61-modda. Qattiq holdagi foydali qazilmalarni qazib olishda hisobdorlik

Butun konchilik faoliyati foydali qazilmalarni qazib olish toʻgʻrisidagi hisobotlarda hujjatlashtiriladi.

Foydali qazilmalarni qazib olish toʻgʻrisidagi har yilgi hisobot quyidagilarni oʻz ichiga oladi:

1) konchilik faoliyatiga doir ishlarning barcha turlari tavsifini, shu jumladan quyidagilar boʻyicha batafsil axborotni:

a) konchilik infratuzilmasi obyektlarining qurilishi yoki oʻzgartirilishi;

b) togʻ-kon ishlari, shu jumladan olib chiqilgan chiqindilar va ularni utilizatsiya qilish usullari;

v) yuklab joʻnatish va logistika;

g) avariyalar va xavfsizlik sohasidagi mojarolar;

2) qazib olingan foydali qazilmalar tavsifini (shu jumladan qazib olish chogʻidagi yoʻqotishlarni);

3) geologik jihatdan oʻrganish chogʻida amalga oshiriladigan biror-bir ishlar boʻyicha geologik hisobotni;

4) realizatsiya qilish (sotish) va sarf-xarajatlar toʻgʻrisidagi maʼlumotlarni;

5) yer qaʼridan foydalanuvchining yillik moliyaviy hisobotining koʻchirma nusxalarini;

6) foydali qazilmalarning asosiy turlari boʻyicha loyihalar uchun, bundan texnogen mineral hosilalar mustasno — ushbu Qonunning 56-moddasiga muvofiq har yilgi eng kam xarajatlar toʻgʻrisidagi hamda ushbu Qonunning 16-bobiga muvofiq mahalliy ishlab chiqarish tovarlarining xaridlari boʻyicha, mahalliy kadrlarni yollash, oʻqitish va yuqori lavozimga koʻtarish boʻyicha rejalarning bajarilishi haqidagi hisobotni;

7) qonunchilik hujjatlarida nazarda tutilgan boshqa maʼlumotlarni.

Har yilgi hisobotning shakli qonunchilik hujjatlarida belgilanadi.

Foydali qazilmalarni qazib olish toʻgʻrisidagi har yilgi hisobot keyingi yilning 31-martiga qadar boʻlgan muddatda Yer qaʼridan foydalanish markaziga taqdim etiladi. Toʻliq boʻlmagan kalendar yil uchun hisobotlar mazkur davr tugaganidan keyin ikki oydan kechiktirmay aniq muddat uchun taqdim etiladi.