142-modda. Neft-gaz operatsiyalari uchun yer qaʼri uchastkasini foydalanishdan chiqarish boʻyicha yakuniy reja

Ushbu moddaning ikkinchi qismini inobatga olgan holda yer qaʼridan foydalanuvchi neft-gaz operatsiyalarining rejalashtirilayotgan tugatilishidan oldin bir yil ichida Yer qaʼridan foydalanish markaziga yer qaʼri uchastkasini foydalanishdan chiqarish boʻyicha yakuniy rejani tasdiqlash uchun taqdim etishi shart.

Agar yer qaʼridan foydalanuvchi tegishli ruxsatnomadan voz kechsa yoki ruxsatnoma oʻzining amal qilish muddati tugashidan oldin Yer qaʼridan foydalanish markazi tomonidan bekor qilinsa, yer qaʼri uchastkasini foydalanishdan chiqarish boʻyicha oxirgi tasdiqlangan dastlabki rejaning qoidalari qoʻllaniladi.

Yer qaʼridan foydalanish markaziga taqdim etiladigan yer qaʼri uchastkasini foydalanishdan chiqarish boʻyicha yakuniy reja, zarur boʻlgan taqdirda, quyidagilarni oʻz ichiga oladi:

1) yer qaʼridan foydalanuvchining nomi va pochta manzilini;

2) daxl qilingan kadastr kvadratlari doirasidagi neft-gaz operatsiyalari uchun foydalaniladigan yer qaʼri uchastkasining tavsifini;

3) qazib olingan uglevodorod resurslarining tavsifini hamda geologik, geofizik va geologik jihatdan oʻrganish bilan bogʻliq boshqa biror-bir mavjud maʼlumotlarni, shuningdek yer qaʼridan foydalanish boʻyicha ishlar jarayonida olingan har qanday boshqa tegishli axborotni, xususan, texnik qiyinchiliklar toʻgʻrisidagi, shuningdek xavfsizlik va ekologiya sohasidagi bunday ishlarni amalga oshirish jarayonida yuzaga keladigan qiyinchiliklar haqidagi axborotni;

4) yer qaʼridan foydalanish boʻyicha faoliyat ruxsatnomaga muvofiq boshlanadigan sanani va uni tugatish rejalashtirilayotgan sanani, shuningdek bunday tugatish sabablarini;

5) agar neft-gaz operatsiyalari biror-bir foydalanilayotgan neft-gaz koniga yoki boshqa konga daxl qilsa:

a) uglevodorodlar konining batafsil tarixiy axborotini, shu jumladan qazib olingan uglevodorodlar miqdorini;

b) neft-gaz operatsiyalari tugatilganidan keyin konda qoladigan uglevodorodlar miqdorining baholanishini;

6) foydalanishdan chiqarilishi lozim boʻlgan neft-gaz infratuzilmasi obyektlarining turlarini, shu jumladan ularning joylashuv sxemasini, joylashish tartibini, chuqurligini, materiallar turini hamda xaritalar va diagrammalarda aks ettiriladigan boshqa materiallarni;

7) yer qaʼri uchastkasini foydalanishdan chiqarish boʻyicha tegishli mavjud muqobillar tavsifini, ular: