160-modda. Yer qaʼridan foydalanganlik uchun toʻlovlarning turlari

Yer qaʼridan foydalanish qonunchilik hujjatlarida nazarda tutilgan hollar uchun pulli asosda amalga oshiriladi.

Yer qaʼridan foydalanuvchilar barcha qoʻllaniladigan soliqlarni va boshqa maxsus toʻlovlarni toʻlaydi.

Yer qaʼridan foydalanuvchilarga soliq solish soliq toʻgʻrisidagi qonunchilikka muvofiq amalga oshiriladi. Yer qaʼridan foydalanganlik uchun soliq qazib olingan foydali qazilmalarga nisbatan qoʻllaniladi.

Yer qaʼridan foydalanganlik uchun soliqqa qoʻshimcha ravishda maxsus toʻlovlar jumlasiga quyidagilar kiradi:

1) ruxsatnoma berish yoki uning amal qilish muddatini uzaytirish uchun ariza bilan birga toʻlanadigan, arizani koʻrib chiqqanlik uchun yigʻim;

2) auksion, tender natijalariga koʻra, shuningdek Oʻzbekiston Respublikasi Prezidentining yoki Oʻzbekiston Respublikasi Vazirlar Mahkamasining hujjatlariga muvofiq (agar qoʻllash mumkin boʻlsa) toʻlanadigan toʻlovlar;

3) ushbu Qonunning 161-moddasiga muvofiq qattiq holdagi foydali qazilmalarni geologik jihatdan oʻrganish, uglevodorodlarni rekognossirovka qilish boʻyicha ishlar, uglevodorodlarni geologik jihatdan oʻrganish yoki yer ostida saqlash uchun geologik jihatdan oʻrganish boʻyicha har yilgi litsenziya toʻlovi.

Ushbu modda toʻrtinchi qismining 1-bandida koʻrsatilgan yigʻim ariza berish chogʻida toʻlanadi.

Ushbu modda toʻrtinchi qismining 2-bandida koʻrsatilgan toʻlovlar auksion yoki tender muvaffaqiyatli yakunlanganda yoki Oʻzbekiston Respublikasi Prezidentining yoki Oʻzbekiston Respublikasi Vazirlar Mahkamasining hujjati qabul qilinganidan keyin toʻlanadi.

Ushbu modda toʻrtinchi qismining 3-bandida koʻrsatilgan toʻlovlar ruxsatnoma berilgan kunda va ruxsatnoma berilgan kundan eʼtiboran har yili toʻlanadi.

Yer soligʻi amaldagi qonunchilikka muvofiq toʻlanadi.