21-modda. Xorijiy ishchi kuchini jalb etish

Moliya markazining ishtirokchilari va organlari Moliya markazida faoliyatni amalga oshirish uchun malakali chet el fuqarolarini va fuqaroligi boʻlmagan shaxslarni ular uchun Oʻzbekiston Respublikasi hududidagi mehnat faoliyati huquqiga doir tasdiqnoma olmasdan ishga jalb etishi mumkin.

Moliya markazining ishtirokchilari yoki uning organi tomonidan yollangan va asosiy ish joyi Moliya markazi boʻlgan chet el fuqarolari va fuqaroligi boʻlmagan shaxslar Oʻzbekiston Respublikasida ishlash uchun mehnat ruxsatnomasini olish majburiyatidan ozod qilinadi. Chet el fuqarolarining va fuqaroligi boʻlmagan shaxslarning malakasiga nisbatan qoʻyiladigan talablar va ularni ishga qabul qilish kvotalari Moliya markazining maʼmuriyati tomonidan belgilanadi.

Moliya markazining maʼmuriyati tomonidan belgilanadigan malaka talablari va kvotalar Moliya markazining maqsadlariga erishishga koʻmaklashishi lozim hamda Moliya markazining ishtirokchilari tomonidan Moliya markazi hududida faoliyatni amalga oshirish uchun asosli zaruriyat mavjud boʻlgan hollarda chet el fuqarolarini yoki fuqaroligi boʻlmagan shaxslarni ishga qabul qilish imkoniyatini cheklamasligi kerak.

Moliya markazining maʼmuriyati Moliya markazining ishtirokchilari va organlari tomonidan jalb etilgan xorijiy ishchi kuchining hisobini yuritadi hamda ish bilan band boʻlgan chet el fuqarolari va fuqaroligi boʻlmagan shaxslar toʻgʻrisidagi maʼlumotlarni migratsiya masalalari boʻyicha vakolatli davlat organiga taqdim etadi. Bunday maʼlumotlarning mazmuni, davriyligi va shakli Moliya markazining maʼmuriyati hamda migratsiya masalalari boʻyicha vakolatli davlat organi tomonidan birgalikda belgilanadi.

Moliya markazining ishtirokchilari va organlari ish bilan band boʻlgan chet el fuqarolari va fuqaroligi boʻlmagan shaxslar toʻgʻrisidagi maʼlumotlarni Moliya markazining qarorlariga muvofiq Moliya markazining maʼmuriyatiga taqdim etadi.