115-modda. Yer qaʼridan foydalanish sohasidagi faoliyatning asosiy turlariga doir ruxsatnomani bekor qilish

Yer qaʼridan foydalanish sohasidagi faoliyatning asosiy turlariga doir ruxsatnoma quyidagi hollarda bekor qilinadi:

1) auksion natijalariga koʻra yoki Oʻzbekiston Respublikasi Prezidenti yoxud Oʻzbekiston Respublikasi Vazirlar Mahkamasi hujjatiga asosan berilgan ruxsatnomaga binoan geologik jihatdan oʻrganish loyihasi va konni oʻzlashtirish loyihasi belgilangan muddatlarda taqdim etilmaganda;

2) yer qaʼridan foydalanuvchi ushbu Qonunda nazarda tutilgan hisobotlarni ketma-ket ikki yil taqdim etmaganda;

3) yer qaʼridan foydalanuvchi geologik jihatdan oʻrganishga doir ruxsatnoma uchun ushbu Qonunning 161-moddasida koʻrsatilgan muntazam yillik toʻlovni kamida ikki yil mobaynida toʻlamaganda;

4) yer qaʼridan foydalanuvchi har yilgi eng kam xarajatlar boʻyicha majburiyatlarni ketma-ket ikki yil mobaynida bajarmaganda;

5) yer qaʼridan foydalanuvchi oʻzining geologik jihatdan oʻrganish loyihasini, konni oʻzlashtirish loyihasini, ishlar rejasini yoki yer ostida saqlash loyihasini yer qaʼridan foydalanish sohasidagi tegishli faoliyat bilan bevosita bogʻliq holda jiddiy ravishda buzganda, ularni bartaraf etish mumkin boʻlmasa yoki bartaraf etish mumkin boʻlsa-yu, bu haqda xabardor qilingan paytdan eʼtiboran toʻqson kun ichida bartaraf etilmagan boʻlsa;

6) yer qaʼridan foydalanuvchi oʻz ekologik majburiyatlarini jiddiy ravishda buzganda, ularni bartaraf etish mumkin boʻlmasa yoki bartaraf etish mumkin boʻlsa-yu, ularni bartaraf etish haqida xabardor qilingan paytdan eʼtiboran toʻqson kun ichida ular bartaraf etilmagan boʻlsa;

7) ushbu Qonunning 151 va 153-moddalarida nazarda tutilgan yer qaʼridan foydalanish oqibatlarini tugatishni moliyalashtirish boʻyicha majburiyatlarni bajarish buzilganda, ularni bartaraf etish haqida xabardor qilingan paytdan eʼtiboran oʻttiz kun ichida ular bartaraf etilmaganda;

8) qattiq holdagi foydali qazilmalarni qazib olish yoki qattiq holdagi foydali qazilmalarning asosiy turlarini qazib olish boʻyicha neft-gaz operatsiyalarini amalga oshirish chogʻida foydalaniladigan ishlar va xizmatlarda mahalliy imkoniyatlarni ishga solishning eng kam ulushi toʻgʻrisidagi talablarga yer qaʼridan foydalanuvchi tomonidan ketma-ket ikki yil davomida rioya etilmaganda, bundan texnogen mineral hosilalarga doir ruxsatnomalar yoki uglevodorodlarni qazib olishga doir ruxsatnomalar mustasno;