124-modda. Tadbirkorlik faoliyati bilan bogʻliq boʻlmagan maqsadlar uchun qurilishbop foydali qazilmalarni va toʻldirgichlarni qazib olish uchun maxsus qoidalar

Yer egalari, yerdan foydalanuvchilar va yer uchastkalarining mulkdorlari tadbirkorlik faoliyatini amalga oshirish bilan bogʻliq boʻlmagan shaxsiy, maishiy hamda boshqa xoʻjalik ehtiyojlarini qanoatlantirish uchun oʻziga tegishli boʻlgan yer uchastkalari doirasida qurilishbop foydali qazilmalarni va toʻldirgichlarni qazib olishga haqli.

Agar yer uchastkasidan foydalanish maqsadi qurilishbop foydali qazilmalar va toʻldirgichlarni chiqarib olishdan hamda mazkur yer uchastkasi hududidan tashqariga olib chiqishdan iborat boʻlsa, ularni joylashtirish va (yoki) ulardan foydalanish mahalliy ijro etuvchi hokimiyat organlari va Yer qaʼridan foydalanish markazi bilan kelishuvga koʻra amalga oshiriladi.

Ushbu moddaga muvofiq qurilishbop foydali qazilmalarni va toʻldirgichlarni qazib olish portlovchi moddalarni, kimyoviy reagentlar hamda zaharli moddalarni qoʻllamasdan amalga oshiriladi.

Yer uchastkasi doirasida joylashgan hamda yer egalari, yerdan foydalanuvchilar yoki yer uchastkalarining mulkdorlari tomonidan tadbirkorlik faoliyatini amalga oshirish bilan bogʻliq boʻlmagan shaxsiy, maishiy va boshqa ehtiyojlarni qanoatlantirish uchun foydalaniladigan qurilishbop foydali qazilmalar hamda toʻldirgichlar boshqa shaxsga berilishi mumkin emas.

Qurilishbop foydali qazilmalarni va toʻldirgichlarni qazib olishga doir ushbu moddaga muvofiq yuzaga keladigan huquq yer uchastkasiga boʻlgan huquqdan ajralmasdir.

Yer uchastkalarining mulkdorlarida, yer egalarida hamda yerdan foydalanuvchilarda qurilishbop foydali qazilmalarni va toʻldirgichlarni qazib olish huquqi ushbu moddaga muvofiq yer uchastkasiga boʻlgan mulk huquqi yoki yer uchastkasiga egalik qilish yoki undan foydalanish huquqi bilan bir vaqtda yuzaga keladi hamda tugatiladi.

Ushbu moddaga muvofiq qurilishbop foydali qazilmalarni va toʻldirgichlarni qazib olish uchun ruxsatnoma asosida yer qaʼridan foydalanadigan shaxslar uchun majburiy boʻlgan ruxsatnomani olish, shuningdek hisobotlar va boshqa hujjatlarni taqdim etish talab qilinmaydi.