11-modda. Tartibga solish taʼsirini baholash

Moliya markazining muhim ahamiyatga ega qarori taklif etilishidan oldin Moliya markazining tegishli organi quyidagilarni tahlil qiluvchi tartibga solish taʼsirini baholashga doir hujjatni tayyorlashi va eʼlon qilishi shart:

Moliya markazining taklif etilayotgan qarorida hal etishga eʼtibor qaratilgan muammoni yoki maqsadni;

taklif etilayotgan choralar hamda koʻrib chiqilgan muqobil variantlar boʻyicha xarajatlar va foydani;

taklif etilayotgan choraning Moliya markazining raqobatbardoshligiga va jozibadorligiga nisbatan ehtimoliy taʼsirini;

taklif etilayotgan choraning Moliya markazining shaxslariga nisbatan ehtimoliy taʼsirini;

taklif etilayotgan chorani amalga oshirish muddatini va oʻtish davrining tartib-taomillarini.

Jamoatchilik muhokamasi jarayoni yakunlanganidan keyin Moliya markazining tegishli organi muhokama davomida olingan muhim maʼlumotlarni aks ettirish maqsadida tartibga solish taʼsirini baholashga oid hisobotini qayta koʻrib chiqishi mumkin.

Tartibga solish taʼsirini baholashga oid hujjat ushbu Konstitutsiyaviy Qonunning 10-moddasiga muvofiq taqdim etiladigan jamoatchilik muhokamasi hujjati tarkibida yoki u bilan bir vaqtda eʼlon qilinadi.

Tartibga solish taʼsirini baholashning mazmuniga nisbatan qoʻyiladigan talablar, uning uslubiyati va shakli Moliya markazining kengashi tomonidan qoʻshimcha ravishda belgilanadi.