8-modda. Aholiga psixologik yordam koʻrsatish tartibi

Psixologik yordam davlat organlarida yoki boshqa tashkilotlarda ishlovchi psixologlar yoxud ushbu sohada xususiy tartibda faoliyat olib boruvchi yuridik shaxslar yoki yakka tartibdagi tadbirkorlar tomonidan bepul yoki pullik asosda koʻrsatiladi.

Pullik asosdagi psixologik yordam yozma shakldagi shartnomaga asosan koʻrsatiladi, bundan psixologik yordam anonim tarzda koʻrsatiladigan hollar mustasno. Voyaga yetmagan shaxsga psixologik yordam koʻrsatishda shartnoma uning qonuniy vakili bilan tuziladi.

Psixologik yordam shaxs tomonidan shaxsini tasdiqlovchi hujjat taqdim etilmasdan aytilgan familiya, ism, yosh va yashash joyi koʻrsatiladigan shaxsiy kartani rasmiylashtirish yoʻli bilan anonim tarzda koʻrsatilishi mumkin.

Psixologik yordam koʻrsatish toʻgʻrisidagi shartnomada taraflarning nomi (jismoniy shaxsning shaxsga doir maʼlumotlari), manzili, ularning huquq va majburiyatlari, javobgarligi, toʻlovni amalga oshirish tartibi, psixologik yordamning turi va shakli, nizolarni hal etish tartibi, shartnomani bekor qilish shartlari va boshqa axborot koʻrsatiladi.

Psixologik yordam ushbu yordamni soʻrab murojaat qilgan shaxsning yoki uning qonuniy vakilining roziligi bilan koʻrsatiladi.

Voyaga yetmagan shaxsga psixologik yordam uning qonuniy vakilining roziligi bilan koʻrsatiladi. Oʻn toʻrt yoshga toʻlmagan shaxsga uning qonuniy vakillarining roziligisiz psixologik yordam koʻrsatishga unga nisbatan tazyiq va zoʻravonlik oʻtkazish hollari aniqlanganda, shuningdek favqulodda holatda, favqulodda vaziyatda yoki baxtsiz hodisalarda yoʻl qoʻyiladi.

Davlat aholiga malakali psixologik yordam koʻrsatish tizimini rivojlantirish uchun shart-sharoitlar yaratadi.