97-modda. Uglevodorodlarni qazib olishga doir ruxsatnoma doirasidagi hisobdorlik

Uglevodorodlarni qazib olishga doir barcha ishlar uglevodorodlar boʻyicha hisobotlarda hujjatlashtiriladi.

Uglevodorodlarni qazib olishga doir ruxsatnomaga ega boʻlgan yer qaʼridan foydalanuvchi Oʻzbekiston Respublikasi Energetika vazirligiga quyidagi hisobotlarni taqdim etadi:

1) agar uglevodorodlar yer qaʼri uchastkasidan chiqarib olinayotgan boʻlsa:

a) tegishli kun tugaganidan keyin ikki kundan kechiktirmay — har bir kun uchun uglevodorodlarni qazib olish toʻgʻrisidagi har kungi hisobotni;

b) uglevodorodlarni amalda qazib olish boshlanganidan keyin har bir oy tugaganidan keyin oʻn kundan kechiktirmay — qazib olish toʻgʻrisidagi har oylik hisobot oʻtgan oydagi qazib olishga doir ishlar haqidagi maʼlumotlar koʻrsatilgan holda;

2) har bir chorak tugaganidan keyin oʻttiz kun ichida:

a) uglevodorodlar konining mahsuldorligi toʻgʻrisidagi har choraklik hisobot;

b) oʻtgan chorakdagi qazib olingan uglevodorodlarni realizatsiya qilish toʻgʻrisidagi hisobot.

Yer qaʼridan foydalanuvchi uglevodorodlarni qazib olish ishlari boshlangan oydan eʼtiboran har bir yil tugaganidan keyin oʻttiz kundan kechiktirmay Oʻzbekiston Respublikasi Energetika vazirligiga hamda Oʻzbekiston Respublikasi Togʻ-kon sanoati va geologiya vazirligiga yillik hisobot taqdim etadi, unda quyidagilar nazarda tutiladi:

1) oʻtgan yilda yer qaʼri uchastkasida amalga oshirilgan uglevodorodlarni qazib olish boʻyicha barcha turdagi umumiy ishlarning tavsifi, har bir qatlam yoki uning qismi boʻyicha uglevodorodlar zaxiralarining, shuningdek har bir topilgan obyekt boʻyicha uni yer qaʼri uchastkasida oʻzlashtirish uchun uglevodorodlar hajmlarining dastlabki hisob-kitobi;

2) uglevodorodlarni qazib olish hajmlariga (qazib olish chogʻidagi yoʻqotishlarni qoʻshgan holda) doir maʼlumotlar, shu jumladan uglevodorodlar konini boshqarish va uni oʻzlashtirish samaradorligini taʼminlashga doir dolzarb maʼlumotlar;

3) uglevodorodlarni qazib olish, yuklab joʻnatish va realizatsiya qilish uchun xarajatlar toʻgʻrisidagi maʼlumotlar;

4) xarid qilingan tovarlar, ishlar va xizmatlar toʻgʻrisidagi, shuningdek ularning tarkibidagi mahalliy tovarlar, ishlar va xizmatlar ulushi haqidagi, shu jumladan mahalliy ishchi kuchini oʻqitish va ilmiy-tadqiqot faoliyati uchun xarajatlar toʻgʻrisidagi maʼlumotlar;

5) qonunchilik talablariga muvofiq boshqa maʼlumotlar.