22-modda. Maxsus boshqaruvchi

Markaziy bank sanatsiya qilish toʻgʻrisidagi qarorni qabul qilish bilan bir vaqtda yoki shunday qaror qabul qilinganidan keyin bir yoki bir necha jismoniy shaxslarni sanatsiya qilinayotgan bankning maxsus boshqaruvchisi yoki maxsus boshqaruvchilari (bundan buyon matnda maxsus boshqaruvchi deb yuritiladi) sifatida tayinlash toʻgʻrisida qaror qabul qilishga haqli.

Maxsus boshqaruvchini tayinlash toʻgʻrisidagi qarorda kamida quyidagilar nazarda tutilishi kerak:

maxsus boshqaruvchining familiyasi, ismi va otasining ismi;

maxsus boshqaruvchi vakolatlarining boshlanish va tugash vaqti;

maxsus boshqaruvchining vakolatlari va majburiyatlari, shu jumladan faqat Markaziy bank bilan kelishilgan holda amalga oshiriladigan vakolatlari;

maxsus boshqaruvchining vakolatlari muddati davomida bankka nisbatan qoʻllaniladigan cheklovlar roʻyxati, agar bunday cheklovlar mavjud boʻlsa;

maxsus boshqaruvchiga nisbatan cheklovlar, tavsiyalar va farmoyishlarning tavsifi, agar ular mavjud boʻlsa;

maxsus boshqaruvchiga haq toʻlash bilan bogʻliq masalalar.

Markaziy bank har bir maxsus boshqaruvchi bilan ushbu moddaning ikkinchi qismida nazarda tutilgan qoidalarni aks ettiruvchi alohida shartnoma tuzadi.

Maxsus boshqaruvchi etib tayinlanadigan shaxs sanatsiya qilinayotgan bankka nisbatan manfaatlar toʻqnashuvidan xoli boʻlishi hamda “Banklar va bank faoliyati toʻgʻrisida”gi Oʻzbekiston Respublikasi Qonunining 36-moddasiga muvofiq bankning boshqaruv organlari aʼzolariga va muhim ahamiyatga ega xodimlariga nisbatan qoʻyiladigan talablarga muvofiq boʻlishi kerak. Markaziy bank xodimi maxsus boshqaruvchi etib tayinlanishi mumkin emas.

Agar sanatsiya qilinayotgan bankning moliyaviy holati imkon bersa, maxsus boshqaruvchiga toʻlanishi lozim boʻlgan barcha mablagʻlar mazkur bank hisobidan qoplanadi. Aks holda Markaziy bank bunday xarajatlarni oʻz hisobidan qoplaydi.

Maxsus boshqaruvchi tayinlanganligi toʻgʻrisidagi axborot ushbu moddaning uchinchi qismida koʻrsatilgan shartnoma tuzilganidan keyin bir ish kuni ichida Markaziy bankning rasmiy veb-saytida va ijtimoiy tarmoqlardagi rasmiy sahifalarida eʼlon qilinadi.

Maxsus boshqaruvchi oʻz faoliyatida ushbu Qonunga, boshqa qonunchilik hujjatlariga, shuningdek Markaziy bankning topshiriqlariga amal qiladi.

Markaziy bank maxsus boshqaruvchi bilan tuzilgan mehnat shartnomasini qonunchilikka muvofiq bekor qilish va ushbu moddaning talablariga asosan boshqa maxsus boshqaruvchini tayinlash huquqiga ega.