Masʼuliyati cheklangan jamiyat “OʻZROSAVIA” Oʻzbekiston-Rossiya qoʻshma korxonasini tuzishda va uning faoliyatida hamkorlik qilish toʻgʻrisida

07.03.2007

Oʻzbekiston Respublikasi Hukumati bilan Rossiya Federatsiyasi Hukumati oʻrtasida

Bitim

Bundan keyin “Tomonlar” deb ataluvchi Oʻzbekiston Respublikasi Hukumati va Rossiya Federatsiyasi Hukumati,

Oʻzbekiston Respublikasi bilan Rossiya Federatsiyasi oʻrtasida davlatlararo munosabatlar asoslari, doʻstlik va hamkorlik toʻgʻrisida 1992-yil 30-maydagi Shartnomaga, Oʻzbekiston Respublikasi Hukumati bilan Rossiya Federatsiyasi Hukumati oʻrtasida sanoatning mudofaa sohalaridagi korxonalarining ishlab chiqarish va ilmiy-texnikaviy kooperatsiyasi toʻgʻrisidagi 1994-yil 26-yanvardagi Bitimga, Oʻzbekiston Respublikasi bilan Rossiya Federatsiyasi oʻrtasida qurolli kuchlarini oʻzaro texnik va moddiy taʼminlash prinsiplari toʻgʻrisida 1994-yil 2-martdagi Bitimga, Oʻzbekiston Respublikasi Hukumati bilan Rossiya Federatsiyasi Hukumati oʻrtasida harbiy-texnik hamkorlik toʻgʻrisida 1995-yil 27-iyuldagi Bitimga, Oʻzbekiston Respublikasi Hukumati bilan Rossiya Federatsiyasi Hukumati oʻrtasida Oʻzbekiston Respublikasi va Rossiya Federatsiyasi Qurolli Kuchlari uchun yetkazib berilayotgan mahsulot sifatini nazorat qilish toʻgʻrisida 1995-yil 27-iyuldagi Bitimga, Oʻzbekiston Respublikasi Hukumati bilan Rossiya Federatsiyasi Hukumati oʻrtasida harbiy va harbiy-texnik sohalarda har tomonlama hamkorlikni yanada chuqurlashtirish toʻgʻrisida 1999-yil 11-dekabrdagi Shartnomaga, Oʻzbekiston Respublikasi bilan Rossiya Federatsiyasi oʻrtasida strategik sherikchilik toʻgʻrisida 2004-yil 16-iyundagi Shartnomaga, Oʻzbekiston Respublikasi bilan Rossiya Federatsiyasi oʻrtasida ittifoqchilik munosabatlari toʻgʻrisida 2005-yil 14-noyabrdagi Shartnomaga amal qilib,

Oʻzbekiston va Rossiya korxonalari va tashkilotlari oʻrtasida anʼanaviy yuzaga kelgan ilmiy-texnikaviy, ishlab chiqarish, savdo va moliyaviy aloqalarini saqlab qolish va rivojlantirishga intilib,

ishlab chiqarish, ilmiy-texnikaviy va investitsiyalar salohiyatining bundan keyingi integratsiyalashuvini va undan yanada samarali foydalanishning muhimligini va shuningdek, Oʻzbekiston va Rossiya sanoati majmualari kooperatsiya aloqalarining yuqori darajadaligini hisobga olib,

quyidagilar toʻgʻrisida kelishib oldilar:

1-modda

Tomonlar “V.P. Chkalov nomidagi Toshkent aviatsiya ishlab chiqarish birlashmasi davlat-aksiyadorlik jamiyati” ning “Chirchiq aviatsiya taʼmir-mexanik zavodi” shoʻba korxonasi negizida “Oʻzbekiston—Rossiya qoʻshma korxonasi “OʻZROSAVIA” (bundan keyin—korxona) masʼuliyati cheklangan jamiyat shaklida, taʼsis hujjatlariga muvofiq holda, (Oʻzbekiston Respublikasi, Toshkent viloyati, Chirchiq shahri)da joylashadigan va roʻyxatdan oʻtkaziladigan, Mi-8, Mi-24 rusumdagi vertolyotlarni va ularning turlarini taʼmir qilish boʻyicha oʻzbek—rossiya qoʻshma korxonasini tuzishda koʻmaklashadilar.

Korxona Mi-8, Mi-24 rusumdagi vertolyotlarni va ularning turlarini taʼmir qilish, sanoat byulletenlarida, konstruktor-texnik hujjatlarda nazarda tutilgan vertolyotlarni va ularning tizimlarini zamonaviylashtirish va boshqa taʼmir ishlarini va xizmatlarni taʼsis hujjatlariga muvofiq yoki, asosan, Oʻzbekiston Respublikasi Qurolli kuchlari manfaatlarini koʻzlab, Tomonlar kelishuviga va shuningdek, boshqa davlatlar manfaatlarini koʻzlab Tomonlar kelishuviga muvofiq bajarishi borasida tijorat faoliyatini yuritish uchun tuziladi.

Korxona Oʻzbekiston Respublikasida davlat roʻyxatiga olingan paytdan boshlab yuridik shaxs huquqiga ega boʻladi. Korxona oʻz nomidan shartnomalar (kontraktlar) tuzishga, mulkiy va shaxsiy nomulkiy huquqlarga ega boʻlishga va majburiyatlar bajarishga, umumiy yurisdiksiya sudida, arbitraj va hakamlik sudlarida daʼvogar va javobgar boʻlishga haqli.

Korxona oʻz faoliyatini ushbu Bitim, Oʻzbekiston Respublikasi qonunchiligiga, korxonaning taʼsis shartnomasi va nizomiga, hamda Tomonlar davlatlarining xalqaro shartnomalariga muvofiq yuritadi.

2-modda

Ushbu Bitim qoidalarini bajarish boʻyicha Tomonlarning vakolatli organlari quyidagilar:

Oʻzbekiston tomonidan—Oʻzbekiston Respublikasi Iqtisodiyot vazirligi va Mudofaa vazirligi,

Rossiya tomonidan—Harbiy-texnik hamkorlik boʻyicha Federal xizmati va Sanoat boʻyicha Federal agentligi belgilandi.

3-modda

Korxona tuzishda ishtirok etadilar:

Oʻzbekiston tomonidan — “V.P. Chkalov nomidagi Toshkent aviatsiya ishlab chiqarish birlashmasi” davlat aksiyadorlik jamiyati va “Oʻzmaxsusimpeks” davlat korxonasi.

Rossiya tomonidan — “Oboronprom” birlashgan sanoat korporatsiyasi ochiq aksiyadorlik jamiyati, “Rosoboroneksport” federal davlat unitar korxonasi va Rossiya Federatsiyasining boshqa tashkilotlari, bunda Rossiya tashkilotlarining korxona ustav kapitalidagi umumiy hissasi 51 foizdan kam boʻlmasligi nazarda tutiladi.

Korxonani roʻyxatga olish va uning faoliyatiga litsenziya berish oʻzbek tomonidan, Oʻzbekiston Respublikasi qonunchiligi oʻrnatgan tartibda amalga oshiriladi.

Tomonlar korxona majburiyatlari boʻyicha masʼul emaslar.

Korxona ishtirokchilari uning majburiyatlari boʻyicha javob bermaydilar va oʻzlari kiritgan ulushlar qiymati doirasida korxona faoliyati bilan bogʻliq boʻlgan zararlarni tavakkal qilib zimmalariga oladilar.

Korxona ishtirokchilari har yili tasdiqlanadigan biznes-rejaga muvofiq uning faoliyati samaradorligini taʼminlash boʻyicha chora-tadbirlar koʻradilar.

4-modda

Mi-8, Mi-24 rusumidagi vertolyotlar va ularning yangi turlarini taʼmirlash uchun zarur xomashyo, materiallar, maxsus jamlovchi buyumlar, taʼmirlash-texnik hujjatlarni yetkazib berish Oʻzbekiston Respublikasi Hukumati bilan Rossiya Federatsiyasi Hukumati oʻrtasida sanoatning mudofaa sohalaridagi korxonalarning ishlab chiqarish va ilmiy-texnikaviy kooperatsiyasi toʻgʻrisida 1994-yil 26-yanvardagi Bitimda nazarda tutilgan tartibda amalga oshiriladi.

5-modda

Oʻzbekiston Respublikasi va Rossiya Federatsiyasi qonunchiligi va Tomonlar davlatlari ishtirok etayotgan xalqaro shartnomalarga muvofiq intellektual faoliyat natijalariga egalik qilish huquqini, va shuningdek ushbu Bitimni amalga oshirish jarayonida olingan huquqlarni muhofaza qilishni taʼminlaydilar.

6-modda

Oʻzbekiston tomoni:

Ushbu Bitim doirasida olingan va\yoki qoʻllanilayotgan intellektual faoliyat natijalarini Rossiya tomonining yozma shakldagi roziligisiz uchinchi tomonlarga bermaslik;

Mi-8, Mi-24 rusumidagi vertolyotlarni va ularning yangi turlarini taʼmirlash boʻyicha texnik hujjatlarni va Rossiya Federatsiyasidan eksport qilinayotgan harbiy maqsadlarga moʻljallangan mahsulotdan korxona manfaatlarini koʻzlab foydalanishi, shu jumladan mazkur Bitimning 4-moddasiga muvofiq, faqat bayon qilingan maqsadlarda foydalanishi va uni Rossiya tomonining yozma shaklidagi roziligisiz uchinchi tomonlarga reeksport qilish yoki berishga yoʻl qoʻyilmaslik majburiyatlarini zimmasiga oladi.

7-modda

Harbiy maqsadlarga moʻljallangan va korxona tomonidan taʼmirlangan mahsulotning resurslari va xizmat muddatlarini uzaytirish Mi-8, Mi-24 rusumli vertolyotlar va ularning modifikatsiyalarini ishlab chiquvchilar, “M.L. Mil nomidagi Moskva vertolyot zavodi” ochiq aksiyadorlik jamiyati tomonidan amalga oshiriladi.

8-modda

Tomonlar va/yoki korxona ishtirokchilari Oʻzbekiston Respublikasi Hukumati bilan Rossiya Federatsiyasi Hukumati oʻrtasida maxfiy axborotlarni oʻzaro himoya qilish toʻgʻrisida 2003-yil 31-oktabrdagi Bitimga muvofiq, ushbu Bitim doirasida olingan va davlat siri hisoblangan maʼlumotlarni himoya qilishni taʼminlaydilar.

9-modda

Ushbu Bitim qoidalarini talqin qilish va qoʻllash munosabati bilan yuzaga kelishi mumkin boʻlgan bahslar va kelishmovchiliklar Tomonlarning maslahatlashuvlari va muzokaralari yoʻli bilan hal qilinadi.

10-modda

Ushbu Bitim Tomonlarning kelishuvi boʻyicha oʻzgartirilishi mumkin. Mazkur Bitimga kiritilgan oʻzgartishlar Tomonlar tuzadigan alohida bayonnomalar bilan rasmiylashtiriladi.

11-modda

Ushbu Bitim besh yil muddatga tuziladi va imzolangan sanadan kuchga kiradi.

Bu muddat tugaganidan keyin ushbu Bitim, agar Tomonlardan birortasi navbatdagi besh yillik muddat tamom boʻlganga qadar kamida 6 oy ilgari boshqa Tomonni ushbu Bitim amal qilishini tugatish niyati borligi toʻgʻrisida yozma shaklda xabardor qilmasa, har safar oʻz-oʻzidan besh yil muddatga choʻzilaveradi.

Korxona faoliyatining samarasizligi bilan bogʻliq masalalar ham ushbu Bitimni amal qilish muddatidan ilgari tugatish uchun asos boʻla oladi.

Ushbu Bitim amal qilishining tugatilishi ushbu Bitimga muvofiq tuzilgan kontrakt (shartnoma)larga, hamda mazkur Bitimning 5, 6- va 8-moddalarida nazarda tutilgan Tomonlar majburiyatlariga ham daxl qilmaydi, Tomonlar erishgan boshqa kelishuvlar bundan mustasno.

Toshkent shahrida 2007-yil 7-martda ikki nusxada, har biri oʻzbek va rus tillarida tuzildi, bunda ikkala matn ham bir xil kuchga ega.

(imzolar)