21-modda. Ov qilish qurollari va usullari

Ov qilish:

ov qurolidan;

ovchi zotiga mansub itlardan, boshqa ovga oʻrgatilgan hayvonlar va qushlardan (ovchilik guvohnomasida tegishli qayd mavjud boʻlgan taqdirda);

yovvoyi hayvonlarni tirik holda tutib olish uchun toʻrlar va tuzoqlardan (yovvoyi hayvonlarni tutishga doir ruxsatnomada tegishli belgi mavjud boʻlgan taqdirda);

baliq ovlash qurollaridan;

minoralardan foydalangan holda amalga oshirilishi mumkin.

Qarmoqlar, ikki tomonlama mahkamlanadigan oʻntadan koʻp boʻlmagan ilgakli vositalar (peremetlar), katak oʻlchami ruxsat etilgan hajmdagi toʻrlar baliq ovlash qurollaridir.

Ov qilish amalga oshiriladigan ov qurollaridan foydalanilgan holdagi usullar va harakatlar majmui ov qilish usullaridir.

Yovvoyi hayvonlarni tutishda ov qurollarining quyidagi turlaridan foydalanish taqiqlanadi:

oʻziotar qurollardan;

kamonlar, arbaletlar va nayzalardan, bundan ov qurollaridan yovvoyi hayvonlarni immobilizatsiya qilish (qimirlamaydigan qilib qoʻyish) hamda tamgʻa qoʻyish bilan bogʻliq ilmiy, tibbiy va nazorat ishlarini amalga oshirish uchun foydalanish mustasno;

sirtmoqlardan;

ilgaklardan va toʻrlardan, bundan ushbu moddaning ikkinchi qismida nazarda tutilgan baliq ovlash qurollari mustasno;

tuyoqli yovvoyi hayvonlar uchun qopqonlardan.

Yovvoyi hayvonlarni tutishda ov qilishning quyidagi usullaridan foydalanish taqiqlanadi:

ov uchun chuqurlar qazib qoʻyish;

portlovchi, kimyoviy moddalarni va biologik preparatlarni qoʻllash;

elektr tokini qoʻllash;

dov-daraxtlarni yoqish;

tovushsiz otish moslamalarini qoʻllash;

yovvoyi hayvonlarni jalb etish uchun ovoz chiqaruvchi apparatlarni qoʻllash;

suvdan kechib oʻtish joylarida, yongʻinlardan, toshqinlardan va boshqa tabiiy ofatlardan qochayotgan yovvoyi hayvonlarni ovlash;

yovvoyi hayvonlarni muzga, qalin qorga, suvga yoki ular uchun xos boʻlmagan oʻzga yashash muhitiga haydab kiritish;

sutkaning qorongʻi vaqtida yoritish anjomlari bilan (bundan toʻngʻiz, boʻrsiq, jayra ovlash mustasno) transport vositalarini, shu jumladan yer ustida harakatlanadigan, havoda parvoz qiladigan vositalarni va kichik oʻlchamli kemalarni qoʻllash.