Huquqiy hamkorlik sohasida

06.08.2008

OʻZBEKISTON RESPUBLIKASI HUKUMATI BILAN MALAYZIYA HUKUMATI OʻRTASIDA

ANGLAShUV MEMORANDUMI

Oʻzbekiston Respublikasi Hukumati bilan Malayziya Hukumati (bundan keyin alohida “Tomon” va birgalikda “Tomonlar” deb ataluvchilar),

ikki mamlakat oʻrtasidagi mavjud doʻstona munosabatlarni tan olib;

ikki mamlakat oʻrtasida oʻzaro hamjihatlik va hurmat asosida hamkorlikni mustahkamlash va rivojlantirishni istab;

quyidagilar toʻgʻrisida kelishib oldilar:

1-modda. Hamkorlik maqsadi

Tomonlar ushbu Anglashuv Memorandumi (Memorandum) qoidalari hamda oʻz davlatlarining amaldagi qonunchiligi va davlat dasturlariga amal qilib, oʻzlarining vakolatlari doirasida hurmat va oʻzarolik asosida ikki tomonlama manfaatli huquqiy hamkorlikni qoʻllab quvvatlaydilar va rivojlantiradilar.

2-modda. Hamkorlik sohalari

1. Tomonlar, oʻz davlatlarining amaldagi qonunchiligi va davlat dasturlariga amal qilib, quyidagi sohalarda huquqiy hamkorlikni qoʻllab-quvvatlaydilar va ilgari suradilar:

a) umumiy manfaatga doir masalalar yuzasidan qonun hujjatlari bilan almashish;

b) umumiy manfaatga doir masalalar yuzasidan tajriba va ijobiy amaliyot bilan almashish;

v) oʻzaro kelishilgan oʻquv dasturlarida ishtirok etish maqsadida prokuratura xodimlarining almashinuv tashriflarini amalga oshirish;

g) malaka oshirish va tajriba almashish maqsadida prokuratura xodimlari oʻrtasida kasbga oid hamkorlikni qoʻllab-quvvatlash va rivojlantirish; va

d) Tomonlar oʻzaro kelishgan huquqiy hamkorlikning boshqa sohalari.

2. Ushbu Memorandum maqsadlarida “prokuratura xodimlari” degan atama zamirida Oʻzbekiston Respublikasi Bosh prokuraturasi va Malayziya Bosh Attorneyi Palatasi xodimlari tushuniladi.

3-modda. Vakolatli organlar

Tomonlar ushbu Memorandumni amalga oshirish maqsadida bir-birlari bilan diplomatik kanallardan foydalanishni istisno qilmagan holda bevosita aloqa qiladilar.

Oʻzbekiston Respublikasi Hukumati tomonidan:

Oʻzbekiston Respublikasi Bosh prokuraturasi,

100047, Oʻzbekiston, Toshkent, Y.Gʻulomov koʻchasi, 66.

Tel.: ( + 99871) 233-91-28

Faks: ( + 99871) 233-48-35

E.mail: [email protected]

Malayziya Hukumati tomonidan:

Malayziya Bosh Attorneyi Palatasi,

1-8 qavat, “S” bloki, “S” qismi Federal Hukumat Maʼmuriy Markazi 62512 Putrajaya, Malayziya

Tel.: 603-8885 5000

Faks: 603-8888 9362

E.mail: www.agc.gov.my

4-modda. Hamkorlikning amalga oshirilishi

Tomonlar mazkur Memorandumning 2-moddasida nazarda tutilgan huquqiy hamkorlikni alohida ahdlashuvlar orqali amalga oshiradilar.

5-modda. Moliyaviy kelishuvlar

Ushbu Memorandumni qoʻllash bilan bogʻliq xarajatlar tegishli Tomonlar tarafidan qoplanadi.

6-modda. Intellektual mulk huquqlari himoyasi

1. Intellektual mulk huquqlari himoyasi Tomonlarning amaldagi qonunchiligi hamda Tomonlar ishtirokchi hisoblangan xalqaro bitimlarga muvofiq amalga oshiriladi.

2. Tomonlardan birining nomi, belgisi va\yoki rasmiy emblemasidan ikkinchi Tomon tarafidan nashr, hujjat va\yoki boshqa qogʻozlarda foydalanish, birinchi Tomonning yozma ruxsatisiz taʼqiqlanadi.

3. Mazkur moddaning 1-qismida koʻrsatilgan qoidalardan qatʼiy nazar, amalga oshiriladigan har qanday texnologik usul, mahsulot va xizmatlarning rivojlanishiga oid intellektual mulk huquqlari:

a) Tomonlarning birgalikdagi faoliyati yoki Tomonlarning oʻzaro hamkorlikda amalga oshirilgan tadqiqotlar natijasida yaratilgan boʻlsa, oʻzaro kelishuvga muvofiq har ikkala Tomonga tegishli hisoblanadi;

b) Tomonlardan birining yakka faoliyati yoxud amalga oshirgan tadqiqotlari natijasida yaratilgan boʻlsa, faqat oʻsha Tomonga tegishli hisoblanadi.

7-modda. Maxfiylik

1. Ushbu Memorandum yoki unga muvofiq tuzilgan boshqa kelishuvlarning bajarilishi vaqtida har bir Tomon boshqa Tomonga taqdim etgan yoki undan qabul qilgan hujjat, axborot yoki boshqa maʼlumotlarning maxfiyligiga rioya qilish majburiyatini oladi.

2. Har bir Tomon hujjat, axborot yoki boshqa maʼlumotlarni bunday hujjat, axborot yoki boshqa maʼlumotlarni taqdim qilgan Tomonning yozma ruxsatisiz uchinchi Tomonga oshkor qilmaydi va taqdim etmaydi.

3. Ushbu Memorandum oʻz kuchini yoʻqotishidan qatʼiy nazar Tomonlar mazkur modda qoidalari amalda boʻlishi toʻgʻrisida kelishib oldilar.

8-modda. Maslahatlashuv

Ushbu Memorandumning 3-moddasida koʻrsatilgan vakolatli organlar Memorandumni qoʻllash yuzasidan oʻzaro kelishilgan vaqtlarda maslahatlashuvlar oʻtkazadilar.

9-modda. Amal qilishni toʻxtatish

Har bir Tomon milliy xavfsizlik, davlat va jamoat manfaatlari yoki jamoat tartibidan kelib chiqqan holda ushbu Memorandumning amal qilishini vaqtincha toʻliq yoki qisman toʻxtatib qoʻyish huquqiga egadir, bunday toʻxtatish boshqa Tomonning diplomatik kanallar orqali xabardor qilinganidan soʻng darhol amal qila boshlaydi.

10-modda. Oʻzgartish va qoʻshimchalar

1. Har bir Tomon ushbu Memorandumga yoxud uning bir qismiga oʻzgartish yoki qoʻshimcha kiritishni yozma ravishda taklif etishi mumkin.

2. Tomonlar oʻzaro kelishgan har qanday oʻzgartish va qoʻshimchalar yozma ravishda ushbu Memorandumning ajralmas qismi hisoblanadigan va Tomonlar belgilagan kundan boshlab kuchga kiradigan Bayonnomalar shaklida rasmiylashtiriladi.

3. Har qanday oʻzgartish va qoʻshimchalar ularning kuchga kirguniga qadar ushbu Memorandumdan kelib chiqqan yoki unga asoslangan Tomonlarning huquq va majburiyatlariga taʼsir etmasligi lozim.

11-modda. Nizolarni hal qilish

Ushbu Memorandum qoidalarini talqin qilish, bajarish va qoʻllashda Tomonlar oʻrtasida vujudga keladigan har qanday kelishmovchilik yoki nizolar uchinchi tomonga yoxud xalqaro sudlarga murojaat etmasdan, Tomonlar oʻrtasida maslahatlashuvlar va/yoki muzokaralar yoʻli bilan doʻstona ravishda hamjihatlik asosida hal qilinadi.

12-modda. Kuchga kirish, amal qilish va oʻz kuchini yoʻqotish

1. Ushbu Memorandum imzolangan kundan boshlab kuchga kiradi va besh (5) yil muddat davomida amal qiladi.

2. Tomonlar oʻzgacha kelishmagan taqdirda, bu muddat oʻz-oʻzidan keyingi besh (5) yillik muddatda uzayadi.

3. Mazkur modda qoidalaridan qatʼiy nazar, Tomonlarning har biri boshqa Tomonni ushbu Memorandum amal qilishini tugatish niyati borligi toʻgʻrisida istagan vaqtda, bu niyatni amalga oshirish sanasidan kamida olti (6) oy ilgari diplomatik kanallar orqali yozma ravishda xabardor qilib, uning amal qilinishini tugatishi mumkin.

4. Ushbu Memorandumning tugatilishi, uning tugatilishi sanasidan avvalroq kelib chiqqan yoki unga asoslangan Tomonlarning huquq va majburiyatlariga taʼsir etmasligi lozim.

Yuqoridagilarni tasdiqlab, oʻz Hukumatlari tomonidan tegishli vakolat olgan quyida imzo chekuvchilar ushbu Memorandumni imzoladilar.

Toshkent shahrida 2008-yil 6-avgust kuni olti (6) asl nusxada, har ikkisi (2) oʻzbek, malay va ingliz tillarida tuzildi, bunda barcha matnlar bir xil kuchga ega. Matnlarni talqin qilishda kelishmovchiliklar yuzaga kelgan holda ingliz tilidagi matn ustuvor hisoblanadi.

(imzolar)