89-modda. Uglevodorodlarni qazib olishga doir ruxsatnoma doirasida geologik jihatdan oʻrganishni amalga oshirish

Uglevodorodlarni qazib olish davrida yer qaʼridan foydalanuvchilar topilgan konning geologik tuzilmasini va zaxiralarini yoki uglevodorodlar qatlamlarini yanada aniqlashtirish maqsadida yer qaʼri uchastkasida geologik jihatdan oʻrganishni uglevodorodlarni qazib olishga doir amaldagi ruxsatnoma doirasida amalga oshirishga haqli. Konni har qanday bunday geologik jihatdan oʻrganish va geologik jihatdan suratga olish uglevodorodlar konini oʻzlashtirish loyihasiga hamda lozim darajadagi neft-gaz amaliyotiga muvofiq amalga oshiriladi.

Yer qaʼridan foydalanuvchilar Yer qaʼridan foydalanish markazini oʻzi amalga oshirish niyatida boʻlgan konni geologik jihatdan oʻrganish toʻgʻrisida bunday ishlar boshlanishidan bir hafta oldin yozma shaklda xabardor qiladi. Bunday xabarnomaning shakli qonunchilik hujjatlari bilan belgilanadi.

Agar qazib olish uchastkasida geologik jihatdan oʻrganish davomida yer qaʼridan foydalanuvchi tomonidan yangi qatlam topilgan boʻlsa, uni baholash konni oʻzlashtirish loyihasiga doir qoʻshimchaga muvofiq amalga oshiriladi.

Yer qaʼri uchastkasida uglevodorodlarning yangi qatlamlari topilganligi uglevodorodlarni qazib olish davrini uzaytirish uchun asos boʻlmaydi.

Yer qaʼridan foydalanuvchi bunday ishlarni amalga oshirish tugallanganidan keyin bir oy ichida Yer qaʼridan foydalanish markaziga konni ishlatishga oid biror-bir geologik jihatdan oʻrganish va suratga olish natijalari toʻgʻrisidagi barcha axborotni taqdim etadi.