62-modda. Qattiq holdagi foydali qazilmalarni qazib olish toʻgʻrisidagi yakuniy hisobot

Qattiq holdagi foydali qazilmalarni qazib olishni amalga oshirgan yer qaʼridan foydalanuvchi ruxsatnoma amal qiladigan butun davr uchun qattiq holdagi foydali qazilmalarni qazib olish toʻgʻrisidagi yakuniy hisobotni Yer qaʼridan foydalanish markaziga qattiq holdagi foydali qazilmalarni qazib olishga doir ruxsatnomaning amal qilishi tugagan sanadan keyin uch oy ichida taqdim etishi shart.

Foydali qazilmalarni qazib olish toʻgʻrisidagi yakuniy hisobot qattiq holdagi foydali qazilmalarni qazib olish toʻgʻrisidagi har yilgi hisobotlar toʻplamini oʻz ichiga oladi va quyidagilarni umumlashtiradi:

1) konchilik faoliyatiga doir ishlarning natijalarini, shu jumladan qazib olingan va qayta ishlangan mineral xomashyoning tonnadagi ogʻirligi, hajmi, tarkibi, salmogʻi hamda qiymati haqidagi maʼlumotlarni;

2) olib chiqilgan chiqindilarning tonnadagi ogʻirligi va hajmi hamda ularni utilizatsiya qilish usuli toʻgʻrisidagi maʼlumotlarni;

3) xarajatlar, sarflar va yollangan xodimlar haqidagi batafsil maʼlumotlarni;

4) rejalarda va tegishli masshtabdagi kesimlarda aks ettiriladigan, yer qaʼri uchastkasida joylashgan biror-bir qolgan foydali qazilmalar zaxiralarining va resurslarning hisob-kitoblarini;

5) ruxsatnomaga muvofiq amalga oshiriladigan foydali qazilmalarni qazib olish va qayta ishlash bilan bogʻliq boʻlgan mehnatni muhofaza qilish hamda xavfsizlik texnikasi, shuningdek atrof-muhitni muhofaza qilish masalalarini, shu jumladan biror-bir sodir boʻlgan jiddiy baxtsiz hodisalarning turi va sonini;

6) yerlarni rekultivatsiya qilish boʻyicha qoʻllaniladigan choralarni va yer qaʼri uchastkasi hududini tiklashning yakuniy holatini;

7) ishlab chiqarishga doir umumiy qilingan sarf-xarajatlar toʻgʻrisidagi maʼlumotlarni;

8) qonunchilik hujjatlarida nazarda tutilgan boshqa maʼlumotlarni.

Yakuniy hisobotning shakli qonunchilik hujjatlarida belgilanadi.