78-modda. Uglevodorodlarni geologik jihatdan oʻrganishga doir ruxsatnomaga ega boʻlgan yer qaʼridan foydalanuvchilarning huquqlari

Uglevodorodlarni geologik jihatdan oʻrganishga doir ruxsatnomaga ega boʻlgan yer qaʼridan foydalanuvchilar quyidagi mutlaq huquqlarga ega boʻladi:

1) uglevodorodlar konlarini topish hamda bunday qidirib topilgan konlarning sifatini, masshtablarini va ishlov berilganlik darajasini oʻrganish maqsadida geologik qatlamlarning tuzilishini va tarkibini oʻrganish hamda tadqiq etish, shuningdek boshqa rekognossirovka qilish va geologiya-qidiruv ishlarini amalga oshirish;

2) tahlil qilish, tadqiqotlar, sinovlar yoki tajribalar oʻtkazish maqsadida yer qaʼri uchastkasida burgʻilashni va tajriba-sanoat usulida foydalanishni amalga oshirish;

3) uchastkadan olingan uglevodorodlarning istalgan namunalarini, shuningdek suvning namunalarini yer qaʼri uchastkasidan chiqarib olish va olib chiqish;

4) neft-gaz operatsiyalarini samarali tarzda amalga oshirish uchun zarur boʻlgan istalgan xodimlar bilan birgalikda yer qaʼri uchastkasida yoki kadastr kvadrati yuzasining yer uchastkasida vaqtinchalik inshootlar hamda asbob-uskunalarni barpo etish yoki koʻchirish;

5) uglevodorodlarni rekognossirovka qilish ishlarini va geologik jihatdan oʻrganishni amalga oshirish maqsadida yer qaʼri uchastkasida yoki kadastr kvadrati yuzasining yer uchastkasida neft-gaz infratuzilmasining vaqtinchalik obyektlarini qurish, barpo etish, joylashtirish hamda ishlatish;

6) uglevodorodlarni geologik jihatdan oʻrganish yoki ular bilan bogʻliq yordamchi ishlar uchun zarur boʻlgan boshqa ishlarni amalga oshirish;

7) ushbu Qonunning 9-bobida belgilangan talablarga rioya etilgan taqdirda, uglevodorodlarni geologik jihatdan oʻrganishga doir ruxsatnomaning amal qilish muddati ichida istalgan vaqtda uglevodorodlarni qazib olishga doir ruxsatnomani soʻrash va olish.

Uglevodorodlarni geologik jihatdan oʻrganishga doir ruxsatnomaga ega boʻlgan yer qaʼridan foydalanuvchilar ushbu Qonunga hamda qonunchilik hujjatlariga muvofiq boshqa huquqlarga ham ega boʻlishi mumkin.