27-modda. Moliya markazining maʼmuriyati

Moliya markazining maʼmuriyati Moliya markazining asosiy ijro etuvchi va maʼmuriy organi hisoblanadi hamda u Moliya markazining faoliyatini tashkil etish va taʼminlash, rivojlantirish hamda targʻib qilish uchun birinchi navbatda masʼul hisoblanadi.

Moliya markazining maʼmuriyati ushbu Konstitutsiyaviy Qonun bilan tashkil etiladigan hamda oʻz funksiyalarini amalga oshirish uchun zarur huquq layoqatiga, huquqlarga, vakolatlarga va majburiyatlarga ega boʻlgan yuridik shaxs hisoblanadi hamda u oʻz vazifalari va funksiyalarini bajarish uchun zarur boʻlgan moliyaviy, maʼmuriy mustaqillikka hamda ish yuritish borasidagi mustaqillikka ega boʻladi.

Ushbu Konstitutsiyaviy Qonun bilan Moliyaviy xizmatlar boshqarmasi, Toshkent xalqaro tijorat sudi yoki Moliya markazining kengashi tomonidan taʼsis etilgan boshqa tashkilotlarning zimmasiga toʻgʻridan-toʻgʻri yuklatilgan vazifalardan tashqari, Moliya markazi faoliyatining maʼmuriyatchiligi, boshqaruvi va amalga oshirilishi bilan bogʻliq boʻlgan barcha masalalar uchun Moliya markazining maʼmuriyati masʼuldir.

Moliya markazining maʼmuriyati ushbu Konstitutsiyaviy Qonun, Moliya markazi kengashining qarorlari, shuningdek Moliya markazining kengashi tomonidan tasdiqlanadigan Moliya markazining maʼmuriyati toʻgʻrisidagi nizom va ichki hujjatlar bilan oʻz zimmasiga yuklatilgan vazifalarni hamda majburiyatlarni bajaradi.

Moliya markazining maʼmuriyati Ijrochi direktorga ega boʻladi va u Moliya markazining maʼmuriyati toʻgʻrisidagi nizomga hamda ichki hujjatlarga muvofiq faoliyat yuritadi.

Moliya markazining maʼmuriyati ushbu Konstitutsiyaviy Qonunda va Moliya markazining qarorlarida belgilangan funksiyalardan tashqari, quyidagi vazifalarni bajaradi va vakolatlarni amalga oshiradi:

Moliya markazining maqsadlariga erishish uchun Moliya markazining strategiyasini, umumiy siyosatini va rejalarini tayyorlashda hamda amalga oshirishda ishtirok etish;

Oʻzbekiston Respublikasining xalqaro shartnomalariga Moliya markazining organlari va Moliya markazining ishtirokchilari tomonidan rioya etilishini nazorat qilish;

Moliya markazining faoliyatiga taalluqli masalalar boʻyicha Oʻzbekiston Respublikasining davlat organlari bilan oʻzaro aloqalarni Moliya markazining boshqaruvchisi va Moliya markazining tegishli organi bilan muvofiqlashtirgan holda amalga oshirish;

Moliya markazining infratuzilmasini barpo etish va uning ishlashini, boshqarilishini hamda unga texnik xizmat koʻrsatilishini nazorat qilish, Moliya markazida maʼmuriy hamda texnik xizmatlar koʻrsatish, Moliya markazining maqsadlariga erishish samaradorligini va natijadorligini taʼminlash uchun zarur boʻlgan boshqa xizmatlarni koʻrsatish va talablarni bajarish;