145-modda. Yer qaʼridan foydalanuvchining yer uchastkasini tiklash boʻyicha dastlabki rejani tuzishga doir majburiyati

Yer qaʼridan foydalanuvchi yer qaʼridan foydalanishga doir biror-bir ishlar boshlanguniga qadar Yer qaʼridan foydalanish markazi bilan kelishish uchun geologik jihatdan oʻrganish loyihasini yoki konni oʻzlashtirish loyihasini tayyorlash jarayonida konni yopish rejasini tayyorlash boʻyicha majburiyatlar doirasida yer qaʼridan foydalanilgan yer uchastkasini tiklash boʻyicha dastlabki rejani tuzadi.

Yer uchastkasini tiklash boʻyicha dastlabki reja, agar qoʻllash mumkin boʻlsa, quyidagilarni oʻz ichiga oladi:

1) yer uchastkasini tiklash boʻyicha taklif etilayotgan ishlarni bajarishning dastlabki jadvalini;

2) rejani bajarish uchun taklif etilayotgan barcha chora-tadbirlar qiymatining baholanishini;

3) konchilik faoliyati (neft-gaz operatsiyalari) taklif etilayotgan bosqichlarining yer uchastkasiga hamda atrof-muhitga va (yoki) parallel tiklash chora-tadbirlari uchun toʻkindi uyumlarini joylashtirish maydonchalariga va (yoki) yer osti qazishmalarini qaytadan toʻldirib koʻmib tashlashga boʻlgan ehtimoliy taʼsirining baholanishini;

4) yer uchastkasini tiklash boʻyicha chora-tadbirlarni bajarish uchun foydalanishga taklif etilayotgan texnika va transport uskunalarning tavsifini;

5) yer qaʼri uchastkasidan rejalashtirilayotgan qayta foydalanishni va undan takroran foydalanish uchun taklif etilayotgan cheklovlarni;

6) konchilik infratuzilma obyektlarini demontaj qilishning dastlabki rejasini;

7) toʻkindi uyumlari uchastkasiga daraxt koʻchatlari oʻtqazish va uni koʻkalamzorlashtirishning dastlabki rejasini;

8) rekultivatsiya qilishning dastlabki rejasini (koʻchat ekish, tuproqdan foydalanish, yuzani shakllantirish rejalarini, oʻsimlik va hayvonotning hayoti qayta tiklanishini ragʻbatlantirish chora-tadbirlarini oʻz ichiga oladi);

9) xizmat va jamoat ehtiyojlari uchun yoʻllar qurilishini nazarda tutuvchi infratuzilmaning, shuningdek uy-joy va rekreatsiya infratuzilmasining dastlabki rejasini;

10) konlar karyer usulda oʻzlashtirilgan taqdirda — kon qazib olinadigan uchastkada yer qaʼridan foydalanish boʻyicha ishlar natijasida landshaftga salbiy taʼsirning oʻrnini qoplash yuzasidan taklif etilayotgan chora-tadbirlarni va uning hududidan tashqaridagi oʻrnini qoplash chora-tadbirlarini;

11) tuproqni oʻgʻitlash boʻyicha taklif etilayotgan chora-tadbirlarni;