2692-modda.
Oʻzbekiston Respublikasi Oliy Majlisi Qonunchilik palatasining Reglamentiga qoʻshimcha va oʻzgartirishlar kiritish toʻgʻrisida (1895-V-son) · Sana: 31.03.2026 · Amalda
Oʻzbekiston Respublikasi Tashqi ishlar vazirligiga chet el fuqarolarining va fuqaroligi boʻlmagan shaxslarning Roʻyxatda boʻlish muddatini uzaytirish toʻgʻrisida taqdimnoma kiritishning maqsadga muvofiqligi masalasi Kengash aʼzolarining taklifiga asosan, qoida tariqasida, ushbu shaxslarni Roʻyxatga kiritish masalasi yuzasidan xulosa taqdim etgan qoʻmita tomonidan oʻrganib chiqiladi.
Qoʻmita Oʻzbekiston Respublikasi Tashqi ishlar vazirligiga chet el fuqarolarining va fuqaroligi boʻlmagan shaxslarning Roʻyxatda boʻlish muddatini uzaytirish toʻgʻrisida taqdimnoma kiritish maqsadga muvofiqligi haqida yoki maqsadga muvofiq emasligi toʻgʻrisida xulosa tayyorlaydi hamda chet el fuqarolarining va fuqaroligi boʻlmagan shaxslarning Roʻyxatda boʻlish muddati tugashidan kamida ikki oy oldin mazkur xulosani Kengashga taqdim etadi.
Chet el fuqarolarini va fuqaroligi boʻlmagan shaxslarni Roʻyxatga kiritishning tegishli asoslari ushbu shaxslarning Roʻyxatda boʻlish muddati davomida bartaraf etilmagan taqdirda, Kengash Oʻzbekiston Respublikasi Tashqi ishlar vazirligiga ushbu shaxslarning Roʻyxatda boʻlish muddatini uzaytirish toʻgʻrisida taqdimnoma kiritish yuzasidan qaror qabul qiladi.
Kengash Oʻzbekiston Respublikasi Tashqi ishlar vazirligiga chet el fuqarolarining va fuqaroligi boʻlmagan shaxslarning Roʻyxatda boʻlish muddatini uzaytirish toʻgʻrisida taqdimnoma kiritish haqida qaror qabul qilgan taqdirda, taqdimnoma Qonunchilik palatasi Spikeri tomonidan imzolangan holda Oʻzbekiston Respublikasi Tashqi ishlar vazirligiga yuboriladi.