110-modda. Yer qaʼri uchastkalaridan foydalanish huquqiga doir ruxsatnomaning amal qilish muddatini uzaytirish

Yer qaʼri uchastkalaridan foydalanish huquqiga doir ruxsatnomaning amal qilish muddatini uzaytirish toʻgʻrisidagi ariza Yer qaʼridan foydalanish markaziga ruxsatnomaning amal qilish muddati tugaguniga qadar oxirgi yil ichida beriladi.

Ruxsatnomaning amal qilish muddatini uzaytirish toʻgʻrisidagi arizada yer qaʼridan foydalanuvchi vakolatli shaxs ekanligini tasdiqlovchi hujjatni taqdim etishi kerak. Arizaning shakli Yer qaʼridan foydalanish markazi tomonidan belgilanadi.

Geologik jihatdan oʻrganishga doir ruxsatnomaning amal qilish muddatini uzaytirish toʻgʻrisidagi arizada ruxsatnomada koʻrsatilgan kadastr kvadratlarini ellik foizga kamaytirishga doir axborot, shu jumladan ruxsatnomaga kiritilgan, yer qaʼridan foydalanuvchi voz kechayotgan kadastr kvadratlari, shuningdek uning foydalanishida qoladigan kadastr kvadratlari aniq belgilab qoʻyilgan yirik masshtabli xarita nazarda tutilgan boʻlishi kerak.

Foydali qazilmalarni yoki uglevodorodlarni qazib olishga doir ruxsatnomaning amal qilish muddatini uzaytirish toʻgʻrisidagi arizada quyidagilar koʻrsatilishi zarur:

1) loyiha asosiy parametrlarining joriy dolzarbligini tasdiqlovchi dalillar;

2) tegishli va tasdiqlangan ishlar rejasida nazarda tutilgan yer qaʼridan foydalanish sohasidagi faoliyat amalga oshirilganligini yoki amalga oshirilishini tasdiqlovchi dalillar;

3) quyidagilarni tasdiqlovchi dalillar;

a) konchilik faoliyati amalga oshirilgan taqdirda, bunday faoliyat ruxsatnoma amal qilgan oxirgi oʻn yildan kamida ikki yili mobaynida amalga oshirilganligining dalili;

b) uglevodorodlar qazib olingan taqdirda, bunday faoliyat ruxsatnoma amal qilgan oxirgi oʻn yildan kamida sakkiz yil mobaynida amalga oshirilganligining dalili;

4) konni oʻzlashtirishning yangilangan loyihasi (zarur boʻlsa), shuningdek yer qaʼridan foydalanish oqibatlarini tugatishning yangilangan dastlabki rejasi yoki yer qaʼri uchastkasini foydalanishdan chiqarish rejasi;

5) arizachi sarflashni rejalashtirayotgan, taxmin qilinayotgan eng kam xarajatlar summasi.

Yer qaʼridan foydalanish markazi ruxsatnomaning amal qilish muddati uzaytirilganligi yoki uzaytirish rad etilganligi toʻgʻrisida yer qaʼridan foydalanuvchini ruxsatnomaning amal qilish muddatini uzaytirish haqidagi ariza olingan kundan eʼtiboran oʻn besh ish kuni ichida xabardor qiladi.