22-modda. Moliya markazining organlari

Quyidagilar Moliya markazining organlari hisoblanadi:

Moliya markazining kengashi;

Moliya markazining maʼmuriyati;

Moliyaviy xizmatlar boshqarmasi;

Toshkent xalqaro tijorat sudi.

Moliya markazining organlarini tashkil etish, ularning faoliyat yuritishi hamda Moliya markazi ishtirokchilarining faoliyati ustidan nazorat oʻrnatish tartibi ushbu Konstitutsiyaviy Qonun va Moliya markazining qarorlari bilan belgilanadi.

Moliya markazining organlari ushbu Konstitutsiyaviy Qonun va Moliya markazining qarorlari bilan oʻz zimmasiga yuklatilgan vazifalar va funksiyalarni amalga oshirish chogʻida oʻz faoliyatida mustaqildir. Ushbu Konstitutsiyaviy Qonunda toʻgʻridan-toʻgʻri nazarda tutilgan hollardan tashqari, ushbu organlarga koʻrsatmalar berilishiga yoki ularning faoliyatiga aralashishga yoʻl qoʻyilmaydi.

Oʻzbekiston Respublikasi Moliya markazi organlarining qarzlari, majburiyatlari, harakatlari yoki harakatsizligi uchun javobgar boʻlmaydi. Moliya markazining organlari esa Moliya markazi ishtirokchilarining yoki boshqa har qanday shaxsning qarzlari, majburiyatlari, harakatlari yoki harakatsizligi uchun javobgar boʻlmaydi, bundan ushbu Konstitutsiyaviy Qonunda yoki qoʻllaniladigan boshqa qonunchilikda bevosita nazarda tutilgan hollar mustasno.

Moliya markazining organlari ushbu Konstitutsiyaviy Qonunga va Moliya markazining qarorlariga muvofiq, shuningdek tegishli hollarda Moliya markazining kengashi tomonidan chiqariladigan muvofiqlashtiruvchi va siyosiy koʻrsatmalarga binoan, agar bunday koʻrsatmalar Moliyaviy xizmatlar boshqarmasining yoki Toshkent xalqaro tijorat sudining funksional mustaqilligiga zarar yetkazmasa, hamkorlik qiladi.

Moliya markazining organlari, vazirliklar, idoralar, nazorat organlari hamda tartibga soluvchi organlar, sudlar, davlat hokimiyati organlari va Oʻzbekiston Respublikasining boshqa vakolatli organlari Moliya markazining maqsadlariga erishish hamda ushbu Konstitutsiyaviy Qonun va Moliya markazining qarorlari bilan ularga berilgan vakolatlarni, oʻz zimmasiga yuklatilgan vazifalar va funksiyalarni samarali amalga oshirish maqsadida oʻzaro hamkorlik qiladi hamda bir-biriga koʻmaklashadi.

Moliya markazining boshqaruvchisi yoki Moliya markazining tegishli organi Oʻzbekiston Respublikasi hududidagi yoki Oʻzbekiston Respublikasi hududidan tashqaridagi vakolatli organlar, regulatorlar, sudlar, arbitraj institutlari, moliya markazlari, birjalar, universitetlar, professional tashkilotlar va boshqa tashkilotlar bilan oʻzaro anglashuv memorandumlarini va hamkorlik kelishuvlarini, basharti bunday memorandumlar va kelishuvlar Oʻzbekiston Respublikasining Konstitutsiyasiga yoki Oʻzbekiston Respublikasi tomonidan ratifikatsiya qilingan xalqaro shartnomalarga zid boʻlmasa, tuzishi mumkin.