84-modda. Uglevodorodlarni qazib olishga doir ruxsatnomani rasmiylashtirish

Uglevodorodlarni geologik jihatdan oʻrganishga doir ruxsatnomaga ega boʻlgan yer qaʼridan foydalanuvchining uglevodorodlarni qazib olishga doir ruxsatnomani berish toʻgʻrisidagi arizasi olingan yoki auksion yoxud tender jarayoni tugaganidan keyin neft-gaz konini oʻzlashtirishning yakuniy loyihasi olingan paytdan eʼtiboran besh ish kuni ichida, qoʻllaniladigan holga qarab, Yer qaʼridan foydalanish markazi arizani koʻrib chiqadi va taqdim etilgan arizaning toʻliqligini aniqlash uchun dastlabki oʻrganishni amalga oshiradi.

Arizachi dastlabki koʻzdan kechirish bosqichi tugallanganidan keyin arizadagi biror-bir kamchiliklar haqida xabardor qilinadi. Yer qaʼridan foydalanish markazi arizachiga arzimas kamchiliklarni tuzatish uchun ruxsat berishga yoki toʻliq boʻlmagan arizani qaytarishga haqli. Agar ariza qaytarilgan boʻlsa, arizachi takroran yangi ariza berishga haqli.

Toʻldirilgan arizani dastlabki tarzda koʻrib chiqish toʻldirilgan ariza olingan paytdan eʼtiboran yigirma ish kuni ichida Yer qaʼridan foydalanish markazi tomonidan amalga oshiriladi.

Arizani koʻrib chiqish chogʻida Yer qaʼridan foydalanish markazi uglevodorodlarni qazib olish ishlari boʻyicha taklif qilinayotgan ishlarni amalga oshirish uchun arizachining moliyaviy, kasbiy va texnik layoqati va imkoniyatlarini, shuningdek taklif etilayotgan neft-gaz konini oʻzlashtirish loyihasining toʻliqligi, bajara olinishi mumkinligi nuqtai nazaridan texnik va foydalanishga oid jihatlarini hamda taqdim etilgan hujjatlar ushbu Qonunning 82 va 85-moddalarida nazarda tutilgan qoidalarga muvofiqligini oʻrganadi. Neft-gaz konini oʻzlashtirishning taklif etilayotgan loyihasida kamchiliklar aniqlangan hollarda, Yer qaʼridan foydalanish markazi arizachidan kamchiliklarni toʻqson kundan oshmaydigan oqilona muddatda bartaraf etishni talab qilishi mumkin.

Arizachi bunday soʻrov olinganidan keyin oʻz arizasini chaqirib olishga, unga oʻzgartirishlar kiritishga yoki oʻzgartirishlar kiritish maqsadga muvofiq emasligi haqida yozma tushuntirish taqdim etishga haqli. Agar arizachi oʻz arizasiga oʻzgartirishlar kiritsa yoki unga oʻzgartirishlar kiritish maqsadga muvofiq emasligi haqida yozma tushuntirish taqdim etsa, Yer qaʼridan foydalanish markazi bunday javobni koʻrib chiqadi va oʻz javobini yigirma ish kuni ichida taqdim etadi. Bundan tashqari arizachi oʻz nuqtai nazarini bayon qilish uchun eshituv oʻtkazilishini talab qilishga haqli, Yer qaʼridan foydalanish markazi esa neft-gaz konini oʻzlashtirishning taklif qilinayotgan loyihasi xususidagi savollarga javob berish uchun arizachining shaxsan hozir boʻlishini talab qilish huquqiga ega. Bu holda Yer qaʼridan foydalanish markazi arizachining vajlarini koʻrib chiqish uchun bunday eshituvni oʻn besh ish kuni ichida chaqiradi. Yer qaʼridan foydalanish markazi oʻsha paytda maʼlum boʻlishi mumkin boʻlgan va ushbu qismda bayon qilingan jarayon doirasida uni dastlabki tarzda koʻrib chiqishga kiritilmagan yangi masalalarni koʻtarish huquqiga ega emas. Ushbu qismda bayon qilingan jarayon Yer qaʼridan foydalanish markazi ruxsatnoma berilishini tasdiqlashga tayyor boʻlguniga yoki arizachi oʻz arizasini uzil-kesil chaqirib olguniga qadar bir necha marta qoʻllaniladi.