82-modda. Uglevodorodlarni qazib olishga doir ruxsatnoma berish toʻgʻrisidagi ariza

Uglevodorodlarni geologik jihatdan oʻrganishga doir ruxsatnomaga ega boʻlgan yer qaʼridan foydalanuvchi uglevodorodlarning yastanganligi ehtimoli va boʻlishi mumkin boʻlgan tijoratbop topilmalarni, shu jumladan bunday kondan tijorat maqsadida foydalanish uchun zarur boʻlgan tutash kadastr kvadratlarini qamrab oladigan, uglevodorodlarni geologik jihatdan oʻrganishga doir bunday ruxsatnomaga kiritilgan chegaradosh kadastr kvadratlarida hamda biror-bir chegaradosh ochiq kvadratlarda yoki, basharti ushbu Qonunning 108-moddasi qoidalariga rioya etilsa, amaldagi ruxsatnoma doirasidagi chegaradosh kvadratlarda uglevodorodlarni qazib olishga doir ruxsatnoma berish boʻyicha mutlaq huquqqa ega boʻladi.

Agar tarkibida tijoratbop topilma mavjud boʻlgan uglevodorodlar koni uglevodorodlarni geologik jihatdan oʻrganishga doir amaldagi ruxsatnomada koʻrsatilgan yer qaʼri uchastkasidan tashqariga chiqib ketsa, yer qaʼridan foydalanuvchi yastangan tegishli qatlamni yoki neft-gaz konini qamrab oladigan ochiq kvadratlarni qoʻshgan holda, uglevodorodlarni qazib olishga doir ruxsatnoma doirasida yer qaʼri uchastkasining perimetrini kengaytirish haqidagi arizani Yer qaʼridan foydalanish markaziga berish boʻyicha mutlaq huquqqa ega boʻladi.

Uglevodorodlarni geologik jihatdan oʻrganishga doir ruxsatnomaga ega boʻlgan yer qaʼridan foydalanuvchi uglevodorodlarni qazib olishga doir ruxsatnoma berish uchun Yer qaʼridan foydalanish markaziga quyidagi maʼlumotlar koʻrsatilgan tegishli arizani beradi:

1) arizachining toʻliq nomi;

2) arizachi vakolatli shaxs ekanligini tasdiqlovchi axborot;

3) soʻralayotgan kadastr kvadratlari toʻgʻrisidagi batafsil axborot;

4) tijoratbop topilma haqidagi eʼlondan avvalgi jarayonda tayyorlangan va taqdim etilgan geologik jihatdan oʻrganish toʻgʻrisidagi barcha axborot;

5) uglevodorodlar konini oʻzlashtirishning dastlabki loyihasi;

6) uglevodorodlar konini oʻzlashtirish loyihasiga muvofiq uglevodorodlarni qazib olishga doir taklif etiladigan ishlarni amalga oshirish uchun arizachining moliyaviy, kasbiy va texnik qobiliyatlari hamda imkoniyatlarining tasdigʻi;

7) ekologik ekspertizaning ijobiy xulosasi;

8) yer qaʼri uchastkasini foydalanishdan chiqarish boʻyicha dastlabki reja;

9) arizani koʻrib chiqqanlik uchun yigʻim toʻlanganligini tasdiqlovchi hujjat.