90-modda. Qoʻshilib chiqadigan gazni yoqish va gazni sovuq holida chiqarib yuborish

Qazib olingan uglevodorodlarni yoqishga yoki sovuq holida chiqarib yuborishga faqat zarurat boʻlgan taqdirda xavfsizlikni taʼminlash maqsadida yoki uglevodorodlarni baholash jarayonida yoxud uglevodorodlarni qazib olish boʻyicha ishlarni amalga oshirish jarayonida foydalaniladigan obyektni foydalanishga topshirish chogʻida yoʻl qoʻyiladi.

Yer qaʼridan foydalanuvchilar qazib olingan uglevodorodlarni yoqish yoki sovuq holida chiqarib yuborish, shu jumladan yoqilgʻi sifatida yoki uglevodorodlarni chiqarib olishni yaxshilash, chiqarib yuborish uchun nasos bilan haydab kiritish vositasi sifatida foydalanish, saqlash yoki biror bir keragidan ortiqcha uglevodorodlarni maqbul iqtisodiy shartlarda maishiy maqsadlarda foydalanish uchun davlat tasarrufiga berish boʻyicha barcha oqilona tijoratga yoki foydalanishga oid muqobil imkoniyatlarni koʻrib chiqishi shart.

Yer qaʼridan foydalanuvchi uglevodorodlarni rejalashtirilgan tarzda yoqish yoki sovuq holida chiqarib yuborish boshlanishidan oldin Yer qaʼridan foydalanish markaziga ariza beradi, shuningdek biror-bir zarur ekologik ekspertiza yuzasidan davlat ekologik ekspertizasining hamda Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasining ijobiy xulosasini yoki boshqa maʼqullashlarni oladi.

Qazib olingan uglevodorodlarni mashʼalda yoqish yoki sovuq holida chiqarib yuborishga doir arizada arizani berish sabablari va tegishli neft-gaz infratuzilmasi obyektining tavsifi, shuningdek uglevodorodlarning hajmlari, tarkibi va ularni yoqish yoki sovuq holida chiqarib yuborish muddatlari koʻrsatiladi.

Yer qaʼridan foydalanish markazi qazib olish boʻyicha ishlar davomida yer qaʼridan foydalanuvchi tomonidan nasos bilan haydalishi, sovuq holida chiqarib yuborilishi yoki mashʼalda yoqilishi lozim boʻlgan qazib olinayotgan uglevodorodlarning muayyan vaqt davri uchun eng koʻp hajmlarini belgilaydi. Ushbu hajmlarni belgilashda Yer qaʼridan foydalanish markazi yer qaʼridan foydalanuvchi bilan yaqin hamkorlik qiladi va:

1) kon, uglevodorod qatlamining har bir qatlami boʻyicha va har bir alohida quduq boʻyicha nasos bilan haydalishi, chiqarib yuborilishi va mashʼalda yoqilishi lozim boʻlgan qazib olinayotgan uglevodorodlarning umumiy oylik hajmlarini taqsimlaydi;

2) agar konning xususiyatlari haqidagi yangi axborot yoki boshqa holatlar oʻzgacha qoidani talab qilmasa, konni oʻzlashtirish rejasi asoslanadigan qazib olish jadvalini inobatga oladi.