111-modda. Yer qaʼridan foydalanish sohasidagi faoliyatning asosiy turlariga doir ruxsatnomada nazarda tutilgan huquqlardan boshqa shaxs foydasiga voz kechish

Yer qaʼrini geologik jihatdan oʻrganishga doir va foydali qazilmalarni qazib olishga doir ruxsatnomaga ega boʻlgan shaxs ruxsatnomada nazarda tutilgan oʻz huquqlarini boshqa shaxsga berishga, agar bu shaxs ruxsatnomada nazarda tutilgan shartlarni bajarish boʻyicha majburiyatlarni oʻz zimmasiga olsa, shu jumladan garov yoki boshqa taʼminot sifatida taqdim etishga haqli.

Yer qaʼridan foydalanish sohasidagi faoliyatning asosiy turlariga doir boʻlgan, auksion yakunlariga koʻra olingan ruxsatnomada nazarda tutilgan huquqlarni bunday ruxsatnoma berilgan sanadan eʼtiboran ikki yil ichida oʻzga shaxsga oʻtkazish taqiqlanadi.

Yer qaʼridan foydalanuvchi ruxsatnomada nazarda tutilgan (toʻliq yoki qisman) huquqlardan boshqa shaxs foydasiga voz kechish moʻljallangan yoki yer qaʼridan foydalanuvchining nazorati yoki uning benefitsiar egasi oʻzgargan yoxud yer qaʼridan foydalanuvchi oʻzining ruxsatnomada nazarda tutilgan huquqlarini garov yoki boshqa taʼminot sifatida berish niyatida boʻlgan taqdirda, yer qaʼridan foydalanuvchi Yer qaʼridan foydalanish markaziga oʻzi moʻljallayotgan huquqlaridan boshqa shaxs foydasiga voz kechguniga yoki nazorat yoki uning benefitsiar egasi oʻzgarguniga yoxud huquqlarni garov yoki boshqa taʼminot sifatida berguniga qadar kamida oʻttiz kun oldin huquqlardan boshqa shaxs foydasiga voz kechish oʻziga nisbatan amalga oshirilayotgan shaxs yoki nazoratni oʻz zimmasiga olayotgan shaxs yoki uning benefitsiar egasi yoxud garov yoki boshqa taʼminot berilayotgan shaxs toʻgʻrisidagi maʼlumotlarni ruxsatnoma berishga doir arizaga oid talablarga muvofiq taqdim etishi kerak.

Yer qaʼridan foydalanish markazi maʼlumotlar olingan sanadan eʼtiboran yigirma ish kuni ichida yangi yer qaʼridan foydalanuvchi maʼqullanganligi yoki rad etilganligi toʻgʻrisida yer qaʼridan foydalanuvchini xabardor qiladi.

Agar Yer qaʼridan foydalanish markazi huquqni qoʻlga kirituvchi, yangi nazorat qiluvchi shaxs yoki uning benefitsiar egasi, garov egasi yoki boshqa taʼminot egasi ushbu Qonunning biror-bir qoidasiga asosan bunday ruxsatnomaga ega boʻlish huquqidan mahrum etilmagan boʻlsa va ruxsatnoma boʻyicha oʻz majburiyatlarini bajarish uchun zarur moliyaviy hamda texnik imkoniyatlarga ega boʻlsa, huquqlardan voz kechish, nazoratning yoki uning benefitsiar egasining oʻzgarishi, garov yoki boshqa taʼminot sifatida berish qabul qilinadi hamda ruxsatnoma ushbu Qonunning 109-moddasida belgilangan tartibda, Yer qaʼridan foydalanish markazi huquqlardan boshqa shaxs foydasiga voz kechish, nazorat yoki uning benefitsiar egasi oʻzgarishi yoki garov yoxud boshqa taʼminot sifatida berish tugallanganligi haqida xabardor qilingan sanadan eʼtiboran besh ish kuni ichida qayta rasmiylashtiriladi.