69-modda. Uglevodorodlarni rekognossirovka qilishga doir ruxsatnoma doirasida hisobdorlik

Uglevodorodlarni rekognossirovka qilishga doir ruxsatnomaga ega boʻlgan yer qaʼridan foydalanuvchi Yer qaʼridan foydalanish markaziga yer qaʼridan foydalanuvchi tomonidan oʻtgan uch oy uchun amalga oshirilgan uglevodorodlarni rekognossirovka qilish ishlarining borishi toʻgʻrisidagi batafsil axborotni oʻz ichiga olgan hisobotni har bir chorak tugaganidan keyin oʻn besh kun ichida taqdim etadi. Hisobot quyidagilarni oʻz ichiga oladi:

1) kadastr kvadrati yuzasining yer uchastkasi hududida olib borilgan dala kuzatuvlari, geologik yoki geofizik tadqiqotlar va (yoki) masofaviy zondlash ishlari toʻgʻrisidagi maʼlumotlarni;

2) biror-bir shunday olib borilgan kuzatuv, tadqiqot va (yoki) ishlarning turi, joylashgan yeri hamda vaqtini;

3) yer qaʼridan foydalanuvchi tomonidan olingan maʼlumotlarning, yozuvlarning, xaritalarning, uglevodorodli namunalarning, hisobvaraqlarning va axborotning koʻchirma nusxalarini;

4) yer qaʼridan foydalanuvchi tomonidan bajarilgan yoki olib borilayotgan biror-bir shunday kuzatuvni, tadqiqotni yoki ishlarni tahlil qilish natijalarini.

Yer qaʼridan foydalanuvchi uglevodorodlarni rekognossirovka qilishga doir ruxsatnomaning amal qilishi tugagan kundan eʼtiboran uch oy ichida ishlarni bajarish chogʻida olingan barcha dastlabki maʼlumotlar, shuningdek ishlov berish va sharhlash materiallari, kern namunalari va boshqa har qanday materiallar nazarda tutilgan ruxsatnomaning butun amal qilish muddati ichida ruxsatnomada koʻrsatilgan yer uchastkasida amalga oshirilgan rekognossirovka qilish ishlarining natijalari toʻgʻrisidagi yakuniy hisobotni qogʻozda va elektron tarzda Yer qaʼridan foydalanish markaziga taqdim etadi.

Agar uglevodorodlarni rekognossirovka qilishga doir ruxsatnoma amal qiladigan yakuniy chorakda olingan biror-bir maʼlumotlarga koʻra uch oydan koʻproq muddat ishlov berish talab etilsa, yakuniy hisobot maʼlumotlarga ishlov berilganidan keyin, biroq uglevodorodlarni rekognossirovka qilishga doir ruxsatnomaning amal qilishi tugagan sanadan keyin olti oydan kechiktirmay darhol taqdim etiladi.

Uglevodorodlarni rekognossirovka qilish ishlari boʻyicha hisobotning shakli va unga doir talablar qonunchilik hujjatlari bilan belgilanadi.