154-modda. Neft-gaz operatsiyalari oqibatlarini tugatish boʻyicha majburiyatlarning bajarilishini taʼminlash

Tasdiqlangan neft-gaz operatsiyalarining birinchi yili tugaydigan sanadan kechiktirmay yer qaʼridan foydalanuvchi tomonidan yer qaʼri uchastkasini foydalanishdan chiqarish boʻyicha tasdiqlangan rejaga va yer uchastkasini tiklash boʻyicha rejaga doir faqat oʻz majburiyatlarini bajarish maqsadida aniq maqsadli bank hisobvaragʻiga ega boʻlgan yer qaʼri uchastkasini foydalanishdan chiqarish fondi tashkil etiladi.

Ushbu moddaning birinchi qismida koʻrsatilgan yer qaʼri uchastkasini foydalanishdan chiqarish fondining hisobvaragʻi:

1) yer qaʼridan foydalanuvchining nomiga maxsus eskrou hisobvaragʻi (eskrou-hisobvaraq) tarzida ochiladi;

2) Oʻzbekiston Respublikasi Markaziy bankining litsenziyasiga ega boʻlgan va Yer qaʼridan foydalanish markazi uchun maqbul boʻlgan yaxshi nufuzli tijorat bankida turadi;

3) foizlar hisoblanishini nazarda tutadi, bunda barcha hisoblangan foizlar yer qaʼri uchastkasini foydalanishdan chiqarish fondining bir qismi hisoblanadi;

4) inflyatsiya natijasida qiymati yoʻqotilishining oldini olish uchun nisbatan barqaror valyutada denominatsiya qilinadi.

Pul mablagʻlari yer qaʼri uchastkasini foydalanishdan chiqarish fondining hisobvaragʻiga yer qaʼridan foydalanuvchi tomonidan har yili 31-martga qadar kiritiladi. Agar toʻlov davridagi yil toʻliq boʻlmasa, yer qaʼridan foydalanuvchining moliyalashtirish boʻyicha majburiyati mazkur yildagi davrning har bir toʻliq oyi uchun mutanosib ravishda hisob-kitob qilinadi.

Geologik jihatdan oʻrganishni va baholashni amalga oshirishda yer qaʼridan foydalanuvchining har yilgi badali oʻtgan yilgi kapital xarajatlarning nol butun oʻndan besh foizini tashkil etadi, uglevodorodlarni qazib olishda esa kapital xarajatlarning ikki foizini tashkil etadi.

Toʻlovlar yer qaʼridan foydalanuvchi tomonidan bir yoʻla yoki qismlarga boʻlib amalga oshirilishi mumkin, qismlar bir moliya yilida toʻrt qismdan oshmasligi kerak. Yer qaʼri uchastkasini foydalanishdan chiqarish fondiga kiritiladigan badallar soliq solinadigan bazadan chegirib tashlanishi lozim.

Ushbu modda beshinchi qismining qoidalarini inobatga olgan holda, yer qaʼri uchastkasini foydalanishdan chiqarish fondining pul mablagʻlari garovga qoʻyilishi yoki biror-bir qarzning yoki kafolatning taʼminoti sifatida taklif qilinishi va foydalanilishi yoxud biror-bir boshqa usulda yoki har qanday boshqa shaklda undirilishi yoki oʻzga shaxsga berilishi mumkin emas.