18-modda. Ovchilik xoʻjaliklarining huquqlari

Ovchilik xoʻjaliklari:

jismoniy shaxslarga yovvoyi hayvonlarni tutishga doir olingan kvotalar doirasida ovchilik yoʻllanmalarini (yovvoyi hayvonlarni tutish kartochkalarini) berish;

yuridik va jismoniy shaxslar bilan yovvoyi hayvonlarni tutishga doir olingan kvotalar doirasida yovvoyi hayvonlarni tutish uchun shartnomalar tuzish;

yovvoyi hayvonlarni tutishga doir ruxsatnomaga muvofiq ov qilishni amalga oshirishda qoʻlga kiritilgan ov mahsulotini qayta ishlash;

ov mahsulotini tutishning yoki qoʻlga kiritishning qonuniyligini tasdiqlovchi hujjatlar, mahsulotga doir sifat sertifikati mavjud boʻlgan taqdirda, mahalliy ijro etuvchi hokimiyat organlari tomonidan maxsus ajratilgan joylarda ov mahsulotini realizatsiya qilish;

yovvoyi hayvonlarni tabiatga moslashtirish yoki ulardan boshqa maqsadda foydalanish uchun koʻpaytirish;

fermalarda, pitomniklarda, inkubatorlarda, hovuz xoʻjaliklarida va boshqa xoʻjaliklarda saqlanayotgan hamda yetishtirilgan yovvoyi hayvonlardan foydalanish;

gʻayriqonuniy ov qilishga (brakonyerlikka) qarshi kurashish boʻyicha tadbirlarda ishtirok etish, shu jumladan ov qilish, atrof-muhitni va tabiiy resurslarni muhofaza qilish qoidalariga rioya etilishi ustidan davlat nazoratini amalga oshiruvchi organlar bilan birgalikda ishtirok etish;

ov qilish va ovchilik xoʻjaligi toʻgʻrisidagi qonun hujjatlarini buzuvchilarga nisbatan dalolatnomalar tuzish, ularni Ekologiya qoʻmitasining hududiy boʻlinmalariga topshirish;

Ekologiya qoʻmitasining hududiy boʻlinmalariga ov qilishni tashkil etish hamda amalga oshirish, shuningdek ovchilik xoʻjaliklarini yuritish masalalari yuzasidan takliflar taqdim etish huquqiga ega.