniqlangan boshqa shakllarni tashkil etish;

3) ikki davlat tashkilotlari va mutaxassislari oʻrtasida oʻzaro manfaatli boʻlgan qoʻshma loyihalar va dasturlarni rejalashtirish va amalga oshirish;

4) qishloq xoʻjaligi uchun ilmiy kadrlar tayyorlash;

5) qishloq xoʻjalik ekinlari va chorvachilik, shu jumladan parrandachilik, genetik materiallari bilan almashish.

Tomonlar, oʻzaro kelishib, hamkorlikning boshqa shakllaridan ham foydalanishlari mumkin.

5-modda.

Tomonlar ushbu Bitimni bajarish maqsadida hukumat va boshqa davlat tashkilotlari, ilmiy-tadqiqot institutlari, va shuningdek mulk shaklidan qatʼi nazar, korxonalar oʻrtasida hamkorlik va aloqalarga koʻmaklashadilar.

Ushbu Bitim doirasidagi hamkorlik Tomonlarning milliy qonunchiliklariga muvofiq amalga oshiriladi.

6-modda.

Mazkur Bitim doirasida Tomonlarning oʻzaro kelishuviga koʻra mazkur Bitim asos boʻlgan muayyan loyihalar yuzasidan kontraktlar, bitimlar, protokollar tuzilishi mumkin.

7-modda.

Tomonlarning oʻzaro kelishuviga koʻra ushbu Bitimga qoʻshimchalar va oʻzgartirishlar kiritilishi mumkin, ular alohida protokollar bilan rasmiylashtiriladi va Bitimning ajralmas qismi hisoblanadi.

8-modda.

Ushbu Bitim qoidalarini talqin qilish va qoʻllash munosabati bilan yuzaga kelishi mumkin boʻlgan bahslar va kelishmovchiliklarni Tomonlar maslahatlashuvlar va muzokaralar yoʻli bilan hal qiladilar.

9-modda.

Ushbu Bitim besh yil muddatda tuziladi va Tomonlar uning kuchga kirishi uchun zarur boʻlgan davlat ichki protseduralarini bajarganliklari toʻgʻrisida oxirgi yozma xabarnoma olingan kundan boshlab kuchga kiradi.

Tomonlardan birontasi ushbu Bitimning amal qilishini toʻxtatish niyati toʻgʻrisida tegishli muddat tugashidan kamida olti oy ilgari boshqa Tomonni yozma ravishda xabardor qilmasa, u oʻz-oʻzidan keyingi besh yillik muddatlarga uzayaveradi.

Ushbu Bitimning amal qilish muddati toʻxtatilishi unga muvofiq tuzilgan va hozirgi vaqtga qadar oxiriga yetkazilmagan joriy bitimlar, kontraktlar yoki loyihalarning davom ettirilishiga taʼsir qilmaydi.

Toshkent shahrida 2008-yil 10-martda (Novruz) ikki nusxada, har biri oʻzbek, turkman va rus tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilish maqsadida rus tilidagi matndan foydalaniladi.

(imzolar)