Madaniyat va fan sohasida hamkorlik toʻgʻrisida

14.01.2004

Oʻzbekiston Respublikasi Hukumati bilan Mongoliya Hukumati oʻrtasida

Bitim

Oʻzbekiston Respublikasi Hukumati bilan Mongoliya Hukumati, bundan keyin “Ahdlashuvchi Tomonlar” deb ataluvchilar,

ikki mamlakat oʻrtasida anʼanaviy doʻstona munosabatlarni hamda hamkorlikni rivojlantirish va mustahkamlashga intilib,

madaniyat, fan, taʼlim, sanʼat, sport, matbuot, axborot va boshqa sohalardagi hamkorlik Oʻzbekiston Respublikasi bilan Mongoliya xalqlarining manfaatlariga javob berishiga qatʼiy ishongan holda,

quyidagilar toʻgʻrisida ahdlashib oldilar:

1-modda

Ahdlashuvchi Tomonlar madaniyat, fan, taʼlim, sanʼat, adabiyot, matbuot, axborot, radioeshittirish, televideniye va sport sohalarida tenglik hamda teng huquqlilik prinsiplari asosida, milliy qonunlar talablariga va xalqaro majburiyatlarga muvofiq ikki davlatning tegishli muassasalari oʻrtasida almashuv hamda hamkorlikni qoʻllab-quvvatlaydilar.

2-modda

Ahdlashuvchi Tomonlar fan va taʼlim sohasida bevosita hamkorlikning rivojlanishini, ilmiy-tadqiqot, taʼlim muassasalari, oliy oʻquv yurtlari hamda olimlar oʻrtasida qoʻshma dasturlarni amalga oshirishni, shuningdek ikki mamlakatning talabalar, aspirantlar va stajyorlarning oʻzaro tahsil olishlariga milliy qonunlarning talablariga hamda xalqaro majburiyatlarga muvofiq qoʻllab-quvvatlaydilar.

3-modda

Ahdlashuvchi Tomonlar madaniyat va sanʼat sohasida hamkorlikni quyidagi usul bilan milliy qonunlarning talablari va xalqaro majburiyatlarga muvofiq qoʻllab-quvvatlaydilar, xususan:

madaniyat va sanʼat muassasalari, ijodiy uyushmalar, ijodkor ziyolilari vakillari va madaniyat arboblari oʻrtasida bevosita aloqalarni oʻrnatish;

artistlar va artistik truppalar bilan almashish;

yozuvchilar, madaniyat va sanʼat arboblari bilan almashish;

badiiy koʻrgazmalarni prezentatsiya qilish;

sanʼat festivallari, teatr, kinofilm va musiqa kunlarini tashkil etish;

kinofilmlarni qoʻshma yaratish, teatr pyesalarini sahnalashtirish;

madaniyat va sanʼat sohasidagi kitoblar hamda nashrlar bilan almashish;

boshqa Ahdlashuvchi Tomon tashkil etadigan xalqaro madaniy tadbirlarda ishtirok etish.

4-modda

Ahdlashuvchi Tomonlar kutubxonalar, arxivlar va muzeylar oʻrtasida bevosita hamkorlikni qoʻllab-quvvatlagan holda, milliy qonunlar talablariga muvofiq boshqa Tomon mutaxassislariga yuqorida koʻrsatilgan muassasalarning materiali bilan ilmiy-tadqiqot va madaniy-maʼrifiy ish uchun foydalanishga imkoniyat beradilar.

5-modda

Ahdlashuvchi Tomonlar matbuot va axborot sohasida yaqin hamkorlikni milliy qonunlar talablariga va xalqaro majburiyatlarga muvofiq qoʻllab-quvvatlaydilar. Shu maqsadda Tomonlar quyidagilarni amalga oshiradilar:

telefilmlar, radiomateriallar va musiqiy yozuvlar bilan almashuvni;

jurnalistlar va axborot agentliklari, matbuot tahririyatlari, radio va televideniye xodimlari bilan almashuvni amalga oshiradilar.

6-modda

Ahdlashuvchi Tomonlar sport tashkilotlari oʻrtasidagi aloqalarni rivojlantirishga, musobaqa va uchrashuvlarni oʻtkazishga, sportchilar va trenerlar bilan almashuviga milliy qonunlarning talablari hamda xalqaro majburiyatlarga muvofiq koʻmaklashadilar.

7-modda

Ahdlashuvchi Tomonlar ikkala davlat hududida joylashgan qadimgi zamon xaykallarini va madaniy boyliklarni saqlash hamda restavratsiya qilishda milliy qonunlar talablariga va xalqaro majburiyatlarga muvofiq hamkorlik qiladilar.

8-modda

Ahdlashuvchi Tomonlar YUNESKO va boshqa xalqaro tashkilotlar doirasida hamkorlikni rivojlantiradilar.

9-modda

Ahdlashuvchi Tomonlar ushbu Bitimni bajarish maqsadida hamkorlik dasturlarini ishlab chiqadilar va ularning moliyaviy shartlarini kelishib oladilar.

10-modda

Ahdlashuvchi Tomonlarning oʻzaro kelishuvlariga muvofiq ushbu Bitimga alohida bayonnomalar bilan rasmiylashtiriladigan va ushbu Bitimning ajralmas qismi hisoblanadigan oʻzgartirish va qoʻshimchalar kiritilishi mumkin.

11-modda

Ushbu Bitimning qoidalarini qoʻllash va talqin qilishda yuzaga keladigan bahsli masalalar Ahdlashuvchi Tomonlar oʻrtasida ikki tomonlama muzokara va maslahatlashuvlar orqali tartibga solinadi.

12-modda

Ushbu Bitim qoidalari Ahdlashuvchi Tomonlarning ular ishtirokchi boʻlgan boshqa xalqaro shartnomalardan kelib chiqadigan huquq va majburiyatlariga daxl qilmaydi.

13-modda

1. Ushbu Bitim Ahdlashuvchi tomonlar uni kuchga kiritish uchun zarur boʻlgan davlat ichki protseduralarini bajarganliklari toʻgʻrisida diplomatik kanallar orqali oxirgi yozma xabarnoma olingan sanadan boshlab kuchga kiradi.

2. Ushbu Bitim 5 yil muddatga tuzilmoqda va amal qilish muddati oʻz-oʻzidan keyingi besh yillik muddatlarga choʻziladi, agar Ahdlashuvchi Tomonlardan biri boshqa Ahdlashuvchi Tomonga yozma ravishda tegishli muddat tugashidan 6 oy oldin ushbu Bitimning amal qilishini toʻxtatish haqidagi niyati toʻgʻrisida xabardor qilmasa.

3. Ushbu Bitimning amal qilishini toʻxtatish unga muvofiq tuzilgan loyiha va dasturlarni amalga oshirish hamda ular uni amal qilish muddatida vujudga kelgan va Bitim amal qilishining tugash vaqtiga bajarilmagan majburiyatlarga taʼsir etmaydi, agar Ahdlashuvchi Tomonlar boshqa toʻgʻrisida kelishib olmasalar.

Pekin shahrida 2004-yil 14-yanvarda ikki nusxada, har biri oʻzbek, mongol va rus tillarida tuzildi, bunda barcha matnlar bir xil kuchga ega.

Ushbu Bitimning qoidalarini talqin qilish maqsadida rus tilidagi matndan foydalaniladi.

(imzolar)