132-modda. Yer qaʼridan foydalanuvchining ekologik ekspertizani oʻtkazishga va uning yuzasidan yer qaʼridan foydalanish boʻyicha muayyan ishlarni bajarish uchun ijobiy xulosa olishga doir majburiyatlari

Yer qaʼridan foydalanuvchi “Ekologik ekspertiza toʻgʻrisida”gi Oʻzbekiston Respublikasi Qonunida belgilangan davlat ekologik ekspertizasini oʻtkazishga doir talablarga qoʻshimcha ravishda yer qaʼridan foydalanish boʻyicha quyidagi ishlarga nisbatan ekologik ekspertiza oʻtkazishi shart:

1) yer qaʼrini yerlarning butunligi tasodifiydan koʻra koʻproq buzilishini taqozo etuvchi geologik jihatdan oʻrganish (masalan, zovurlar qazish, boshlama quduqlarni burgʻilash va seysmik tadqiqotlar);

2) foydali qazilmalarning asosiy turlarini qazib olish va qayta ishlash;

3) noruda foydali qazilmalarni qazib olish va qayta ishlash;

4) uglevodorodlarni geologik jihatdan oʻrganish va qazib olish boʻyicha qatlamning, shu jumladan u bilan bogʻlangan quduqlarning gidravlik yorilishini nazarda tutuvchi ishlar, shuningdek ilmiy sinovlar;

5) uglevodorodlar uchun quduqlarni burgʻilashga doir ishlarning barcha turlari;

6) neft-gaz operatsiyalarini amalga oshirish chogʻida geogen suvlarni boshqa oʻzanga burib yuborish, shu jumladan quduqlar orqali burib yuborish, agar bunday ishlar ushbu moddada nazarda tutilmagan boʻlsa;

7) uglevodorodlarni qayta ishlash va tashish obyektlarini qurish, montaj qilish hamda ulardan foydalanish;

8) maydoni besh gektardan ortiq boʻlgan konchilik faoliyati chiqindilari obyektlari;

9) maydoni ikki gektardan ortiq boʻlgan kukunlar toʻplagichlarni va suv quyiladigan hovuzlarni shakllantirish;

10) ifloslangan tuproqni yoki boshqa zararli materialni joylashtirish, konchilik sanoati chiqindilaridan yoki kukunlar toʻplagichlardan tashqari;

11) odamlar halok boʻlishi ehtimolini, inson sogʻligʻi uchun jiddiy xavfni yoki atrof-muhit uchun jiddiy tahdidni keltirib chiqarishi mumkin boʻlgan chiqindilar joylashtiriladigan obyektlar;

12) foydali qazilmalarni qazib olish bilan bogʻliq boʻlmagan, xavfli va zaharli moddalarni saqlashni koʻzda tutuvchi maqsadlarda yer qaʼri uchastkalaridan foydalanish;

13) radioaktiv moddalarni koʻmib tashlash uchun yer osti omborlarini qurish va ulardan foydalanish.