98-modda. Uglevodorodlarni qazib olishga doir ruxsatnoma doirasidagi yakuniy hisobot

Uglevodorodlarni qazib olishga doir ruxsatnomaga ega boʻlgan yer qaʼridan foydalanuvchilar ruxsatnomaning amal qilishi tugagan kundan eʼtiboran uch oy ichida Oʻzbekiston Respublikasi Energetika vazirligiga hamda Oʻzbekiston Respublikasi Togʻ-kon sanoati va geologiya vazirligiga ruxsatnoma amal qilgan butun davr uchun qonunchilik hujjatlarida belgilangan shakl boʻyicha yakuniy hisobot taqdim etishi shart.

Yakuniy hisobot uglevodorodlar boʻyicha yillik hisobotlar toʻplamini oʻz ichiga oladi, shuningdek quyidagilarni tavsiflaydi:

1) qazib olish va qayta ishlash boʻyicha amalga oshirilgan ishlarning natijalarini, shu jumladan qazib olingan uglevodorodlarning, ishlab chiqarilgan neft mahsulotlarining hamda tabiiy gazni chuqur qayta ishlash mahsulotlarining tonnadagi ogʻirligi, hajmlari, tarkibi, salmogʻi va qiymati haqidagi maʼlumotlarni;

2) olib chiqilgan chiqindilarning tonnadagi ogʻirligi va hajmi hamda ularni utilizatsiya qilish usullari haqidagi maʼlumotlarni;

3) xarajatlar, chiqimlar va ishga joylashtirilgan xodimlar haqidagi batafsil maʼlumotlarni;

4) rejalarda hamda tegishli masshtabdagi kesimlarda aks ettirilgan, yer qaʼri uchastkasida joylashgan uglevodorodlarning qolgan zaxiralari va resurslarining dastlabki hisobini;

5) mehnatni muhofaza qilish va xavfsizlik texnikasi masalalarini, shuningdek ruxsatnoma doirasida amalga oshirilayotgan qazib olish va qayta ishlash bilan bogʻliq ekologik masalalarni, shu jumladan biror-bir sodir boʻlgan jiddiy avariyalar va baxtsiz hodisalarning turi hamda sonini;

6) foydalanishdan chiqarish rejasiga va yer qaʼridan foydalanish oqibatlarini tugatish rejasiga muvofiq yer uchastkasini tiklash boʻyicha, yer uchastkasining uzil-kesil tiklanishini taʼminlovchi amalga oshirilgan hamda rejalashtirilayotgan chora-tadbirlarni;

7) uglevodorodlarni qazib olish ishlari jarayonida yer qaʼridan foydalanuvchi qilgan umumiy xarajatlarni.