20-modda. Maʼlumotlar va ularni tashuvchilar maxfiylashtirilishi munosabati bilan jismoniy shaxslarning hamda tashkilotlarning mulk huquqini cheklash

Davlat sirlaridan foydalanuvchi tashkilotlar rahbarlari jismoniy shaxslarning yoki tashkilotlarning (bundan buyon matnda maʼlumotlarni tashuvchilarning mulkdori deb yuritiladi) mulkida boʻlgan maʼlumotlarni va ularni tashuvchilarni maxfiylashtirish toʻgʻrisida qarorlar qabul qilishga haqli. Koʻrsatilgan maʼlumotlarni hamda ularni tashuvchilarni maxfiylashtirish ushbu maʼlumotlarni tashuvchilarning mulkdori hamda mazkur maʼlumotlar va ularni tashuvchilar oʻz tasarrufiga oʻtayotgan davlat sirlaridan foydalanuvchi tashkilotlar oʻrtasidagi ushbu maʼlumotlarni boshqa shaxsga berish toʻgʻrisidagi shartnomaga asosan amalga oshiriladi.

Shartnomada quyidagilar koʻrsatiladi:

maʼlumotlar va ularni tashuvchilar maxfiylashtirilishi munosabati bilan maʼlumotlarni tashuvchilarning mulkdoriga toʻlanadigan kompensatsiya miqdori;

maʼlumotlarni tashuvchilar mulkdorining ushbu maʼlumotlarni oshkor etmaslik boʻyicha majburiyatlari.

Maʼlumotlarni tashuvchilarning mulkdori ushbu maʼlumotlarni boshqa shaxsga oʻtkazishni rad etgan taqdirda, sudning qaroriga koʻra ushbu maʼlumotlar ularni boshqa shaxsga berishga doir xarajatlar chegirib tashlanib, boshqa shaxsga berilayotgan maʼlumotlarning qiymati mulkdorga qoplangan holda majburiy ravishda boshqa shaxsga berilishi va maxfiylashtirilishi lozim hamda mulkdor davlat sirlarini tashkil etuvchi maʼlumotlarni oshkor etganlik uchun qonunchilikka muvofiq javobgarlikka tortilishi toʻgʻrisida ogohlantiriladi.

Chet el fuqarolariga, xorijiy va xalqaro tashkilotlarga tegishli boʻlgan maʼlumotlarga va ularni tashuvchilarga boʻlgan mulk huquqi, agar bu maʼlumotlar ushbu Qonun talablarini buzmagan holda olingan (ishlab chiqilgan) boʻlsa, cheklanishi mumkin emas.

Maʼlumotlar va ularni tashuvchilar maxfiylashtirilishi munosabati bilan fuqarolar oʻzining mulk huquqi cheklanganligi toʻgʻrisidagi qarorlar ustidan sudga shikoyat qilish huquqiga ega.

Maʼlumotlar va ularni tashuvchilar maxfiylashtirilishi natijasida maʼlumotlarni tashuvchilarning mulkdoriga yetkazilgan zararning oʻrni Oʻzbekiston Respublikasi Vazirlar Mahkamasi tomonidan belgilangan tartibda qoplanadi.