Mintaqalararo hamkorlik toʻgʻrisida

01.08.2019

Oʻzbekiston Respublikasi Hukumati bilan Belarus Respublikasi Hukumati oʻrtasida

Bitim

Oʻzbekiston Respublikasi Hukumati va Belarus Respublikasi Hukumati, keyingi oʻrinlarda “Tomonlar” deb ataluvchilar,

1991-yil 6-noyabrda imzolangan Oʻzbekiston Respublikasi bilan Belarus Respublikasi oʻrtasida davlatlararo munosabatlarning asoslari toʻgʻrisidagi Shartnomaga amal qilib,

ikki mamlakat mintaqalari oʻrtasida savdo-iqtisodiy, ilmiy-texnikaviy, madaniy-gumanitar va boshqa sohalarda hamkorlikni keng qamrovli rivojlantirish zaruriyatini tan olib,

hamkorlikning dolzarb masalalarini mahalliy darajada tezkor hal qilishda hamda tarixan shakllangan aloqalarni chuqurlashtirishda mintaqalararo hamkorlikning amaliy ahamiyati va salohiyatini eʼtirof etgan holda,

ikki mamlakat mintaqalari oʻrtasida faoliyatning turli sohalarida hamkorlikni taʼminlash hamda xoʻjalik yurituvchi subyektlarning rivojlanayotgan aloqalarini faollashtirishga qodir boʻlgan mintaqalararo hamkorlik uchun qulay shart-sharoitlar yaratish va huquqiy asoslarini mustahkamlashga intilib,

quyidagilar toʻgʻrisida kelishib oldilar:

1-modda

Tomonlar oʻz davlatlarining qonunchiligiga hamda davlatlari ishtirokchi boʻlgan xalqaro shartnomalarga muvofiq tenglik va oʻzaro manfaatdorlik asosida savdo-iqtisodiy va madaniy-gumanitar sohalarda, qishloq xoʻjaligi, sogʻliqni saqlash, turizm va atrof-muhitni himoya qilish sohalarida, shuningdek, oʻzaro qiziqish uygʻotadigan boshqa yoʻnalishlarda oʻzaro manfaatli boʻlgan mintaqalararo hamkorlikni kengaytirish va rivojlantirishga koʻmaklashadilar.

2-modda

Mazkur Bitim maqsadlari uchun qoʻllaniladigan atamalar quyidagilarni anglatadi:

“mintaqalar” — Oʻzbekiston tomonidan: Oʻzbekiston Respublikasining maʼmuriy-hududiy birliklari; Belarus Respublikasi tomonidan: Belarus Respublikasining maʼmuriy-hududiy birliklari;

“vakolatli organlar” — Tomonlar davlatlarining mazkur Bitimni amalga oshirish bilan bogʻliq masalalarni hal qilish boʻyicha mintaqalararo hamkorlikni rivojlantirish sohasida vakolat berilgan hokimiyat organlari;

“xoʻjalik yurituvchi subyektlar” — Oʻzbekiston Respublikasi hududida yoki Belarus Respublikasi hududida roʻyxatdan oʻtgan xoʻjalik yurituvchi subyektlar.

3-modda

Tomonlar, shuningdek, vakolatli organlar mintaqalararo hamkorlikni amalga oshirish va muvofiqlashtirish maqsadida quyidagilarga koʻmaklashadilar:

mintaqalar oʻrtasidagi aloqalarni oʻrnatish va rivojlantirish;

mazkur Bitimni amalga tatbiq qilishga yoʻnaltirilgan qoʻshma tadbirlar rejalari, harakat dasturlari va “yoʻl xaritalari”ni ishlab chiqish va amalga oshirish;

mintaqalararo hamkorlikning joriy holati hamda uni takomillashtirish istiqbollarini muhokama qilish boʻyicha zaruriyat boʻlganda, qoʻshma ishchi guruhlar tuzish va mintaqalar darajasida muntazam maslahatlashuvlar mexanizmini yoʻlga qoʻyish;

hamkorlikning oʻzaro manfaatli boshqa shakllari.

4-modda

Vakolatli organlar mintaqalarning korxona va tashkilotlari oʻrtasida oʻzaro manfaatli savdo va ishlab chiqarish aloqalarini rivojlantirishga koʻmaklashadilar. Mazkur maqsadlarda ular oʻz vakolatlari doirasida va oʻz davlatlari qonunchiligiga muvofiq:

korxona va tashkilotlar oʻrtasida bevosita aloqalarni oʻrnatish, qoʻshma korxonalar tashkil etish, tovar va xizmatlar yetkazib berish boʻyicha oʻzaro manfaatli kontraktlar tuzishda tadbirkorlik tuzilmalarini har tomonlama qoʻllab-quvvatlash tashabbusi bilan chiqadilar;

tadbirkor va ishbilarmon doiralar vakillari ishtirokida uchrashuvlar, forumlar, biznes-seminarlar, konferensiyalar, simpoziumlar, koʻrgazma va yarmarkalar tashkil etadilar;

oʻz mintaqalarini iqtisodiy rivojlantirishning ustuvor loyihalarini amalga oshirishda, shu jumladan, xoʻjalik yurituvchi subyektlari saʼy-harakatlarini muvofiqlashtirish orqali bir-birlarini qoʻllab-quvvatlaydilar;

oʻz davlatlari qonunchiligidagi oʻzgarishlar va amalga oshirilayotgan iqtisodiy islohotlar haqida bir-birlarini muntazam xabardor qiladilar;

oʻzaro savdoni tashkil etishda vujudga kelayotgan qiyinchiliklarni tahlil qiladilar va tegishli takliflar ishlab chiqadilar.

5-modda

Vakolatli organlar mintaqalar oʻrtasida bevosita turist almashinuvini tashkil qilish, mintaqalar jozibadorligini oshirishga qaratilgan turizm sohasidagi qoʻshma dastur va loyihalarni amalga oshirishga koʻmaklashadilar.

Vakolatli organlar ishbilarmonlik faolligini oshirish va mintaqaga turistik oqimni koʻpaytirish maqsadida transport qatnovini yaxshilash hamda infratuzilmani rivojlantirishga koʻmaklashadilar.

6-modda

Vakolatli organlar shaharlar maʼmuriyatlari oʻrtasida kasbiy aloqalarning rivojlanishiga va mahalliy boshqaruvning samaradorligini oshirish maqsadida uning ilgʻor tajribalarini tarqatishga hamda oʻz oldilarida turgan oʻxshash vazifalarni hal qilishda tajriba almashishga koʻmaklashadilar.

Vakolatli organlar shaharsozlik hamda ulkan shaharsozlik loyihalarini rejalashtirish va moliyalashtirish amaliyoti boʻyicha axborot almashish sohasidagi hamkorlikni rivojlantiradilar.

7-modda

Vakolatli organlar atrof-muhitni muhofaza qilish va tabiiy resurslardan oqilona foydalanish masalalarida hamkorlik qiladilar va tabiatni muhofaza qilish faoliyatini boshqarish sohasida ilgʻor tajribalarni joriy etishga koʻmaklashadilar.

Vakolatli organlar ichimlik suvi hamda energiya bilan taʼminlash, chiqindi suvlarni tozalash, maishiy va sanoat chiqindilarini utilizatsiya qilish, shuningdek, energiya samaradorligi sohasidagi hamkorlikni rivojlantiradilar.

8-modda

Vakolatli organlar oʻzaro yaxshiroq tushunish, hamkorlik va doʻstlikni mustahkamlashga erishish uchun tarix va madaniyat bilan oʻzaro tanishish maqsadida turli darajalarda muntazam aloqalarni qoʻllab-quvvatlaydilar.

Vakolatli organlar ommaviy axborot vositalarida mintaqalarning ijtimoiy-madaniy va iqtisodiy hayotini xolisona yoritishga koʻmaklashadilar.

Vakolatli organlar millatlararo muomala, madaniyatlararo muloqot va etnik-madaniy rivojlanish madaniyatini mustahkamlash sohasida mintaqalar hamkorligini rivojlantirishga qaratilgan loyihalar va boshqa tadbirlarni amalga oshirishga koʻmaklashadilar.

9-modda

Tomonlar oʻrtasida mazkur Bitim qoidalarini talqin qilish va qoʻllash boʻyicha yuzaga keladigan nizo hamda kelishmovchiliklar muzokaralar va maslahatlashuvlar orqali hal etiladi.

10-modda

Tomonlarning oʻzaro kelishuviga muvofiq, mazkur Bitimga uning ajralmas qismi hisoblanadigan va mazkur Bitimda belgilangan tartibda kuchga kiradigan alohida bayonnomalar bilan rasmiylashtiriladigan oʻzgartirish va qoʻshimchalar kiritilishi mumkin.

11-modda

Mazkur Bitim Tomonlar uning kuchga kirishi uchun zarur boʻlgan davlat ichki protseduralarini bajarganliklari haqida soʻnggi yozma xabarnoma diplomatik kanallar orqali olingan sanadan boshlab kuchga kiradi.

Mazkur Bitim nomuayyan muddatga tuziladi va Bitimning amal qilishi Tomonlardan biri boshqa Tomonning Bitim amal qilishini tugatish niyati toʻgʻrisidagi tegishli yozma xabarnomasini diplomatik kanallar orqali olgan sanadan boshlab olti oydan soʻng tugatiladi.

Mazkur Bitim amal qilishining tugatilishi u amal qilgan paytda bajarilishi boshlangan va uning amal qilishi tugatilgunga qadar bajarilmagan loyihalar boʻyicha Tomonlarning majburiyatlariga daxl qilmaydi.

Minsk shahrida 2019-yil 1-avgustda ikki asl nusxada, har biri oʻzbek va rus tillarida tuzildi, bunda barcha matnlar bir xil kuchga ega.

Mazkur Bitim qoidalarini talqin qilishda kelishmovchiliklar yuzaga kelgan taqdirda, Tomonlar rus tilidagi matnga murojaat qiladilar.

(imzolar)