26-modda. Moliya markazining boshqaruvchisi

Moliya markazining boshqaruvchisi Moliya markazi organlarining faoliyatini muvofiqlashtirishda, shuningdek Oʻzbekiston Respublikasining davlat organlari va Moliya markazining organlari oʻrtasidagi hamkorlikni taʼminlashda ishtirok etuvchi mansabdor shaxsdir.

Moliya markazining boshqaruvchisi Moliya markazi kengashi tomonidan belgilangan vakolatlarga ega boʻlib, zarur tashkiliy, maslahat va texnik koʻmakdan foydalanadi.

Moliya markazi kengashining majlislarida rais ishtirok etmagan taqdirda, Moliya markazining boshqaruvchisi raislik qiladi.

Moliya markazining boshqaruvchisi Oʻzbekiston Respublikasi Prezidentining farmoniga asosan lavozimga tayinlanadi va lavozimidan ozod etiladi. Mazkur farmonda Moliya markazi boshqaruvchisining mehnat shartlari, ish haqi va unga tenglashtirilgan toʻlovlar, imtiyozlar belgilanadi. Ushbu Konstitutsiyaviy Qonun 25-moddasi yettinchi qismining qoidalaridan qatʼi nazar, Oʻzbekiston Respublikasi Prezidentining farmoniga muvofiq Moliya markazining boshqaruvchisi lavozimida faoliyat yuritayotgan shaxsning lavozimidan ozod etilishi, agar farmonda boshqacha qoida nazarda tutilmagan boʻlsa, ayni vaqtda ushbu shaxsning Moliya markazi kengashi aʼzoligidan ham ozod etilishiga olib keladi.

Ushbu Konstitutsiyaviy Qonunda va Moliya markazining qarorlarida belgilangan Moliya markazi organlarining mustaqilligiga hamda vakolatlariga daxl qilmagan holda, Moliya markazining boshqaruvchisi quyidagi vazifalar va vakolatlarni amalga oshiradi:

Moliya markazining maqsadlariga erishishni koʻzlab strategiyani, umumiy siyosatni va rejalarni ishlab chiqish, ularni Moliya markazining kengashiga tasdiqlash uchun taqdim etish, ularning ijrosini nazorat qilish va ushbu ishlarga doir hisobotlarni Moliya markazining kengashiga taqdim etish;

Moliya markazining tashkiliy tuzilmasi loyihasini ishlab chiqish va uni Moliya markazining kengashiga tasdiqlash uchun taqdim etish;

ushbu Konstitutsiyaviy Qonunga va Moliya markazining qarorlariga muvofiq oʻz vazifalarini bajarish uchun zarur maslahat beradigan hamda yordam koʻrsatadigan qoʻmitalar va ishchi guruhlar tuzish;

oʻz vazifalarini bajarish uchun zarur boʻlgan hollarda, maslahat beruvchi va yordam koʻrsatuvchi ekspertlarni hamda mutaxassislarni tayinlash;

zarur boʻlganda, Moliya markazining organlari bilan maslahatlashgan holda, Moliya markazining maqsadlariga erishish uchun Oʻzbekiston Respublikasi hududidagi hamda Oʻzbekiston Respublikasi hududidan tashqaridagi uchinchi shaxslar bilan shartnomalar, kelishuvlar va anglashuv memorandumlarini tuzish;