13-modda. Yer uchastkalariga boʻlgan huquqlarni davlat roʻyxatiga olish
Davlat yer kadastri toʻgʻrisida (666-I-son) · Sana: 28.08.1998 · Amalda
Yer uchastkalariga egalik qilish, ulardan foydalanish huquqlarini, yer uchastkalarini ijaraga olish huquqini, shuningdek yer uchastkalariga boʻlgan mulk huquqini, shu jumladan servitutlar toʻgʻrisidagi bitimlarni va boshqa cheklovlarni hamda bu huquqlarning bekor qilinishini davlat roʻyxatiga olish Koʻchmas mulkka boʻlgan huquqlarning davlat reyestriga tegishli maʼlumotlarni kiritish orqali yer uchastkasi joylashgan yerda amalga oshiriladi.
Yer uchastkalariga egalik qiluvchi, ulardan foydalanuvchi, ularni ijaraga olgan, shuningdek mulk qilib olgan yuridik va jismoniy shaxslar yer uchastkalariga boʻlgan oʻz huquqini belgilangan tartibda roʻyxatdan oʻtkazishi shart.
Yer uchastkasiga boʻlgan huquqlarning yuzaga kelishi, oʻzgaga oʻtishi, cheklanishi va bekor qilinishi davlat roʻyxatiga olinishi lozim. Yer uchastkalariga boʻlgan huquqlarni roʻyxatga olganlik uchun Oʻzbekiston Respublikasi Vazirlar Mahkamasi tomonidan belgilangan tartibda roʻyxatga olish yigʻimi undiriladi.
Yer uchastkalariga boʻlgan huquqlarni davlat roʻyxatiga olish belgilangan tartibda yuridik yoki jismoniy shaxsning yer uchastkalariga boʻlgan huquqlarni davlat roʻyxatiga olish ishlarini amalga oshiruvchi organga bergan arizasiga asosan amalga oshiriladi.
Yuridik va jismoniy shaxslarning yer uchastkalariga boʻlgan huquqlarini davlat roʻyxatiga olish yer uchastkalariga boʻlgan huquqlar toʻgʻrisidagi zarur hujjatlar ilova etilgan ariza kelib tushgan paytdan eʼtiboran ikki kunlik muddatda tegishli vakolatli organ tomonidan amalga oshiriladi, bundan qonunchilikda nazarda tutilgan hollar mustasno.
Yer uchastkasiga boʻlgan huquqlarning yuzaga kelishi va boshqa shaxsga oʻtishi davlat roʻyxatiga olinganligi haqida Koʻchmas mulk obyektlariga boʻlgan huquqlarning davlat reyestridan elektron koʻchirma beriladi, unda roʻyxatga olish sanasi va tartib raqami koʻrsatiladi.
Yer uchastkasiga boʻlgan, belgilangan tartibda yuzaga kelgan huquq ushbu huquq davlat roʻyxatiga olinganidan keyin kuchga kiradi.