123-modda. Oltin izlovchilar usulida qazib olishga doir ruxsatnomaning amal qilishini tugatish

Oltin izlovchilar usulida qazib olishga doir ruxsatnoma quyidagi holda tugatiladi:

1) oltin izlovchilar usulida qazib olish boʻyicha ishlarni amalga oshirish chogʻidagi talablar jiddiy ravishda buzilganda;

2) ushbu Qonunning 120-moddasida belgilangan oltin izlovchilar usulida qazib olishni olib borish uslublariga doir cheklovlar yer qaʼridan foydalanuvchi tomonidan buzilganda;

3) qazib olingan qimmatbaho metallar yashirilganda, shu jumladan ular bir yil mobaynida realizatsiya qilinmaganda yoxud qimmatbaho metallar va qimmatbaho toshlarni realizatsiya qilish hamda topshirishning ushbu Qonunning 121-moddasida nazarda tutilgan shartlari buzilganda, shu jumladan qimmatbaho metallar va qimmatbaho toshlar toʻgʻrisidagi qonunchilik buzilganda;

4) yer qaʼridan foydalanuvchi ushbu Qonunga muvofiq zarur boʻlgan hisobotlarni ketma-ket ikki yil mobaynida taqdim etmaganda;

5) yer qaʼridan foydalanuvchi oʻzining ekologik majburiyatlarini jiddiy ravishda buzganda, qoidabuzarliklarni bartaraf etib boʻlmasa yoki ularni bartaraf etish mumkin boʻlsa-yu, biroq ularni bartaraf etish toʻgʻrisidagi xabarnoma olingan paytdan eʼtiboran toʻqson kun ichida ular bartaraf etilmaganda;

6) ruxsatnoma firibgarlik yoʻli bilan, shu jumladan bila turib yolgʻon maʼlumotlar taqdim etish orqali olinganda;

7) yer qaʼridan foydalanuvchi yer qaʼridan foydalanganlik uchun ruxsatnoma doirasida undiriladigan va toʻlanishi lozim boʻlgan yigʻimlarni, jarimani yoki soliqni toʻlamaganda va ularni toʻlash toʻgʻrisidagi xabarnoma olinganidan keyin oʻttiz kun ichida ularni toʻlamaganda.

Oltin izlovchilar usulida qazib olishga doir ruxsatnomaning amal qilishi muddatidan ilgari tugatilgan hollarda yer qaʼridan foydalanuvchiga bir yil mobaynida oltin izlovchilar usulida qazib olishga doir ruxsatnoma olish yoki oltin izlovchilar usulida qazib olishni amalga oshirish taqiqlanadi.

Oltin izlovchilar usulida qazib olishga doir ruxsatnomaning amal qilishini muddatidan ilgari tugatish ushbu moddada nazarda tutilgan asoslarga koʻra Yer qaʼridan foydalanish markazining qarori bilan amalga oshiriladi. Ruxsatnomaning amal qilishini ushbu moddaning birinchi qismida nazarda tutilmagan boshqa asoslar boʻyicha muddatidan ilgari tugatishga yoʻl qoʻyilmaydi. Yer qaʼridan foydalanish markazi tomonidan qaror qabul qilinguniga qadar oltin izlovchilar usulida qazib olish boʻyicha faoliyat Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasining talabiga koʻra toʻxtatib turiladi.