102-modda. Saqlash uchun yer qaʼrini geologik jihatdan oʻrganishga doir ruxsatnoma

Ushbu Qonunning 101-moddasiga muvofiq ajratilgan ayrim yer qaʼri uchastkalari ushbu Qonunda belgilangan tartibda saqlash uchun geologik jihatdan oʻrganishga berilishi mumkin.

Saqlash uchun geologik jihatdan oʻrganishga doir ruxsatnoma vakolatli shaxslarga “birinchi kelgan birinchi oladi” prinsipiga koʻra qirqta ochiq chegaradosh kadastr kvadratlari uchun beriladi.

Saqlash uchun yer qaʼrini geologik jihatdan oʻrganishga doir ruxsatnoma olish uchun vakolatli shaxs Yer qaʼridan foydalanish markaziga ariza beradi, unda quyidagi axborot koʻrsatiladi:

1) arizachining davlat roʻyxatiga olinganlik toʻgʻrisidagi guvohnomaga muvofiq toʻliq nomi;

2) arizachi vakolatli shaxs ekanligini tasdiqlovchi hujjat;

3) soʻralayotgan ochiq kadastr kvadratlari toʻgʻrisidagi batafsil axborot, shu jumladan ular joylashgan yer va koordinatalar koʻrsatilgan holdagi tegishli masshtabdagi xarita;

4) tegishli yer qaʼri uchastkasini oʻrganish zarurligining asoslari mavjud boʻlgan geologik jihatdan oʻrganish loyihasi;

5) zarur boʻlgan ekologik ekspertiza oʻtkazilguniga va davlat ekologik ekspertizasining hamda Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasining ijobiy xulosasi olinguniga qadar biror-bir faoliyatni boshlamaslik majburiyati koʻrsatilgan xat.

Saqlash uchun yer qaʼrini geologik jihatdan oʻrganishga doir ruxsatnoma berishga oid arizani koʻrib chiqqanlik uchun yigʻim qonunchilik hujjatlarida belgilanadi. Yigʻim summasi qaytarilmaydi.

Yer qaʼridan foydalanish markazi, agar arizachi ushbu moddada nazarda tutilgan talablarni bajarmagan boʻlsa, shuningdek agar uning geologik jihatdan oʻrganish loyihasida yer qaʼri makonini oʻrganish va undan foydalanish zarurligi koʻrsatilmagan boʻlsa, saqlash uchun yer qaʼrini geologik jihatdan oʻrganishga doir ruxsatnoma berishni rad etishga haqli.

Yer qaʼridan foydalanish markazining saqlash uchun yer qaʼrini geologik jihatdan oʻrganishga doir ruxsatnoma berishni rad etishi asoslantirilgan boʻlishi va ushbu Qonun hamda qonunchilik hujjatlari qoidalariga muvofiq boʻlishi kerak.

Saqlash uchun yer qaʼrini geologik jihatdan oʻrganishga doir ruxsatnoma davlat yer qaʼri fondi kadastrida hisobga olinishi lozim.