10-modda. Oʻzbekiston Respublikasi Oliy taʼlim, fan va innovatsiyalar vazirligining jismoniy tarbiya va sport sohasidagi vakolatlari

Oʻzbekiston Respublikasi Oliy taʼlim, fan va innovatsiyalar vazirligi:

oʻquv-tarbiya jarayoni sogʻlomlashtirishga yoʻnaltirilgan boʻlishini roʻyobga chiqarish, sogʻlom turmush tarzi normalarini joriy etish uchun shart-sharoitlarni taʼminlaydi;

oʻrta maxsus, professional taʼlim tashkilotlari oʻquvchilari va oliy taʼlim tashkilotlari talabalari oʻrtasida ommaviy jismoniy tarbiya va sport tadbirlarini tashkil etadi;

jismoniy tarbiya va sport sohasidagi mutaxassislarni tayyorlashda ishtirok etadi;

jismoniy tarbiya va sport sohasidagi oʻquv-uslubiy adabiyotlarni ishlab chiqishda ishtirok etadi;

oʻrta maxsus, professional taʼlim tashkilotlari oʻquvchilari (“Barkamol avlod”) hamda oliy taʼlim tashkilotlari talabalari (“Universiada”) oʻrtasida sport musobaqalarini tashkil etishda ishtirok etadi;

oliy va oʻrta maxsus taʼlim tashkilotlari sport obyektlarining moddiy-texnika va resurs bazasi saqlanishi hamda rivojlantirilishini taʼminlaydi;

oʻquvchilar va talabalarga sogʻlom turmush tarzini, sport bilan shugʻullanishning muhimligi, jismoniy va maʼnaviy komillikka intilish tushunchasini singdirishga, ularni salbiy taʼsirlardan himoya qilishga hamda zararli odatlardan xalos etishga doir chora-tadbirlar majmuini amalga oshiradi;

jismoniy tarbiya va sport sohasidagi normativ-huquqiy hujjatlarni ishlab chiqish hamda amalga oshirishda ishtirok etadi;

oʻquvchilar va talabalarni jismoniy tarbiyalashning zamonaviy shakllari hamda usullarini, jinsi va yoshiga qarab ularga sport koʻnikmalarini singdirishning ilmiy asoslangan tizimlarini ishlab chiqishni hamda joriy etishga koʻmaklashishni tashkil etadi.

Oʻzbekiston Respublikasi Oliy taʼlim, fan va innovatsiyalar vazirligi qonunchilikka muvofiq boshqa vakolatlarni ham amalga oshirishi mumkin.