9-modda. Bepul psixologik yordam koʻrsatish

Davlat tomonidan quyidagi toifadagi shaxslarga bepul psixologik yordam kafolatlanadi:

qonun bilan belgilangan bepul tibbiy yordamning kafolatlangan hajmi doirasida Oʻzbekiston Respublikasi fuqarolariga;

favqulodda holatdan va favqulodda vaziyatlardan jabrlangan shaxslarga, ularning oila aʼzolariga, shuningdek favqulodda holat va favqulodda vaziyatlarning oqibatlarini bartaraf etishda ishtirok etgan shaxslarga;

terrorchilik harakati natijasida jabrlangan shaxslarga;

ijtimoiy himoya yagona reyestriga kiritilgan kam taʼminlangan oilalarga;

oʻzgalar parvarishiga muhtoj boʻlgan yolgʻiz keksalarga, yolgʻiz yashovchi keksalarga va nogironligi boʻlgan shaxslarga;

ijtimoiy himoyaga muhtoj bolalarga;

muayyan yashash joyiga ega boʻlmagan shaxslarga;

tazyiq va zoʻravonlikdan jabrlangan shaxslarga;

davlat maktabgacha taʼlim tashkilotlarida va umumiy oʻrta taʼlim muassasalarida taʼlim oluvchi shaxslarga;

jazoni ijro etish muassasalaridan ozod qilingan shaxslarga;

odam savdosidan jabrlangan shaxslarga.

Qonunda bepul psixologik yordam olish huquqiga ega shaxslarning boshqa toifalari ham belgilanishi mumkin.

Davlat tomonidan kafolatlangan bepul psixologik yordam koʻrsatish boʻyicha tadbirlarni moliyalashtirish Oʻzbekiston Respublikasining Davlat budjeti mablagʻlari hisobidan amalga oshiriladi.

Psixologik yordam koʻrsatish sohasidagi nodavlat tashkilotlar oʻz ichki hujjatlariga muvofiq bepul psixologik yordam koʻrsatishi mumkin.