99-modda. Uglevodorodlarni qazib olishga doir ruxsatnomaga ega boʻlgan yer qaʼridan foydalanuvchilarga beriladigan kafolatlar

Yangi konni oʻzlashtirishda uglevodorodlarni qazib oluvchi yer qaʼridan foydalanuvchilarga ushbu moddaning ikkinchi qismi hisobga olingan holda quyidagilar kafolatlanadi:

1) qazib olingan uglevodorodlarning bir qismini tegishli davlat organlari yoki davlat korxonalari tomonidan alohida kelishuvlarga muvofiq xarid qilish;

2) uglevodorodlarni transportda tashish va qayta ishlash obyektlariga hamda yer qaʼri uchastkasida qazib olingan uglevodorodlarning barcha hajmlari uchun boshqa tegishli infratuzilmaga kirish;

3) qazib olingan tabiiy gazning bir qismini taraflarning manfaatdor emasligi prinsipiga koʻra xalqaro bozor narxlari boʻyicha alohida kelishuvlarga muvofiq uchinchi shaxslarga eksport qilish huquqi.

Fors-major holatlari yuzaga kelgan taqdirda ushbu kafolatning taqdim etilishi Oʻzbekiston Respublikasi Prezidentining yoki Oʻzbekiston Respublikasi Vazirlar Mahkamasining hujjatlariga muvofiq har qanday sodir boʻlgan hodisa tugaguniga qadar toʻxtatib turilishi mumkin. Ushbu modda maqsadlari uchun fors-major holatlari deganda ruxsatnoma egasi va (yoki) biror bir vakolatli davlat organlari nazoratidan tashqarida boʻlgan va kutilmagan yoki oldindan aytib boʻlmaydigan har qanday favqulodda hodisa tushuniladi.

Bunday hodisa jumlasiga faqat zilzilalar kabi tabiiy ofatlar, eʼlon qilingan yoki eʼlon qilinmagan urushlar, xorijiy davlatlar bilan harbiy harakatlar, bosqinlar, ommaviy tartibsizliklar, oʻta sovuq ob-havo sharoitlari hamda umumiy ish tashlashlar singari keng koʻlamli fuqarolar tartibsizliklari kirishi mumkin.