79-modda. Uglevodorodlarni geologik jihatdan oʻrganishga doir ruxsatnomaga ega boʻlgan yer qaʼridan foydalanuvchilarning majburiyatlari

Uglevodorodlarni geologik jihatdan oʻrganishga doir ruxsatnomaga ega boʻlgan yer qaʼridan foydalanuvchilar:

1) ruxsatnoma berilgan kundan eʼtiboran toʻqson kun ichida Yer qaʼridan foydalanish markaziga ruxsatnoma amal qiladigan butun davr uchun geologik jihatdan oʻrganishga doir ishlarning kompleks loyihasini, shu jumladan taxmin qilinayotgan neft-gaz operatsiyalarining oqibatlarini bartaraf etish choralari koʻrsatilgan holda yer qaʼri uchastkasini foydalanishdan chiqarish boʻyicha dastlabki rejani taqdim etishi;

2) uglevodorodlarni geologik jihatdan oʻrganishga doir ishlar boshlanguniga qadar ekologik ekspertiza oʻtkazishi va davlat ekologik ekspertizasining hamda Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasining ijobiy xulosasini olishi shart.

Uglevodorodlarni geologik jihatdan oʻrganishga doir ishlar loyihasi amalga oshirilishi taklif etilayotgan ishlar, geologik jihatdan oʻrganishni amalga oshirish usullari va vositalari toʻgʻrisidagi batafsil axborotni hamda uglevodorodlarni geologik jihatdan oʻrganishga doir ruxsatnomaning amal qilish davri uchun ishlarni bajarish jadvalini oʻz ichiga olishi kerak.

Uglevodorodlarni geologik jihatdan oʻrganish loyihasining mazmuni va shakli qonunchilik hujjatlarida belgilanadi.

Yer qaʼridan foydalanuvchi uglevodorodlarni geologik jihatdan oʻrganishga doir ruxsatnomaning amal qilish muddati ichida:

1) ushbu modda birinchi qismining 2-bandida koʻrsatilgan barcha zarur ijobiy ekologik xulosalar olingan sanadan eʼtiboran oʻttiz kun ichida geologik jihatdan oʻrganishga doir ishlar loyihasiga muvofiq uglevodorodlarni geologik jihatdan oʻrganishni boshlashi;

2) geologik jihatdan oʻrganishga doir ishlarning barcha amaldagi standartlar va normalarga, shuningdek tegishli darajadagi neft-gaz amaliyotiga muvofiqligini taʼminlashi;

3) geologik jihatdan oʻrganish ishlarining uglevodorodlarni geologik jihatdan oʻrganishning joriy loyihasiga aniq muvofiq kelishini taʼminlashi;

4) geologik jihatdan oʻrganish boʻyicha butun faoliyatni hamda yer qaʼri uchastkasidan biror-bir boshqacha tarzda qonuniy asosda foydalanishni ushbu barcha ishlar oqilona vositalar bilan yoʻl qoʻyilmasligi mumkin boʻlgan ijtimoiy yoki xususiy manfaatlar buzilishiga olib kelmasligini taʼminlash maqsadida neft-gaz operatsiyalarini amalga oshirish uchun zarur boʻlgan choralar bilan cheklashi;