25-modda. Davlat kafolatini berishda va davlat tomonidan jalb qilingan qarz mablagʻlarini qaytadan kreditlashda qoʻyiladigan talablar
Davlat qarzi toʻgʻrisida (O‘RQ-836-son) · Sana: 29.04.2023 · Amalda
Davlat kafolatini hamda Oʻzbekiston Respublikasi nomidan jalb qilingan, qaytadan kreditlanadigan qarz mablagʻlarini (bundan buyon matnda qaytadan kreditlanadigan mablagʻlar deb yuritiladi) olish uchun qarz oluvchi-rezidentlar va loyihani amalga oshirishda ishtirok etuvchi moliya tashkilotlari:
auditorlik tekshiruvidan oʻtgan moliyaviy hisobotlarga muvofiq toʻlovga qobiliyatlilik, moliyaviy barqarorlik va likvidlilik boʻyicha ijobiy koʻrsatkichlarga ega boʻlishi;
davlat tomonidan jalb qilingan qarz mablagʻlari boʻyicha hamda Oʻzbekiston Respublikasi Davlat budjeti oldida muddati oʻtgan qarzdorlikka ega boʻlmasligi kerak.
Davlat tomonidan mablagʻ jalb qilish hisobidan amalga oshirish uchun taklif etiladigan loyihalar:
davlatning ijtimoiy-iqtisodiy rivojlantirishga oid ustuvor yoʻnalishlariga va strategik maqsadlariga muvofiq boʻlishi;
jisman va moliyaviy jihatdan amalga oshirila olinadigan boʻlishi;
natijador boʻlishi va iqtisodiy, ijtimoiy yoki boshqacha naf keltirishi;
belgilangan tartibda ishlab chiqilgan va ekspertizadan oʻtgan texnik-iqtisodiy asosga ega boʻlishi kerak.